Rick Warren
June 11, 2022
"Elrel leh inngaihhlut avanga engmah ti lovin, mi tinin inngaitlawm takin mahni aiin mi dang tha zawkah ruat theuh rawh se" Phil 2:3.
Midang nen inlaichinna kawnga buaina i hmachhawn zawng zawngah chapona rawngkai a tel zel ang.
'Chapona' chuan 'ka' tih a keng a. 'Sual' tih pawh hian 'kei' tih a keng leh a.
'Ka' tih hi buaipui tham a lo ni! 'Ka' duh chu 'ka' duh, tunah 'ka' duh nghal kan ti thin a, chu chu buaina hrang hrang a chawkchhuak thin a ni. A nihna takah chuan chapona hi sual tinreng bul a ni a. Chuvangin, inlaichinna reng rengah chapona inhruaitir ngai miah suh ang che.
Bible chuan, "Elrel leh inngaihhlut avanga engmah ti lovin, mi tinin inngaitlawm takin mahni aiin mi dang tha zawkah ruat theuh rawh se" (Phil 2:3) a ti.
He changah hian buaina thlen thin chapona kawng hnih a sawi a. Pakhatna chu mahni hma sial taka tumruhna a ni a, a dang leh chu awmze nei lova pawng chapona a ni. Mahni hmasialna chuan, "keimah hi a ni mai" a ti zel a, pawng chapona atthlak ve thung chuan, "ka dik ziah" a ti ve thung.
Mahni hmasialna nena mi el hi buaina hrang hrang thlentu a ni. Jakoba 3:16 chuan, "Initsikna leh inelna awmnaah chuan buaina leh thiltihsualna tinreng a awm thin" a ti a. I hnathawhna hmunah emaw, kohhranah emaw, i chhungkuaah emaw, in nupa nunah emaw, sorkarah emaw buaina i neih chuan in mahni hmasialna avang in elna leh itsikna vang a ni tih i hre thei ang.
Mawl taka chapona chu mahni dik veka inngaihna hi a ni a. Lehlin dangah chuan Philipi 2:3 hi, "Midang laka tlaktlum tumin nung suh" (TLB) tih a ni. Mi hian an nun kawng hrang hrangah hei hi an tihfo thil a ni a. Social media-ah phei chuan a chiang hle. Internet-ah mahni nih dan bak baka lan that duhna thlemna hi a ni.
Galatia-ah chuan, chapona nena nunin nghawng a neih dan kawng hrang hrang a tarlang a. A ni chuan, mahni hmasiala i nun chuan, kawng hrang hrangin a langchhuak thin tiin a sawi a ni. Thil chiang tak tak a tarlang a- mipat hmeichhiatna kawnga mahni intih bawrhbanna te, nawmsipbawlna leh ruihna ang te hi.
Mahse sualna hrang hrang tarlante kha Pathian thlahthlama, mahni duh ang anga awmna nen inzul tak an ni vek a. Galatia 5:19-21 ah chuan, "Tin, tisa thiltihte chu a lang fiah a ni; chung chu heng hi a ni: inngaihna te, bawlhhlawhna te, hurna te, milem biakna te, dawithiamna te, huatna te, inhauna te, thikna te, thinurna te, inkhinna te, awm hranna te, rin hranna te, itsikna te, zu ruihna te, zu hmun hlimna te, chutiangte chu: chung kawngah chuan tun hmaa, “Chutiang thil tih hmangte chuan Pathian ram an chang lo vang,” tia ka hrilh lawk che u ang khan ka hrilh lawk che u hi" tiin a inziak a.
Chapona chuan midang nen inzawmna kawnga buaina hrang hrang a tichhuak thin.
Inlaichinna kawngah hlim i duh chuan, rual taka inremna i neih a ngai. Chutiang i neih dawn chuan, inngaihtlawmna i neih a ngai leh a. I nunah hruaitu atan chapona nei ngai suh ang che.
Ngaihtuah zui atan...
Chaponain i nunah eng inlaichinnaah nge inrawlhna a neih? Engah te nge inngaihtlawmnain a hruai ve thung?
Engtin nge inlaichinnaah inngaihtlawmna i vawn tlat theih ang?
Engtin nge midang nen inzawmna i neih tawh chaponain a tihchhiat le? Chung siamtha leh turin vawiin hian engtin nge i tih ang?
(Lettu: Msa)

No comments:
Post a Comment