Monday, August 1, 2022

CHHUNGKUA CHU HLIMAWM TAK A NI TUR A NI

 _Inlaichinna ṭha_

- Rick Warren 

- August 1, 2022



"An dam chen tur chu engpawhnise, mite hian an damchhung chu nitin hlim taka hun hman an duh ṭhin." (Roreltute 11:8, NCV)

Chhungkaw ropui entirtu hmasa ber hei hi a ni: chhungkaw duhawmte chu an infiam ṭhin a. Intihhlim dan an thiam ṭhin. Nun hi hlim takin an chen a. Infiam dan pawh an hria. Hei hi tunlai chhungkaw tam tak tlakchham a ni. Tunlaiah chuan chhungkua tam tak chu kan  buai lutuk a, kan chau lutuk a, kan rilru a kawi lutuk a, kan muk lutukin kan inchhawr fe em em bawk. Tunge chutiang chhungkuaah chuan sikul ban hnu pawha lo haw thuai thuai chak ang? Chhungkua chu kan hlimtlang tur a ni.

Hemi chungchang hi Bible-in a sawi a, thu min pe a ni zawk mah. Thuhriltute 11:8-ah chuan heti hian kan hmu, _"An dam chen tur chu engpawhnise, mite hian an damchhung chu nitin hlim taka hun hman an duh ṭhin."_ (NCV)

Engvangin nitin hlim chu i tan a pawimawh?

A chhan chu eng chen nge i dam dawn tih i hriat loh avangin a ni. Karleh emaw thla leh emaw i dam thlen dawn leh dawn loh i hre miah lo. Naktuk pawh hi damin i hmu dawn em i hre hauh lo. Chuvangin i dam laia tihtur i neih apiang chu tunah hian ti mai rawh.

Heng hlimna hi i chhungkua pawn lamah pawh i tithei. I chhungte bulah i khawsa lo a nih chuan i lawina kohhran chhungkuaah khan tih tum rawh. Sunday sikul emaw, pawl dang (ṭhalai, nuho, paho, ldt.) ah, i kum rualpuite bulah heng hlimnate hi i nei thei bawk.

Ka fate khan an ṭhan len chhoh mek lai khan hria sela tih ka duh em em mai chu kan chhungkua kan fel tawk lo a, kan ṭha tawk lo tih kha a ni lo. Kan chhungkuaah khan hmangaih an nih thu leh kan hlim a ni tih kha hria se ka duh a ni. Hlimna kan neih theih nan thil tam tak ka tiin ka siam a ni.

Chung zinga ka thil siam pakhat chu 'Apa zinna ram mak leh nuam' tih a ni a. Naupanghovin an lawm hle. Kan chhungkaw tihphung pakhat a ni chho ta. Tunah chuan ka tuteho ka neihpui ṭhin. Kan fate khan zirna sikul an luh tirhin zingah ka kai tho a, " Tho ru le! Vawiin hi apa zinna ram mak leh nuam tlawh hun a ni e" ka han ti a. An hlim em em ṭhin, sikul kal a ngai lo a hlim takin hun an hmang dawn tih an hria, tui chenna tur awmna hotel-ah emaw, icecream eina tur hmunah emaw kan kal dawn tih an hre tlat a ni.

Hei hi rilruah vawng reng rawh: Miin i thusawi an hre reng lovang, mahse an rilru i deh dan erawh an theihnghilh tawh lovang. Chu chu hotu, ngaihzawng nei te, nu leh pa te, leh kawppui neite tana thurawn pawimawh tak a ni.

Ka fate khan an naupan zual laia ka thusawite kha a tam zawk chu an hre tawh lo. Mahse engtinnge an rilru ka khawih erawh an hre reng. Hun hlimawm tak kan hmang nasa hle tih an hria.

Chhungkaw duhawmte chuan infiam/intihhlim an ngaina ṭhin.

_"Hlim taka i awm ka duh a ni . . . Tichuan Pathianin thawhrimna a pek che zawng zawngte nen hlimna tam tak i hmu ang."_ (Thuhriltu 8:15, NLT)

Ngaihtuah chhunzawm atan.

In chhungkua in intihhlim theihna engin nge dal?

I fate hnena i thusawiah nge an rilru i deh dan i dah hmasak zawk? Eng kawngtein nge?

Vawiin hian in chhungkua emaw ṭhianho emaw in hlim zawk theih nan engnge i tih ang?

In chhungkuain intihhlimna hun in hman tam zawk nan engtinnge ruahmanna i siam ang?

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...