Tuesday, November 3, 2026

I NUN KEHSAWM TAWH CHU PATHIANIN A REM THAR LEH THEI

_Ruahmanna Siam Hun_

* Rick Warren 
* November 03, 2026
"Pathian hmangaihtu, ama ruat anga a kohvate tân chuan, an ṭhatna tûrin engkimin a thawhsak hlawm ṭhîn tih kan hria." Rom 8:28

Pathianin i nunah “Plan B” a nei lo.

I tihsual tawh zawng zawng kha eng pawh ni se, i nun atân Pathianin a ruahman tawh “Plan A” tho kha i la zui mêk a ni. I hringnun atân a lo tum tawh a, a tum bulpui kha a paihthla lo. Mi dangte'n nangmah an tihsualna, nangmah ngeiin mi dangte emaw nangmah ngei i tihsualna, i thil tihsual emaw, i thutlukna ṭha lo zawng zawng kha pawh a pawimawh lo. I nunna atâna Pathianin a tum chu i la hlen thei tho.

I thil tihsualte ngei pawh Pathianin a ruahman ang taka hlen chhuahna atân a hmang thei. He thutak hi i pawm chuan zalênna a pe ang che. “Ka tihsual tawh tam lutuk avângin mangang takin ka awma, thil ropui rêng rêng ka suangtuah thei tawh lo. Thil ropui tak nei tlâk ka ni lo.” Chutiang dâwt thu chu ring tawh suh. I biak Pathian chu chu âia ropui zâwk a ni!

Bible-a thu hriat lar ber pakhat, Rom 8:28-ah chuan heti hian a sawi:

“Pathian hmangaihtu, ama ruat anga a kohvate tân chuan, an ṭhatna tûrin engkimin a thawhsak hlawm ṭhîn tih kan hria."

Thil zawng zawng hi Pathian kutah a awm vek a ni—thil ṭha, thil ṭha lo, thil sual, thutlukna dik lo, sualna te pawh a ni. Amah chuan chûng zawng zawng chu a siam vek lo a; nimahsela, chûng zawng zawngte chu a la thunun reng a ni.

Pathian chuan thil zawng zawng hi ṭhatna atân a thawh tlângtir ṭhîn. Bible chuan thil zawng zawng hi ṭha vek a ni tih a sawi lo, a nih loh avângin. Khawvêlah hian sualna leh thil ṭha lo tam tak a awm si a.

Thil zawng zawng hi a ṭha vek lo. Mahse Pathianin chûng zawng zawng chu an ṭhatna turin a thawh tlan tir ṭhîn. Hemi thutiam hi mi zawng zawng tâ a ni lo; Pathian hmangaihtu leh ama ruahman ang, ama tum leh a thil tumte ang taka kohte tân chauh a ni.

I nun a tihchhiat tawh kha Pathianin a rem leh thei tawh lo tih i ngaihtuah chuan, Pathianin engkim a ti thei tih hre reng rawh. A la thawk mêk a ni, i nun atâna a ruahman tawh chu a hlen chhuak mêk a ni. A thil tum i pawm tawh loh chuan, i nun atâna a tum ropui chu pawm tûrin a la nghâk reng che a ni.

Pathian hnênah i nun i pe a nih chuan, i nun pum puia thil awm zawng zawngte chu a thil tumte khawvêlah hlen chhuahna atâna an inrem theih nân Pathian chuan a thawk ang.

Ngaihtuahzui atan

* Pathianin a ngaihdam theih loh nia i ngaih thil tihsual emaw, sualna emaw eng nge ni? Chutiang ringna chuan i nunna atâna Pathianin a tum ropui chu nei tûrin engtin nge a dâl che?

* Chûng sualna chungchângah chuan Pathian rilru tak tak chu engtin nge ni tih i ngaihtuah? Eng vângin nge?

* I nun kehsawm tawh zawng zawngte Isua hnêna pêk tih awmzia chu eng nge ni?

*I nun kehsawm tawh zawng zawngte chu Isua hnênah i pe ngâi lo a nih chuan, vawiin hian a hnêna pêk i duh em?*

Chutiang chu i duh a nih chuan, he ṭawngṭaina tawi tak hi ṭawngṭai rawh:

“Aw Pathian, min hmangaih tu, mi sual ka ni tih ka hria a, kawng tam takah ka lo tisual tawh bawk. Ka nun kehsawm tawh hi ka rem ṭha leh thei ang em tih pawh ka lo ngaihtuah fo a. Mahse, min la hmangaih reng a, ka nun engkim hi i ngaihpawimawh reng avângin ka lawm a ni.

“Ka sualna zawng zawngte min ngaidam turin ka dîl a che. Isua Krista chu i Fapa a ni tih ka ring. Ka sualna avângin a thi a, a thihna ata i kaitho leh tih pawh ka ring. Tun atang hian min Chhandamtu a ni tih ka ring a, ka Lalpa atân zui ka duh a ni. Ka nun hruai la, i duh zawng ka tih theihna tûrin min pui rawh. Isua Krista hmingin ka dîl a che. Amen.”

Vawiin hian Isua chu i Chhandamtu atâna pawm tûrin i ṭawngṭai a nih chuan, Rick Warren hnênah Rick@PastorRick.com ah email lo thawn rawh. Isua nên i nun bulṭanna tûra a ṭanpui theih nân thil pêk theih ka nei a, chu chu ka rawn thawn duh che a ni.

“I nun kehsawm tawh chu Pathianin a rem ṭha leh thei. I thil tihsualte chuan a thil tum chu an titawp thei lo.”

*[Lettu: Sangpuia]*

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...