Friday, October 2, 2026

HMALAM PAN ZEL TURA CHAKNA

_Hun Harsa Atana Ruahmanna_

By Rick Warren
October 02, 2026
“ _… vuak thlûkin kan awm a; nimahsela, tihboralin kan awm si lo_ .” II Korinth 4:9

Intlansiaknaah i lo tel ve tawh a nih ngai chuan in tlan lai chuan mipui lam chuan, “Tlan zel rawh!” tia an fuihna che chu i lo hre tawh ngei ang. Chu tho chu hringnun intlansiakna kawnga rilru, thinlung leh thlarau chau ngawih ngawih tawhte tana thurawn duhawm tak chu a ni thei ang: Tlan zel rawh!

Pathian Thu chuan chutiang harsatna kara kal hram hram ṭhinte chanchin chu a lo sawi tawh ṭhin, Isua leh Paula te pawh tiamin. 

Isua khan dodalna a hmachhawn ngar ngar a. Sakhua leh ram hruaitu te khan tihhnual an tum ngar ngar thung a nih kha. Mite zirtir a, ṭanpui ngaite a ṭanpui tawh lohna tur khan an bei ṭhin. Eng emawti hun lai phei chuan Lal Heroda khan tihhlum a tum a ni tiin an vau hial a nih kha. 

Mahse Isua chuan hetiang hian a sawi, “ _Ngai rawh, vawiin leh naktûkah hian ramhuaite ka hnawt chhuakin nâte pawh ka tidam ang a, ni thum ni-ah ka zo vang, a ti,’ tiin.  Eng pawh ni se, vawiinah nên, naktûkah nên, a tûk leh thlengin ka ti_ ,” tiin [Luka 13: 32-33]

Paula pawh kha a rawngbawlna tiṭhuanawp thei tur thil vawi tam tak a hmachhawn bawk. Living Bible thu dahrem chu hetiang deuh hi a ni, “ _Kil hrang hrang atangin buaina chuan min nawr sek sek a, mahse min tichhiain min tikeh lo. Min tihrilhhai hle fo mai, a chhan chu thil thlen dan leh an thlen chhan chu kan hriat loh fo avangin, mahse kan tlawmsanin kan beidawng ngai lo. Mite chuan min pel a, mahse Pathian chuan min kalsan ngai lo. Min titlu a, mahse kan tho leh a, hmalam kan pan zel ta zawk a_ ,” tiin [II Korinth 4: 8-9]. 

Thil awmzia chu i hre thiam ang, a chhan chu buaina chuan kawng hrang hrangin a tuam che a ni. I chauvin i hah hle a, a tawp thleng lo mai dawn anga inngaih changte pawh i nei bawk ang. 

Engtin nge hmalam i pan zel ang? Isua leh Paula te anga hmalam pan zel tura chakna i lakna hmun tur chu Pathian a ni e. 

Bible lehlin pakhat The Message-ah chuan hetiang hian kan hmu, “ _Hmalam kan pan hram hram theihna chhan chu Pathian thiltihtheihna chu a ni, ani chuan min tlan hmasain hna thianghlim thawk tur chuan min ko bawk a,_ ” tiin [II Timothea 1: 8-9]

Pathian chuan i hmachhawp leh a duhzawngte chu nangma theihna hmanga thawk turin a beisei lo che. Pakhatnaah chuan a chhandam che a, nitin hna thawk turin chakna a pe che. Hmalam pan zel tur leh i hmabak thawk zo tura i mamawh zawng chu a pe ang che. 

Ngaihtuah zui atan. 

• Pathianin ti tura a kohna che thawk thei tur chuan eng ang hlauhna, dona leh sawiselna nge i lo hmachhawn ve tawh ṭhin? 

• Vawiin hian “kil tin aṭanga dotu” neiin vawiin hian i inhria em? 

• Harsatna an tawh changin mite chuan Pathian lam ni lo khawi lam nge an hawi ṭhin? Chu hun harsaah chuan Pathian thiltihtheihna chuan engtin nge a lo ṭanpui tawh che? 

[Lettu: Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...