Saturday, August 1, 2026

BERAMPU ṬHA I MAMAWH

_Pathian Ṭhatna Hnuaia Len_

- Rick Warren
- August 1, 2026
_"Nun hausa leh tlai tak an neihna tura lokal ka ni. Berampu ṭha ka ni a. Berampu ṭha chuan a beramte tan a nun a hlan ṭhin."_ (Johana 10:10-11, NLT)

Beramte hi mahni inveng thiam lo an ni a, chuvang chuan beramputen an beramte ven nan hmanrua eng emaw an pai ṭhin. Venna thir tiang a nei a, hmawlh sei tak a hmawra thir kawm nei, beramte chhanchhuahna tur a keng bawk ṭhin.

Beram bo anga venhim ngai leh kawng kawhhmuh ngai kan ni, chuvang chuan kan Berampu Ṭha ni turin khawvelah Isua a lokal a ni. Heti hian amah ngeiin a sawi, _"Nun hausa leh tlai tak an neihna tura lokal ka ni. Berampu ṭha ka ni a. Berampu ṭha chuan a beramte tan a nun a hlan ṭhin."_ (Johana 10:10-11, NLT)

Berampuin a hmanraw neih angte a beram kawng kawhhmuh nan leh venhim nan a hmang angin Pathianin kawng kawhhmuh che a venhim che a duh. Hetiang hian kawng hnihin a ti ṭhin:

*Amah i zui chuan Isuan kawng dikah a hruai ang che.*
I hmahruai turin kaihruaitu, berampu i mamawh. Isua, Berampu Ṭha, hmalam aṭanga hruaitu tur che i mamawh. Hei hi cowboy-te, hnung lam aṭanga an bawng chhawm ṭhinte nen a dang hlak. Isuan hnung lam aṭanga a nawr ngai lovang che. I hmaah kalin, "Ka tih dan en la. Ka kalna en rawh" tiin a sawi.

Johana 10:4-ah chuan heti hian a ti, _"A beramte a hruai chhuah vek hnu chuan an hmaah a kal a, a aw an hriat avangin ani chu an zui ta a"_ (CEV).

*I natnate a hnenah i thlen chuan Isuan a lo khawngaih ang che.*
A tel lo chuan engmah kan ni lo tih a hriat avangin  Isuan min khawngaih a ni. Matthaia 9:36-ah chuan heti hian a ti, _"Chutichuan, mipuite chu a hmuhin, vêngtu nei lo berâmte anga hrehawm leh darha an awm avângin a khawngaih ta êm êm a."_  A ṭawng ṭobul aṭanga kan zir chuan helaia a sawi tum tak chu Isua kha mipuite avangin a rilru a na a, ṭanpui a duh a ni tih a ni.

Chutiang chiah chuan Isua hnenah i natnate i thlen chuan a tihnual lovang che; a dawm kang zawk ang che. A tibuai lo che anga, a tidam zawk ang che.

Pathian ṭhatna avangin Isuan a hruaiin a venghim che. Isua hi kan Berampu Ṭha, "rawngbawlsak tur ni lova rawngbawl tura lokal, mi tam tak damna tura a nunna hlantu a ni" (Matthaia 20:28).

Naktukah chuan Pathian ṭhatna hlawkzia kawng thum kan zir ang: a hruai dan, ven dan leh chhandam dan.

Ngaihtuah zui atan.

Engtik laiin Pathianin i hma a hruai ni a i hriat? Chu chuan engtinnge rinna kawngah a ṭhantir che?

Engtinnge i mit hmuhah Isua khawngaihnain i nunah leh midangte nunah damna a thlen?

Eng kawngah nge Isuan a hruai che: tunah? I hnaah? In chhungkuaah? In khawtlangah? In kohhranah? In inlaichinnaah?

*"Lalpa chu min vengtu, Berampu a ni" i ti thei em?*
Pathian hmangaihna tawp ngai lo leh thutiam tihchhiat theih lohah inhung i duh chuan Berampu Ṭha hruaina hnuaiah inpe rawh.

Heti hian ṭawngṭai la: "Lalpa, misual ka ni tih ka hria a, i ngaihdamna ka rawn dil e. Isua Krista hi u Fapa a ni tih ka ring a. Ka sual avangin a thi a nangin i kai tho leh a ni tih ka ring. Ka Chhandamtuan pawma ka Lal atana zui ka duh e. Isu, ka nunah lokal la ka ngaih pawimawh thil te, ngaihhlut thilte leh ka hawizawng rawn thlak la. I duh ang miah min siam rawh. Isua hmingin, Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...