Monday, August 1, 2022

I NUNAH MI DANGTE TAN HMUN KIAN RAWH

 Inlaichinna ṭha

- Rick Warren 

- July 31, 2022



"Tin, hmangaih leh thil ṭha tiha inchawk tho turin inngaihtuah tawn ang u" (Heb. 10:24)

Chhungkaw entawntlak takte chuan an fate hnenah he khawvela mi pawimawh ber an nih lohzia an zirtir ṭhin a. Pathianin he khawvelah hian tih tur neia a siam thu an fate an zirtir bawk ṭhin. Inpekna, rawngbawlna, thil phalna, leh ṭawngṭainate hi an nun kaihruaitu a ni. Chhungkaw satliah chuan chung thilte chu an ti ve ngai lo. Chhungkaw entawntlak erawh chuan an ti ṭhin.

Vawiina ka nihna ang ka nih theihna hi a hmasa berah chuan ka nu leh pate zar a ni. Mi dangte ngaihtuah a pawimawhzia hi keimahah nghet takin an tuh a ni. 

Ka nu leh pate khan sum an ngah miah lo mahse midangte ngaihsakna leh thil phalna an nei thuk hle tih erawh ka hria. Nei teh ual lo mahse mi dangte hnena pek ve kha nuam an ti tlat zel nia. Khaw pawn deuhah kan khawsa a, in bul huan zau tak maiah chuan ka pain thlai chi chi tinreng, tam tak mai a nei a. Chung kan thlai tharte chu kan chhungkua chauh chuan kan ei seng dawn lo nasa, mahse mi dangte pek ve tur a awm theih nan ka pa chuan a ching tlat a ni, mi dangte ṭanpui nan pawisa pek tur kan nei zo si lo va. Chuvang mi dangte hnena kan sem ve theihna turin.

Kan in kha inlengin kan khat deuh reng . Na tuar an awmin kan inah an lo kal a. Kawng dung vel maia khawsa an nihin, kan inah an lokal a. Harsatna lian tak an tawhin kan inah an lo chuang lut bawk. Kristian hruaitu lar tak lo kal an awmin, kan inah an lo chuang lut ṭhin bawk. Ni khat chu ka pain kum khat chhunga mikhualte tana ka nuin chaw a lo chhumsak ṭhin chu a chhut chhin a. Vawi 1000 chuang lai a ni. "I nun mi dangte tan hmang ral rawh" tih nunpuina boruaka seilian ka ni a. Ka nu leh pate kha hringnun hi mahni chauh inngaihtuahna ni lovin, midangte ṭanpuina nun zawk a ni tih min zirtir a ni.  

Chutiang chuan chhungkaw duhawm chuan an ti ṭhin.   Inhmangaihtawn a, thil ṭha ti turin an inzirtir ṭhin - midangte rawngbawlsak turin.

Entirna ṭha tak chu Tirhkohte Thiltih bua Kornelia te chhungkuaah kan hmu: _"Pathian ngaihsak mi a ni a, a chhungte zawng zawng nen Pathian an ṭih thin a, mite hnenah thil tam tak a pe ṭhin a, Pathian hnenah pawh a ṭawngṭai fo va."_

Entawn tur an va hnutchhiah ṭha em! Engtikah emaw nang leh i chhungte chanchin a ṭha zawnga ziah ve i duh dawn lo'm ni?

Fa i nei emaw nei lo emaw chutiang entawn tur ṭha tak chu hnutchhiah turin Pathianin a duh che. I chheh vela mite kha kumah emaw rinna kawngah emaw nang aia naupang an ni tih i hmu ang. Pathianin min siam chhan anga awm thei turin i bul vela mite kha i pui thei ang em? Vawiin hian an nuna Pathian thil tum an hmuh chhuah theih nan an tan hun inpe rawh.

Ngaihtuah zui atan.

Eng ang thil nge mite tan hnutchhiah i duh le? Chung thil hnutchhiah tur chuan eng tin nge ke i pen le?

Fa i nei lo a nih chuan, tleirawl zingah tute nge Pathianin a siam chhan an nun chhuahpui theihna tur leh mi dangte ṭanpuina chang an hriat theih nan i puih theih ang?

Eng tin nge mi dangte tan i in chu zau zawka i hawn theih ang?

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...