_Hma Hun Êng Zawk Nei Turin_
- Rick Warren
- November 07, 2026
_"Ruahmanna kan siam thei, mahse kan ke pen erawh Lalpan a hruai ṭhin."_ (Thufingte 16:9, NLT)
I nunkawng tur atan ruahmanna i siam khan a hlawhtlinna kawngah i thawh aiin Pathian hnathawh a tam fe zawk - mahse i thawh kha a pawimawh em em a ni. Thuthlung Hluiah chuan Nehemia nunah khan a ruahmannate Pathiana innghat a nihzia entirna ṭha tak kan hmu.
Nehemia kha lal Artzerzia no hlantu a nih lai khan Jerusalem tihchhiat a nih thu leh puitu a mamawh thu a hria a. Chu chuan Nehemia rilru a luah tlat a, tichuan Jerusalem-a haw a a kulh bangte tundin leh a duh a ni. Mahse ruahmanna mumal nen lo chuan a thleng thui dawn lo tih a hria.
Kan Pathian Thu chuan heti hian a ti, _"Ruahmanna kan siam thei, mahse kan ke pen erawh Lalpan a hruai ṭhin."_ (Thufingte 16:9, NLT)
Nehemian Jerusalem tung ding leh tura ruahmanna a siam khan i nuna ruahmanna siam dan kawng sarih a kawhhmuh che. Hengte hi a hmasa pahnihte an ni:
*Kawng 1-na: Pathian duhsakna dil rawh.*
Nehemia khan Jerusalem kulh bang tungding leh turin an lal khan a kaltir nghal mai dawn lo tih a hria. Chuvang chuan Pathian duhsakna dilin a ṭawngṭai: _"Aw LALPA, khawngaih takin . . . i chhiahhlawhte ṭawngṭainaah hian i beng lo chhi ang che; tin, vawiinah hian i chhiahhlawh hi min hlawhtlintîr la, he mi mit hmuhah hian khawngaih takin zahngaihna dawntîr ang che."_(Nehemia 1:11).
Pathian duhsakna chu a khawngaihna hi a ni a, i ruahmanna a puitlin theih nan chu chu i mamawh a ni. Nehemia pawhin, "Khawngaihin mi hlawhtlintir rawh" tiin a ṭawngṭai tih chhinchhiah rawh. A chang chuan hlawhtlinna dilin i ṭawngṭai tur a ni lo emaw i ti mai thei. Mahse Pathian hnathawh beiseia hlawhtlinna dila ṭawngṭai kha a sualna a awm lo.
*Kawng 2-na: Hun remchang ruahman la, nghak rawh.*
Nehemia khan a ruahmannate lal hnena thlenna hun ṭha a neih hma khan a nghah a ngai. Tichuan ni khat chu, _"Tin, heti hi a ni a . . . Nisan thlaah uain an rawn hlui hnuin uain chu ka la a, lal chu ka pe a."_ (Nehemia 2:1). Nehemia khan inbuatsaih nan hun thawl ṭha tak a neih avangin lal hnenah a mamawh a dil tur kha a hrechiang hle.
I ruahmanna emaw, hmathlir emaw, suangtuahna emaw Pathianin a pek che chungchanga ṭawngṭaia bul i ṭan khan a chhang nghal mai lo ang che. Eng ang takin nge i lak thutak tih Pathianin a ngaichang hmasa ṭhin. Nghak chung khan i ṭawngṭaiin i ruahman pah reng dawn em? Chutiang anih chuan hun remchang a awm ve leh i lo inpeih sa diam dawn tihna a ni.
Naktukah chuan Nehemia'n a ruahmannate tihpuitlin kawnga hma a lak dan kawng thum dang kan zirho leh ang.
Ngaihtuah zui atan.
Pathian finna leh khawngaihna dil lo a ruahmanna i siam ṭum kha han ngaihtuah let teh. Engnge lo thleng?
Hun remchang i nghah lai hian rinna kawngah engtinnge ke i lo pen theih?
In chhungkuaah, hnaah, khawtlangah, khuaah, ramah engnge siamṭhat ngai le? I ruahmanna a puitlin theih nan ṭawngṭaiin Pathian finna, kawng leh duhsakna dil rawh.
[Lettu: Mapuia Fanai]
No comments:
Post a Comment