_Malsawmna Nih Theihna Kawng_
- Rick Warren
- May 7, 2026
_"Tin, ka Pathian chuan Krista Isuaa a ropuina ngahzia ang zêlin, in tlâkchhamna tinrêng pawh a phuhrûksak ang che u."_ (Philippi 4:19)
Khawiah nge ngaihngam taka awm theihna i hmuh?
I pawisa dahna (bank account) emaw, i hna emaw, i sum peipunnaah emaw i rinna i nghah chuan rilru hahna mai a thlen ang che. Engvangin maw? A chhan chu heng zawng zawng hi chan theih thil a ni tlat.
Hahdamna leh himna, tumahin an laksak theih loh che i mamawh: chu chu Pathian a ni! Pathian malsawmna dawn i duh chuan mahni hausakna ni lovin Pathian hausaknaa innghah i zir a ngai.
Bible-in hausakna chungchang heti hian a sawi:
_"Tin, ka Pathian chuan Krista Isuaa a ropuina ngahzia ang zêlin, in tlâkchhamna tinrêng pawh a phuhrûksak ang che u."_ (Philippi 4:19)
I hna kha sum i hmuhna hnar chu a nei ngei ang, mahse i inhumhimna/hahdamna atan hmang suh. I hna kha sum hmuhna kawng a ni a, mahse Pathian hi a bul chu a ni. Hei hi i hriatthiam chuan rilru hahna tur i nei tlem sawt ang. Ka'n sawi leh ang e: I hna kha sum hmuhna kawng a ni a, mahse Pathian hi a lo chhuahna hnar a ni.
In tuidehnaa tui herhhawna kha i herh zawnga tui a lo chhuah loh chuan engtinnge i tih ang? "Khawvela tui awm zawng zawng a zo ta! Khawvelah tui pakhatmah a awm tawh lo a nih dawn hi!" i ti ang em?
Ti hauh lovang. Tui hnar kha i harsatna a ni lo tih i hria a. Khawvelah tui tam tak a la awm. I harsatna zawk chu tuizem aṭanga a lo chhuahna kawng zawk kha a ni; engin emaw a lo hnawh emaw thil dang vang emaw a ni ang.
Chutiang chiah chu hringnun pawh hi a ni. Kawng eng emaw a pin khan a herh chhuahna a dal ta ṭhin a, a hnar aṭangin a tawp vek tihna a ni lo. Pathianin awlsam takin kawng dang a hawng thei.
Pathian hi i theihna leh chaknain a dal ve ngai lo. I hnaah khan i theihnain a dal thei zawk che. Mahse i hna kha i mamawh zawng zawng petu che a ni lo. I hna kha Pathianin i mamawh a pekna che kalkawng chauh a ni.
I hna/eizawnna kha sum leh paia innghahna ber/himna atana i hman chuan i damchhungin hlauhthawnna nen i nung ang. Pathian hi engkim i hmuhna hnar a ni tih i hriatthiam a ngai. I mamawh engnge ni tih a hria tih leh a pek dan che a hria a ni tih ringin amahah innghat rawh.
Kan hnate hi chu kan chan leh mai thei. Bank account-a kan sum te hi a pung a, a kam leh duak a. Ei leh bar dinhmun a su reng bawk. Stock market a che reng thei bawk. Mahse a pawi lo!
Engpawh thleng se Pathian hausakna hi himna atan i hmang thei.
Ngaihtuah zui atan.
I nunah Pathianin eng hna nge thawk tura i nghah reng? Nghah hun a ngaih lai hi engtin nge i lo dawn sawn?
Pathian hun ruat i nghah a ngaih hun kha han ngaihtuah let teh. Chung hunah chuan engtin nge i nunah hna a thawh?
Hmanhmawh hi awlsam tak a ni - mahse Pathian malsawmna hi kan nghah zet hnuah a lo thleng fo. Dawhtheihna leh rin ngamna i neih theih nan engtinnge i insiam rem ang?
[Lettu: Mapuia Fanai]
No comments:
Post a Comment