_Hlim reng theihna dan_
- Rick Warren
- May 02, 2026
_"Tin, unaute u, ka chunga thil lo thlengte kha Chanchin Tha tihdarhna tur a lo ni ta hlauh zawk tih in hriat ka duh a ni."_ (Philippi 1:12)
Hlim i duh chuan harsatna zawng zawng hi Pathian tarmit vuah chunga i thlir a ngai. Mi hlim thei takte hi chuan thlirna zau tak an nei thin. Pathianin a hmuh angin thil lian zawk leh zau zawk an thlir pha thin. Pathian tarmit vuaha thil i thlir loh chuan i beidawng a, i hnual a, i hlim lo thin.
I nuna thil thleng chu engpawh - a tha, a chhia, duhawm loh pawh nise - Pathianin tum neiin hna a thawk reng a ni. Paula khan hei hi a hrechiang hle. Philippi 1:12-ah chuan heti hian a ti, _"Tin, unaute u, ka chunga thil lo thlengte kha Chanchin Tha tihdarhna tur a lo ni ta hlauh zawk tih in hriat ka duh a ni."_
Damaska khaw kianga ringtu a lo nih tak hnu khan Paula khan hmathlir lian tak a nei - a hun laia khawvel awptu sorkar lian ber inbunna Rom khawpuiah khan thuhril a duh tlat. A hun lai khawvela khawpui ropui bera thusawi kha a hmathlir a ni.
Mahse Pathianin tum dang a nei tlat. Rom khawpuia thuhril tura tirh aiin lal Nero-a mi tang nihtir kha a tum a ni zawk. Khang hun lai khan Nero-a kha Kaisara a ni- roreltu sual leh hlemhle tak a ni.
Paula tan ina a tan lai khan ni tin lal tan in vengtu hrang hrangin a in chhawkin an veng ṭhin a. Paula chuan vengtu sang eng emaw zat hnenah thu hril theihna remchang a nei tihna a nih chu. Tunge mi tang bera chu ni ta ang? Tunge tan ina thu ngaithla duhtu chu?
Hei hi Paula ruahman dan a ni bik lo; mahse, Pathian remruat a lo ni reng zawk a, rah duhawm tak a chhuah a ni. A rah chhuah pahnih lang chiang em em kan hmu a.
A hmasaah chuan, Rom khuaa Paula thuhril avangin Philippi khuaa tan in vengtute chenna hmun zawng zawngah chanchin ṭha tihdarhin a awm a, Kaisara chhungkaw zinga mi ṭhenkhatte pawh ringtu an lo nih ve phah a ni.
A dawtah chuan Paula te ang chu awm hle hle tir an harsa em em a. Tan inah chuan awm hle hle tura tih luih a ni a, chuvang chuan Thuthlung thar bu tam tak a ziak theih phah, Ephesi te, Philippi te, Kolossa te, leh Philemona bu te hian mi tam tak hnenah kum tam tak chhung chu Lal Isua chanchin an puangchhuak tawh a ni.
Paula chuan Pathianin ruahmanna lian zawk a nei tih a hria a. A harsatnate kaltlanga Pathian hnathawh chu a ring tlat a, Paula chu a hlim thei a ni.
Nangmah hnukhniam theitu harsatna i neih hun apiangin Paula tih ang hian han ti ve la: Pathian thlirna aṭangin han thlir ve la. Hetah hian Pathianin engnge a tih? A tum lian zawk engnge ni? Thlirna zau zawk engnge ni ang? tiin han zawt la. Chuti chuan, rinnain harsatna chu i hmachhawn thei tawh ang.
Ngaihtuah zui atan.
Buaina, nangmah tibeidawngtu che kha han ngaihtuah teh. Pathial thlirna zau zawk aṭangin han thlir ta la, kha nangmah tibeidawngtu che kha eng angin nge i hmuh?
Engvangin nge khang nangmah tibuaitu hrasatnate kha Pathianin i tawn a phal a i rin?
I hun kal tawhah, harsatna i tawh laia Pathian hnathawhte engtin nge i lo hmuh ve ṭhin?
[Lettu: Mapuia Fanai]
No comments:
Post a Comment