_Malsawmna Nih Theihna Kawng_
- Rick Warren
- July 1, 2026
_"Pathian ngaihsak turin insawizawi rawh," (I Timothea 4:7)._
Pathianin a hman che i duh chuan, i rinna tichak thei turin thil chîn ṭhan nei rawh.
Bible chuan, "Pathian ngaihsak turin insawizawi rawh,"(I Timothea 4:7) a ti.
Zing thawh ruala, "Vawiinah exercise ka la dawn!" ti thei mi engzat nge awm ang? Kei chu ka ni lo chiang. Mahse taksa leh thlarau lam insawizawi kan mamawh tih erawh ka hria a. Insawizawi chungchangah hei pawh hi ka hria: taksa lam emaw, thlarau lam emaw pawh ni se, minute tina ka insawizawiah hian a tam thei ang bera hlawkna neih ka duh.
Thlarau lam insawizawi aṭanga hlawkna tam ber i hmuh theih nan, i rinna tihchakna tur thlarau lam chin ṭhan thil pali ti ṭhin rawh.
*Bible zir rawh.*
Bible hi nangmah ngeiin i zir a ngai. Mi dang Pathian Thu zirah i innghat ngawt thei lo. Nangmah ngeiin hun i hman a ngai.
Bible chuan, "Pathian Lehkha Thu zawng zawng hi Pathian thawk khuma pek a ni a, zirtir kawngah te, thiam loh chantir kawngah te, zilh kawngah te, felna zirtir kawngah te sawt bawk a ni. Pathian mi chu hna ṭha tinreng thawk tura kim taka inthuamin a famkim theih nan," (2 Timothea 3:16-17) a ti.
Pathian Thu hi nun atana inbuatsaihna lehkhabu a ni. Pathianin a hman theih tura inbuatsaih i duh chuan, Bible i zir ngei ngei a ngai a ni.
*Thlarau lama i ṭhanlen theih nan lehkhabu ṭha chhiar rawh.*
Thufingte 19:8 chuan, "Nangmah inṭanpui la, i theihtawpin zir rawh (GNT). a ti. Chu chu Pathian Thu leh amah rinawm taka zuitute hnen aṭanga zirna a kawk - i rilru chawk thova, cho phur a, i rinna tichak thei lehkhabute a ni.
*I testimony ziak chhuak rawh.*
Bible chuan I Petera 3:15-ah, "In beisei chhan zawt apiang che u chhâng turin inpeihsa fo vang che u," a ti. Mi dangin Bible an zirsak thei lo che ang bawkin, mi dangin i chanchin an sawisak thei lo che. Testimony-ah hian bung 4 a awm a; Krista i hriat hma a i nun dan, Krista i mamawh tih i hriat chhuah dan, Krista hnena i nun i hlan dan leh tuna i nun awm dan.
*Pâwl te zawk zawm rawh.*
"Infuih tawnin, intisawt tawn ṭheuh rawh u, in tih reng ṭhin ang hian," (I Thessalonika 5:11). I rinna tihchakna kawngah, i rin ngam leh i hriatchian te nena inhmuh khawm fo tluk a awm lo. Pâwl te zawk zawm i la neih loh chuan, nun i ṭawmpui theih tur leh rinna a i ṭhan chhoh zelna kawnga ṭanpui thei tur che mi zawng rawh.
Heng thil chin ṭhan palite hian thlarau lama fit reng thei turin a pui che ang a, Pathianin a hman theih turin a buatsaih ang che. Heng zinga khawi ber hi nge tunkara i zawm ṭan ang?
Ngaihtuah zui atan
I testimony ziah chhuah hian engtin nge a puih che i rin?
Nang leh pâwl te zawk te hian rinna a in ṭhan len theih nan engtin nge in inpuih tawn theih ang?
Kristian lehkhabu hi tui tak leh ngaihnawm taka i chhiar theih nan engtin nge i ni tin hun hman danah i telh theih ang?
[ *Lettu:Marova Punte* ]
No comments:
Post a Comment