Sunday, November 1, 2026

ENG HMATHLIR NGE I TANA HLU?

_Ruahmanna Siam Hun_

- Rick Warren 
- November 1, 2026
_"Tin, intihsiaknaahte chuan a bei ṭâlh ṭâlh apiang chu engkimah an insûm ṭhîn a ni. Anni zawngin lallukhum chhe thei hmu tûrin an bei a, keini erawh chuan lallukhum chhe thei lo hmu tûrin. Chutichuan, tiam chin lam panin ka tlân ngat ngat a ni, boruak mai hnek lovin mahni ka inhnek zâwk ṭhîn a."_ (1 Kor. 9:25-26)

Hmathlir dik tak chuan i tha neih dan a thlir ṭhin. Kan vai hian kan tha milin kan che thei a ni, a dik em? Tunlaiah hian hetiang ang hmuh hi a har telh telh tawh a ni.

Mahse thil zawng zawng i ti thei lo tih i zir tawh. Thil zawng zawng tih hi a hlawkthlak chuang lo bawk; thil ṭhenkhat chu thil dang aiin a lo pawimawh zawk hle ṭhin. Pathianin thil zawng zawng ti turin a beisei lo che. Chuvangin thil zawng zawng tih theih inbeisei suh.

Fing taka thlan thiam hi a pawimawh. Engnge pawimawh a engnge pawimawh lo deuh tih i thlan thiam a ṭul, eng hmathlir nge i tana hlu a eng hmathlir nge i tan hlu lo tih pawh i thlan thiam a ngai.

Mi lar tak nih hi i lo suangtuah tawh ṭhin em? Khawvela eng emaw bera a ṭha ber nih i lo suangtuah tawh em? Mi hausa ber nih emaw pawh?

Chung suangtuahnate chu i tan thil hlu ber an ni lo, mual an liam leh mai ṭhin avangin. Rei lo te chhungin mi ropui tak i ni thei a, mit khap kar lekah engmah lo mai i ni leh nghal thei tlat. Rei lo te chhung chanchinbu kawmah i hmel a lang ang a, kar hnih-khat hnu lekah bawlhhlawh bawmah an paih leh mai mai si ang.

Lawmman hmu tura beih nasat viau hi thil atthlak tak a ni. Engvangin? A chhan chu, i hun tam tak i seng a, mahse khang i lawmman khan tun hun ngeiah emaw chhuan dangten emaw an la rawn paih bo leh mai dawn.

Lawmman emaw world record siam emaw hmingthan emaw tum ngawr ngawr suh. Chung chu hmathlir lian an ni lo!

Chatuan daih hmathlir i neih thiam a ngai. Chutiang hmathlir chuan i tha neih dan a thlir a, chhelna nei turin a pui che.

Bible chuan heti hian a ti, _"Tin, intihsiaknaahte chuan a bei ṭâlh ṭâlh apiang chu engkimah an insûm ṭhîn a ni. Anni zawngin lallukhum chhe thei hmu tûrin an bei a, keini erawh chuan lallukhum chhe thei lo hmu tûrin. Chutichuan, tiam chin lam panin ka tlân ngat ngat a ni, boruak mai hnek lovin mahni ka inhnek zâwk ṭhîn a."_ (1 Kor. 9:25-26)

I nunah Pathian hmathlir i thlan chuan chhan neia nung i lo ni. Boxer anga boruak hneka inzir i ni lo. I hnek apiang khan point hmu turin i hnek. I ti kual ve mai mai lo.

Pathian hmathlir chuan i tha neih milin a thlir ṭhin, i thlen chin tura a ruat i thlen theih nan. Chutiang anga i tlan chuan i hun rei lote pawh i khawh ral mai mai lovang.

Ngaihtuah zui atan.

Hmathlir lian ber i neih kha han ngaihtuah teh. Engtin nge i hun leh tha i pek tawh khan eng ang taka ngai pawimawh nge i nih a lantir le? 

Engtinnge i hmathlir khan chatuan thleng a hawlh phak le?

Engvangin nge i hmathlir kha thlitfim a ngaih fo?

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...