Sunday, July 3, 2022

CHATUAN INAH RO KHAWLKHAWM RAWH

 _Hlimna nunkawng_

- Rick Warren 

- July 3, 2022



"I thilpekte chu ka lawm viau na a, ka lawmna ber erawhchu i ngilneihna avanga i lawmman hmuh tur chu a ni." (Philippi 4:17, TLB)

Phal taka midangte i pek ṭhin khan i chatuan hmun tur atan i inkhawl khawm a ni.

Hetianga tih hi "Van a ro khawl khawm" tiin Isuan a sawi. He thu hi Bible-ah hian vawi ruk lai a hmang a. Lal Isuan vawiruk lai a sawi chu nang pawhin i ngaihven a ṭul a ni. I ngaihven loh chuan malsawmna i dawng lovang.

Matthaia 6:19-20 ah chuan Lal Isuan, "Leia sûlrûl leh tuiêkin a ei chhiatnaah, rûkruten an reh pawha an rûknaah hian, in tân rote khâwl khâwm suh u; vânah, sûlrûl leh tuiêkin a ei chhiat lohnaah, rûkruten an reh pawha an rûk hek lohnaah chuan, in tân rote khâwl khâwm zâwk rawh u." a ti. 

Mi tam zawk chuan he khawvelah hian kum 100 aia tlem hun kan nei a; kan thil neih hlu zawng zawngte hi kan la kalsan vek dawn a ni. Mahse, vanah rohlu ral ve lo tur kan la chen dawn a ni.

Anih leh engtinnge vanah ro chu i khawl khawm tak ang? Engtin nge i han chhek khawl ang? Mite chunga i thil tih hmangin i khawlkhawm ang.

Pathianin midangte nunah ro khawllhawm turin a duh che, a chhan chu chung chuan kan chatuan nun tan nghawng neiin lawmman min siam a ni. *Chatuan daih tur thil pahnih chauh a awm: Pathian thu leh mihringte.* Miin vanramah emaw hremhmunah emaw an chatuan hun an hmang dawn a, mite nuna i ro khawlkhawm khan thil a tidanglam hlawk thei a ni.

Philippi 4:17-ah chuan, "I thilpekte chu ka lawm viau na a, ka lawmna ber erawhchu i ngilneihna avanga i lawmman hmuh tur chu a ni." tih kan hmu (Philippi 4:17, TLB).

An thlawpna avângin Paula khan Philippi khuaa mite kha lawmthu sawi nan heti hian a thawn a ni. Mahse, a lawmna ber leh amah tihlimtu ber chu an inpumpekna leh an thil phalnaten an tan vanah ro a khawl khawmsakna zawk kha a ni. Amah kal tlangin an tan vanah ro an khawl khawm tihna a ni.

I sem ral zawng zawngte avângin lawmman pek i ni dawn. I hun i pe em? Vanah lawmman pek i ni dawn. I chakna i luanchhuah tir em? Vanah lawmman pek i ni dawn. I sum te i sem chhuak em? Vanah lawmman pek i ni dawn.

Vawiin hian luanchhuah dan ngaihtuah la, i tan vana ro khawl khawm dan tur ngaihtuah rawh.

Ngaihtuah zui atan.

Engtinnge i hun, i chakna leh i sumte midangte nuna ro khawlkhawm nan i hman?

I hun, i chakna leh i sumte chu em ni luanchhuah tir i harsat ber? Chumi kawnga i luanchhuah theih nan Pathian hnenah rinna dil la, tichuan, malsawmna i dawng dawn nia.

Khawvela ro khawl khawm lova vana ro khawl khawm nun nei turin engtin nge i tih ang?

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...