Sunday, September 6, 2026

PATHIAN SUM PEIPUNNA CHU CHATUAN DAIH A NI

_Sum Enkawl Dan_

- Rick Warren 
- September 06, 2026
_"Thil ṭha tih kawngah chuan ṭhahnem ngaiin a mamawhte tan thil phal bawk se, midangte tan luan chhuah inpeih rengin. Hetiang anga an tih chuan an hma hun atan lungphum nghet tak phumin nun dik tak an hmang chho thei ang."_ (1 Tim. 6:18-19, NLT)

I sum kha thil ṭha tih nana i hman apiangin vanramah ro i khawl zel a, vanrama i khawl chu chatuanin i la hlimpui ang.

1 Timothea 6:18-19 ah chuan heti hian kan hmu, _"Thil ṭha tih kawngah chuan ṭhahnem ngaiin a mamawhte tan thil phal bawk se, midangte tan luan chhuah inpeih rengin. Hetiang anga an tih chuan an hma hun atan lungphum nghet tak phumin nun dik tak an hmang chho thei ang."_ (NLT)
 
Anih chuan vanrama ro khawl khawm dan ṭha ber chu engnge ni ta ang le? Sum lama fuihna thu pe ṭhintu chuan i artui neih zawng zawng kha bawm khata khung khawm vek turin a ti ngai lo vang che. I sum neih te kha hmun ṭul hrang hranga hman tur atan dah turin a ti zawk ang che.

Vawiin leh naktukah hian chatuan atana i khawl theih tur thawhlawm bawm nga kan zir ang. Hengte hi finfiah vek an ni a. Chhui zui theih an ni a, venhim an ni bawk. Hriat chian sa an ni a, hmun tam taka sem theih an ni.

*Pathiana ṭhanna thawhlawm bawm.* Hei hi eng emawa i hlep, i nungchang ṭhan lentirtu a ni. Thufingte 10:16-ah chuan heti hian kan hmu, _"Mi fel thawh rimna chuan nunna a thlen a, mi suaksual hlâwkna chuan sualna."_ 

I sum kha thlarau, thiamna leh rilru ṭhan lenna atana i hman chuan i nun kha a ṭhang lian zel ang. I sum kha i thiam thil ṭhan lentir nan i hman a, i lo puitlinin chatuan atan i khawl khawm a ni.

*Pathian nena sumbawm inṭawm.* Pathian kohhrante fuih nan leh i ringtupuite nena inlaichinna siam nana i sum i hman apiangin hei hi a thleng ang. Rom 12:13-ah chuan heti hian kan hmu, _"Pathian mite puih ngaia an awm chuan pui turin inring rawh. Midangte dawngsawng turin inpeih reng la."_ (NLT)

Engvangin nge Pathianin i ringtupuite chunga hmangaihna lantir nan i sum hmang tura a tih che? Chhan pathum a awm: Pathian chhungte zinga mi i ni tih a lantir. Inpumkhatna a thlen. Ring lo mite hmuha kan rinna lantirna a  ni.

*Pathian rawngbawlna bawm a ni.* I sum midangte rawngbawlsak nana i hman khan chatuan atan i khawl a ni. Pathianin i sum la chhuaka midangte, ṭanpui ngai i puih a duh a ni.

Thufingte 11:24-ah chuan heti hian kan hmu, _"Sem darh chu pun lehzualna a ni a, mamawh tâwk aliam kawmpui chu tlâkranna a ni."_ Midangte i ṭanpui nasat poh leh Pathian malsawmna i dawng tam dawn tihna a ni. Engvangin maw? Pathian chu petu Pathian a ni tlat. Thilphak tak a ni a, nang pawh amah ang i nih a duh a ni.

I nunchangah, ringtupuite leh a mamawhtute chunga i inhuam tam poh leh Pathian i ang tulh tulh ang.

Ngaihtuah zui atan.

I nunchang tichhe thei thilah i sum i khawh ral tawh em? Engtin nge chutiang ni lo va i nungchang siamṭhatu zawk atan i hman theih ang?

Engvangin nge midangte i ṭanpuina kaltlangin Pathian chhungte zinga mi i ni tih i lantir a pawimawh?

Thil phal tura fuih phurtu che engnge? Chu chuan engtinnge midangte tana i inphalna a nghawng?

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...