_Hma Hun Eng Zawk Nei Turin_
- Rick Warren
- November 08, 2026
_"I hnate chu LALPA kawltîr rawh; Tichuan, i thil ruahmante chu tihnghehin a awm ang."_ (Thufingte 3:16).
Pathianin i nuna tum a neih kha a hlawhtlinna turin i ruahmanna leh Pathian ruahmanna kha an thawk dun ṭhin. Nehemia nunna hemi chungchang hi entirna ṭha tak kan hmu. Nimin khan Pathianin tihtur a pek a tihhlawhtlin theihna tura kawng hmasa pahnih kan zirho tawh a ni.
Nehemia'n ruahman a neih kawng thum kan la zir turte hi i nuna i tum i tihhlawhtlin nana ṭanpuitu ṭha tak an ni thei.
*Kawng 3-na: Hlauhna a thlen beisei rawh, mahse indantir suh.*
Lalin Nehemia'n a rawn pan tih a hmuh khan engvanga lungngai em em nge a nih a zawt a. Khang hun lai khan lal hmaa lungngai hmel put kha thil sual lian tak a ni, mahse Nehemia khan lal hnenah Jerusalem kulh chhia a din leh theih nan chawlh dil a tum a ni.
Nehemia khan hlau tak chungin thil pahnih a ti:
*A rilru put hmang a lantir.* Nehemia khan heti hian lal kha a chhang, _“Lal chu kumkhuain dam reng rawh se! Mi thlahtute thlân awmna khua chu a ramin a kawngkhârte chu a kâng vek si a, lungngai hmêl pu lo thei em ka nih ang?”_ (Nehemia 2:3). I rilru put hmang tlang taka i lantir kha ṭhan len nan a pawimawh.
*A ṭawng hmain a ṭawngṭai zuai.* _"Lal chuan ka hnênah, 'Eng nge ni i dîl?' a ti a. Chutichuan, vân Pathian hnênah ka ṭawngṭai ta a."_ (Nehemia 2:4). A chang chuan ngawi rengin, rang takin kan ṭawngṭai ṭhin, "Min pui rawh" tih angtein.
Pathian hre mite chuan engmah an hlau ngai lo tih an sawi ṭhin. Thu awihawm loh tak a ni! Huaisenna hi hlauhna neih loh hi a ni lo. Huaisenna chu hlau chung chung pawha hmalam pan ngamna hi a ni.
*Kawng 4-na: Tum bik chiang tak nei rawh.*
Nehemia khan lal hnenah dil bik a nei: _"Lal remtih zâwng a niha, i chhiahhlawh hian i mit ka lo tlun ṭhin chuan, Judai ramah mi thlahtute thlân awmna khuaah mi kaltîr la, khua chu ka va din leh ang e"_ (Nehemia 2:5).
Tum bik nei tur chuan heng zawhna pathumte hi i inzawh a ngai: Engnge nih ka duh? Engnge tih ka duh? Engnge neih ka duh?
Pathian i hriat ang tiat kha tum i nei dawn tih hria la. Pathian tiat tum neih chu Pathian chawimawina a ni a, pui tur chein amaha rinna i nei tih lantirna a ni.
*Kawng 5-na: Hun bi intuk rawh.*
Nehemia 2:6-ah chuan heti hian kan hmu, _"Tin, lal chuan ka hnênah (lalnu pawh a kiangah chuan a ṭhu a), 'Eng chen nge i thang ang a, eng tikah nge i lo haw leh ang?' a ti a. Chutichuan, lal chuan lâwm takin mi kaltîr ta a; tin, keiin hunbi ka tiam a,"_ ruahmanna ṭha tak a neih theih nan.
I tum khan hunbi a neih loh chuan tum a ni lo. "Eng anga rei nge a duh ang?" tih ngaihtuah rawh. Tichuan calendar-ah chhinchhiah rawh. Hunbi tuk awm lo hmathlir chu duhthusam awmze nei lo ang mai a ni Engmah a ni lo ang.
Naktukah chuan kawng hnuhnung 2 Jerusalem tundin lehna tura Nehemia'n a ruahman kha kan zir ang, i nunah pawh i hmang ve thei ang. Lo bawh pelh hauh suh ang che!
Ngaihtuah zui atan.
Nehemia chanchin i zir zawh hnuin engtinnge i hlauhna te thlir dan danga i thlir?
Engtinnge Pathianin i nuna ruahmanna fel tak siam tura a fuih che? Heng zawhna te hian kaihhruai che sela: Engnge nih ka duh? Engnge tih ka duh? Engnge neih ka duh?
Hunbi tuk hian hlauhna min pe fo ṭhin. Engtinnge Pathian ruahmanna mit aṭanga hunbi tuk thlirna hian i thlir dan a tihdanglam? I nuna ruahmanna i siamnaah engnge pawimawhna an neih?
*Hlauhna hmachhawn dan ṭha ber chu Pathian nen in inlaichinna chinfel kha a ni.*
Chu chu vawiin hian i nuna Isua lal tura sawmnain i tithei. He ṭawngṭaina tawite hian bul ṭan ta che:
"Lalpa, Isua ka rin phawt chuan ka sual ngaihdam a ni ang tih min tiam a. Tunah i ngaihdamna ka rawn dil a che. Misual ka ni a, nangmah chauhin thil sual ka lo tih tawh zawng zawng i thai reh thei tih ka hria.
"Isu, ka sual man tlakan turin i thi tih ka hria. Chatuana i hnena ka chen ve theihna turin thihna hnehin i tho leh a ni tih ka ring. Ka sualna pawh i la kiang a ni tih ka ring a. I bulah ka puang e. Sual hawisan a rinawm taka i hnung zui turin min pui ang che.
"Min chhandam avangin ka lawm e. Ka chhandamna ka thawh chhuah a ngaih loh avangin ka lawm a, ka phu lo chunga khawngaihna ka chunga i lantir avangin ka lawm e. Min hmangaih a, min chhandam a, i chhungkuaa min pawm avangin ka lawm e. Isua hmingin, Amen."
Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.
[Lettu: Mapuia Fanai]

No comments:
Post a Comment