_Hlimna nunkawng_
- Rick Warren
- July 4, 2022
"Keimah leh chanchin ṭha avanga an nun chang apiangte chauhin nun awmzia an hrethiam ang." (Marka 8:35, TLB)
Engvangin nge ka duh khawp hmu lo anga ka inhriat? He zawhna hi mi tam takin an inzawt ṭhin. An hlim lo va, an lungawi tawk lo - an rethei tak zet a ni.
He thawnthu hian chiang takin a entir. Mount Everest tlang sang tak mai lawn chhuah hi mi tam tak chona petu a ni. He tlang sang lai ber lawn chhuah tum hian mi tam takin an bei a - an tum ram thleng thei lova kawng laka thi tate pawh an awm nual. An ruangte chu tlang lawnna kalkawngah hian an inzam deuh put mai a ni awm e. Mahse mi tam takin he tlang lawn hi an la chak viau tho, mite ngaihhlutna tur chhan phaw chhuak zo lo fo mahse.
Kum tam vak lo liam taah khan tlang lawn mi, David Sharp-a chuan tlang a lawn laiin harsatna lian tak mai a tawk a. Tlang lawn ve dang mi 40 vel laiin puih a ngai tih an hmu reng a mahse tumahin ṭanpui tak tak an tum lo. Mount Everest-ah chuan a thi ta nge nge, a chhan chu tlang lawn zawng zawngte khan anmahni tum ram dah pawimawh lova an nunna thapa puih kha an tum lo a ni.
Thudik tak chu, mi tam tak chu chutiang mi chu kan ni. Neih belh zel duhna te, tih belh zel duhna te, leh mahni inhumhim duhnate avangin thil pawimawh zawk i hmuh ṭhelh fo ṭhin. Mahse chu chu Pathianin a duan dan che a ni lo. Hringnun hi engnge i siam, tunge i hriat, engnge i tih, engnge i tan inngaihtuah tih lam a ni lo. Hringnun awmzia chu hmangaihna hi a ni - Pathian leh midangte hmangaihna hi a ni.
Marka 8:35-ah chuan Isuan heti hian a sawi, "Keimah leh chanchin ṭha avanga an nun chang apiangte chauhin nun awmzia an hrethiam ang." (TLB)
Pathian tana i nun i hman ral phawt loh chuan hlimna i nei lovang, chu chu Pathian min duan dan a ni. Nangma tan chauh ni lovin, chu aia ropui zawk tan siam i ni. Hei hi Bible chuan i tihtur (mission) tiin a sawi. Hlutna hi i nihna emaw, hlawh emaw, mipa/hmeichhia nihna emaw aṭanga lo chhuak a ni lo. Hlutna chu i rawngbawlna/hnathawhna aṭanga lo chhuak a ni.
Midang tana i nun i hlan chauhin lungawina i hmu ang- nun hlutna i hmang chhuak a ni ang.
Ngaihtuah zui atan.
I hlim lo em, i lungawi lo em, i ngui em? Hengte hi Isua mi lo thil dangah i rilru i pe tih entirna a ni. Engvangin nge thildangah i rilru i pek ni a i hriat?
Pathian thiltum ṭawmpui turin engnge i thlak danglam ngai?
Engtinge rawngbawlna nun a taka i entir theih ang?
[Lettu: Mapuia Fanai]

No comments:
Post a Comment