_Pathian Ṭhatna Hnuaia Chên_
- Rick Warren
- July 04, 2026
_"Pathian pek che ni lo engnge i neih? I neih zawng zawng kha Pathian hnen aṭanga i dawn anih si chuan engvangin nge thilpek i dawn ni lo ang ziazanga i uanpui ni?"_ (1 Kor. 4:7, NLT)
Pathian ṭhatnaa rinna nghahnain harsatnate hmachhawn kawnga a puih thu che kan zir tawh kha.
Mahse thil ṭha i hmuhte kha Pathian hnen aṭangin ni lova i thawh chhuah anga i ngaih rual chiah khan engnge lo thleng?
Luka bung 12-naah chuan Isuan mi hausa hlawhtling tak, mahse a neihnunna chungchangah Pathian zahna pe miah lo chungchang heti hian a sawi, _"Mi â, zâninah hian i thlarau an lâksak dâwn che a ni; i thil deh chhuahte kha tu ta nge ni ta ang le?"_ (Luka 12:20).
Zilhna khal tak a ni!
Chapona leh lawm lohna rilru hi van atan Setana pet chhuaktu sual a ni a, sual zawng zawng bul a ni. Pathian chunga lawmna rilru i put loh rual chiah khan buainaah i inhnuk lut a ni: _"Pathian hre siin Pathian angin an chawimawi lo va; lâwm thu pawh an sawi hek lo; thil lawilo an ngaihtuah ta zâwk a, an thinlung â chu a lo thim ta a."_ (Rom 1:21).
Mahni indah sang ṭhinho mi ṭhenkhatte harsatna chu a tawpah anmahni chibai an inbuk ṭhin hi a ni. "Han ngaihtuah teh, he sumdawnna hi ka kut ngeia ka ṭan leh tihlen a ni asin" an ti rilru ṭhin. Mahse tunge kut pe che? "He sumdawnna/eizawnna lian tak hi keimah ngeiin ka ruahman vek a ni" an ti mai thei. Mahse tunge rilru pe che? "Vawiin thleng tur hian ka biangah thlan tui tam tak a luang asin" an ti leh ang. Mahse tunge thawkrim thei tura chakna pe che?
Bible chuan heti hian a sawi, _"Pathian pek che ni lo engnge i neih? I neih zawng zawng kha Pathian hnen aṭanga i dawn anih si chuan engvangin nge thilpek i dawn ni lo ang ziazanga i uanpui ni?"_ (1 Kor. 4:7, NLT)
Theihna i neih zawng zawng - hmuh theihna, hriat theihna, ei theihna, zalenna leh ngaihtuahna thlengin - Pathian hnena mi a ni. Pathian ṭhatna ni suh sela chuan i thaw leh tawh lore e d vvf vvv ang.
Lawm lohna humi Pathian awm loh rinna bulpui a ni; i lawm loh khan Pathian thiltih i hnawla i ring lo zui bawk ṭhin. Chu chu Pathian awm loh rinna bul a ni.
Thudik chu hei hi a ni, i hawina apiangah Pathian awmzia i hmu thei: _"Khawvel siamtirh ata mihringten lei leh van an hmu a. A thilsiamte kaltlangin Pathian nihna hmuh theih loh chu a rawn lang fiah - chatuana a thiltihtheihna leh chatuan mi a nihna. Chuvang chuan Pathian hriat lohna tur chhuanlam an nei thei lovang."_ (Rom 1:20, NLT)
Pathian ṭhatna i rinhlelh ṭan dawn chuan pawnah chhuak la han hawi vel teh. A thilsiamte kaltlangin Pathian ṭhatna i hmu thei ang!
Ngaihtuah zui atan.
Ruah leh thingte piah lama thil awm i thlir khan Pathian thilsiamah eng angin nge Pathian ṭhatna i hmuh?
I nuna thil ṭha engte nge Pathian hnena mi ni lova nangmah aṭanga chhuak ang maia i ngaih?
Engtinnge Pathian zia hriatthiam dik loin i thil thlir dan a tihkawkalh? Rom 1:21-a kan hmuh ang hian engtinnge i thinlung 'â a tihthim?'
[Lettu: Mapuia Fanai]
No comments:
Post a Comment