_Hma Hun Eng Zawk Nei Turin_
- Rick Warren
- November 15, 2026
_"Min dotute tam tak awm mahse hna ropui leh hlu tak thawhna turin hun remchang duhawm tak a inhawng reng."_ (1 Kor. 16:9, GNT)
Kan nungchang teh dan ṭha berte zinga mi chu dodalna kan hmachhawn dan hi a ni. Dodalna hi i nuna Pathian duhdante zinga mi a ni: i hmalama remchanna lo thleng tur atan a buatsaih tlat che.
Bible chuan heti hian a ti, _"Min dotute tam tak awm mahse hna ropui leh hlu tak thawhna turin hun remchang duhawm tak a inhawng reng."_ (1 Kor. 16:9, GNT)
Eng emaw i tih dawn khan mi zawng zawngin an duh vek dawn lo. I hmathlir emaw i nuna Pathianin tihtur a dah emaw i tihpuitlin dawnin tu emaw tal chuan an sawisel ngei ngei dawn. "Aih" tih hi an thumal ngainatzawng tak a ni a, "I ti thei lo vang" tih hi an ṭawngkam duhzawng tak a ni.
Pathian duhzawng i tih lohna tura miin an dal ṭhin dan che kawng khat chu innuihsawh hi a ni. Nehemia bung 4-ah chuan miin nuihsawhna hmanga chawlhtir che an tum dan kawng thum kan hmu.
*Miin i nungchang leh nihna hmangin an bei ang che.* Nehemia 4:1-2 ah chuan Nehemia sawiseltute zinga mi Sanbalata khan kulh bangte siamṭhat hna an thawk a ni tih a lo hria a. _"A thinrim a, nasa takin a thin a ur a, Judate a nuihsawh a . . . 'Heng Judaho mi khawngaihthlak tak hian eng emaw an tih le?'" tiin a inhrosa a ni (Nehemia 4:1-2, ISV).
Mi tu emawin a beih che chuan ngaihtuahna fim tak ni lovin an che buan buan ṭhin. An beih tawhte chuan ngaihtuahna fim tak an hmang tawh ngai lo. Mi an thinrim emaw an hlauhthawn emaw chuan hminga inkoh emaw dawt sawi emaw an ching ṭhin. An ṭawngkamin mi a tina thei, mahse chung chuan i nihna emaw i dam chhan emaw an tidanglam thei lo.
*Miin thil ṭha lo tih tum angin an puh ang che.* Nehemia sawiseltute khan an thiltih tumah khan zawhna an nei. Sanbalata heti hian a ti, _“Hêng Juda mi chhiaṭhahote hian eng nge maw an tih le? Khawpui sak ṭhat an tum em ni vei le?"_ (Nehemia 4:2). Sanbalata khan an ropuina tur leh mahni hma an sial avang maia Jerusalem kulh bang sa ṭha leh niin a ngai.
Thudik chu, midangte thiltih chhan dik tak hi a vaiin i hriatsak thei lo. Phurna chi hrang hrang inpawlh kan nei vek a. Thil kan tiha min tiphurtu zawng zawngte hi kan hre vek thei bik hauh lo! Pathian chauhin "mi zawng zawng thinlung" a hria (1 Lalte 8:39).
*Miin i hlawhchham tur thu an sawi lawk ang.* Mi tam takin Nehemia kha a hlawhchham dawn niin an sawi. Kulh bang sa ṭha an nih avang khan mi pakhat chuan heti hian a t, _"Sihal pawh han lâwn sela an lung kulh chu a tichim mai ang chu"_ (Nehemia 4:3).
Tum i nei emaw, i hmathlir i puang emaw, eizawnna bul i ṭan emaw pawh nise mi tam tak chuan i hlawhchham tur thu an sawi lawk ang. Mahse dam taka chhang turin duhthlanna i nei reng. Karleh lamah chuan chutiang anga i chhan theih dan tur chu kan zir ang.
Ngaihtuah zui atan.
Tunah khan engtinnge i nunah dodalna leh hamṭhatna i tawn? Dodalna chu eng ang chiahin nge a rawn lan chhuah?
Tu emaw dodalna tawk mek kha han ngaihtuah teh. Tunkar chhung hian engtinnge i fuih theih ang?
Mite hlawhchhamna tur ni lo an hlawhtlinna tur engtinnge i lo sawi lawk ang?
[Lettu: Mapuia Fanai]
No comments:
Post a Comment