Hlimna nun kawng
Rick Warren
June 18, 2022
"Engkimah lâwmthu hril fo rawh u. Hei hi Krista Isuaah chuan Pathianin in tih a duh chu a ni." 1 Thessalonika 5:18
Thil hote te avanga vuivai leh inhauh hian i hlimna a lakbosak zel ang che.
He thil chinṭhan hi sim mai a har fo thin, a chhan chu mi hi an nihphung rengah a thim zawnga thil thlir mi an awm thin a, tin, an seilenna avang pawh a ni thei. Adama leh Evi-te hunlai atang tawh khan, insawifiah leh midang sawisel hi kan ching reng a. Kan tihsual thilah kan insawifel zung zung laiin, midang tihsual kan sawisel zung zung bawk thin.
"Kawppui dang lo nei ni ta zawk ila chuan, ka hlim ngei ang. Nupui/pasal kha lo nei ta lo zawk ila chuan ka hlim zawk ngei ang mawle. Fa nei ve ila chuan ka hlim ngei ang mawle. Ka fate hi indang se ka hlim zawk ngei ang" kan ti fo thin em le.
Chutiang chu 'tiangin awm se' 'ka chuti ang' tih ngaihdan a ni a. Mahse hlim i duh chuan i hlim mai zawk thin. I hlim lohna avangin midang i dem ngawt thei lovang a chhan chu hlimna hi duhthlanna a innghat a ni. Insawifiah leh midang dem i sim a, thil ho te te avanga vuivai leh inhauh i sim a ngai zawk a ni.
Bible chuan, "Phunnawi lo leh hnial lovin engkim ti rawh u. Tûnlai mi bengtla lo leh tihmawhte zîngah hian Pathian fa, sual nei lo, nun tlang, sawisêlbo in nih theihna tûr leh, khawvêl tiêngtute in nih theihna tûrin" (Philipi 2:14-15) a ti.
Heng changte hi Bible a zawm har tak zinga mi an ni ngei ang. Mahse ka tan chuan Matthaia 12:36 hi a hlauhawm deuh ber awm e, chutah chuan Isua khan, "Ka hrilh a che u, miten thu lawilo an sawi apiang, chu thu chu rorêl ni-ah chuan an sawi fiah a la ṭûl ang" a ti a.
Chu thu chuan ka hnungzang chhoah hian min ṭham vawt er er thei nia. Vawi engzat nge thil te tham i buaipui loh turah i phunnawi a, i sawisel a, i hnial buai thin le? Nun a zawm tur dan hmasa ber chu: Thil ho lutukah buai suh tih hi. Dan pahnihna chu: engkim deuhthaw mai hi thil ho tham a ni tih hi.
Bible chuan 1 Thessalonika 5:18-ah chuan, "Engkimah lâwmthu hril fo rawh u. Hei hi Krista Isuaah chuan Pathianin in tih a duh chu a ni" a ti.
Zirchian nawn fo pawh hian lungawina hi rilru hrisel ber a ni tih a tilang zel thin.
Engvangin nge i lawm ang? I nunah engpawh thleng sela, Pathian chu i hnenah a awm reng a, i chhungah a awm reng a, i tan a awm zel bawk a ni tih hi hre reng ang che.
Chu chu phunnawi mai lova, lawmna tham a ni.
Ngaihtuah zui atan...
Thil ho te te avanga i vuivaina te chungchang hi Pathian hnenah i la sawifiah a ngai ang tih hi i ring em? Eng vangin?
1 Thessalonika 5:18 ang hian Pathianin i nuna a tum chu engnge ni le?
Engtiang kawngin nge lungawina hi i nunah i zir theih ang le?
(Lettu: Msa)

No comments:
Post a Comment