_Hlimna Nun Kawng
By Rick Warren
— June 17, 2022
“Tu pawh mahni nun humhim tum chuan an chân ang a, tu pawh keimah avâng leh Chanchin Ṭha avânga nun chân chuan an humhim ang.” [Marka 8:35]
Pathianin van leh khawvel a din danah chuan hlimna chu khawvelin a pek theih thilah a awm lo.
Hlimna chu mite rawngbawlsaknaah a awm. Pathianin a siam danah che chu mite tana i nun i hlannaah hlim ber tura siam i ni. Eng vangin? A chhan chu Amah ang ni turin a duh che – amah ngei pawh hmangaihna avangin a inhlan a ni. Hmangaihna Thuhla a ni ta ber mai!
“Tu pawh mahni nun humhim tum chuan an chân ang a, tu pawh keimah avâng leh Chanchin Ṭha avânga nun chân chuan an humhim ang.” [Marka 8:35]
Lawmna thinlung nei thei tur chuan nitinin rawngbawlna leh nun luangchhuak neia i nun a ngai.
Matthaia 20: 28 chuan hetiang hian a sawi, “Mihring Fapa pawh hi rawngbâwlsaka awm tûrin a lo kal lo va, rawngbâwl tûr leh mi tam tak tlan nâna a nun pe zâwk tûra a lo kal ang hian,” tiin.
Isua kha mite rawngbawlsak tur leh a nun hlan turin a lo kal a. He thil pahnih tluka i nun tihlim thei tur khawvelah thil dang pakhat mah a awm lo, chu chuan Isua zui tih awmzia pawh hi an hrilhfiah ber bawk. Mite rawng i bawlsak lo a nih a, mite tana i luangchhuak lo bawk a nih chuan Isua i zui lo tihna a ni ang. Chu chu thil chiang a ni.
Pathianin van leh khawvel a din danah chuan mite tana i luanchhuah nasat poh leh Pathianin nasa zawkin mal a sawmsak che ang a, tichuan i hlim zual deuh deuh ang.
A kum telin i thil phal zual deuh deuhin i inhria em? I thil neih thuhlaah khan nikum lam aiin kumin hian i thilphal zawkin i inhria em? A nih loh pawhin thil phal dan ngai renga i awmin i hlim lohna ngai rengah khan i la inbat hnawkin i inhria em?
Philipi 2: 17-18 ah chuan Paula chuan “In rinna rawngbâwlna leh inthawinaah chuan kei hi hlanin awm dâwn pawh ni ila ka lâwm ang, nangni pawh ka lâwmpui bawk ang che u. Chutiang bawkin nangni pawh lâwm ula, mi lâwmpui bawk rawh u,” tiin a sawi hial.
I rinna chuan i nunna kha Pathian tana hlan tur leh a mite rawngbawlsakna hmanga a rawng bawl turin a tirlui che. Inhlanna leh rawngbawlna chu mihring nun hlimna tluantling neihna niin Chanchin Ṭha avanga i inleihbuak ang zelin i chang nasa ang.
Ngaihtuah zui atan.
I nitin nunah khan eng thilin nge tihhlim ber ṭhin che?
Mite rawngbawlsakna emaw mite thilpekin emaw engtik laiin nge hlimna lo chantir tawh che?
Engtin chiah nge midangte rawng i bawlsak theih ang?
I nun khan Isua a lo ring ve tawh em? Bible chuan Isua Pathian Fapa kaltlang chauhin vanram i kai thei dawn
a ni tih a sawi a. I vanram kalkawng chu i thawk chhuak thei lo:
“Rinna avânga khawngaihnaa chhandam in ni, chu chu in thawh chhuah a ni lo, Pathian thilpêk a ni. Thil ṭha tih avângin a ni lo, chuti ni se miin an chhuang dah ang e” tiin a sawi. [Ephesi 2: 8-9]
I sualte thupha chawi tur leh i nuna Isua ring tura i inpeih tawh chuan he ṭawngṭaina thu hman hian ṭawngṭai ang che: “Lalpa duhtak, i thutiama ka hmuh dan chuan Isua ka rin phawt chuan ka thilsual tih zawng zawngte ngaihdam a ni ang, ka damchhan ka zir tawh ang a, i chatuan inah chuan engtik niah emaw chuan min lo la lawm ang.
“Ka sualte avangin thupha ka chawi a, Isua hnenah amah chu ka Chhandamtu leh Lal atan ka intulut e. Isu, zui che ka duh a, i rawngbawl turin ka inpe e. Tlawm takin ka nunna hi i kutah ka hlan a, i chhungte zinga min lo lawm turin ka ngen a che. I hming ka dil e. Amen.”
He ṭawngṭaina hi i hlan thei a nih chuan, he mailah hian Rick@PastorRick.com min lo bia ang che. Isua nena inzin kawng atana thuziak pawimawh tak tak lo thawn che ka duh a ni.
[ *Lettu* : Peka]

No comments:
Post a Comment