_Hlim Reng Theihna Dan_
By Rick Warren
May 1, 2026
“Nangmahnia thil ṭha ti ṭantu khân Isua Krista ni thlengin a tifamkim zêl dawn, chu ngei chu ka ring tlat si a.” [Philippi 1:6]
Ka fate an la tet deuh lai khan ka lem an ziah chu min hmuhtir a, “Ka pa, engnge a an?” an ti ṭhin a. Kei chuan, “A mawi lutuk! Duhthusam a nih kha,” ka lo ti ṭhin. Duhthusam a ni ka tih chuan lemziak thiam Picasso-a kut chhuak ang vel a ni e ka tihna a ni lo. An lemziak mawi ka tih chhan chu anmahni ang rual tan chuan chung an thil ziahte chu duhthusam an ni e ka tihna mai an ni.
Chutiang chiah chuan Pathian chuan amah hmangaih tura i puitlin tawk tawh hun kher a nghak lo. Pathian chuan amah hmangaih tura i thianghlim tawk hun emaw i ngheh tawk tawh hun a nghak lo che.
Chutiang chuan midang bulah pawh i tih a ngai lo. Anmahni chu i hmangaih mai a ngai, an nihna ang angin. Dawhthei taka anmahni i lo nghah chu a ngai.
Tirhkoh Paula kha a entirna ṭha tak chu a ni: “Nangmahnia thil ṭha ti ṭantu khân Isua Krista ni thlengin a tifamkim zêl dawn, chu ngei chu ka ring tlat si a,” tiin a sawi [Philipi 1:6]. Paula khan Pathian chuan hna ṭha, Philipi kohhran mite tan khan rei tak a lo thawk tawh tih a hria a, dawhthei takin an hmasawn dan kha a lo thlirpui a ni.
Midangte hmasawnna dawhthei taka lo thlirpui hi hlimna bul pakhat a ni. Eng vangin? Mite nena in inlaichinna kawngah inlaichinna pangngai ni lova duhthusam chauh i beisei ngar ngar chuan engtik lai mahin i hlim tak tak ngai lo vang.
Hlim theihna kawng pakhat chu hei hi a ni: Inlaichinna hlimawm zawk leh hrisel zawk i duh a nih chuan mite chuan engtia thui nge an lo kal tawh tih chu engtia thui nge an la hmabak tih ai chuan lo thlir ang che. Mite hmasawnna chu dawhthei takin lo thlir ang che.
Mite fel lohna hmu lova an thil tih ṭha hmuhpui tur chuan dawhtheihna i mamawh. Dawhtheihna kalhmang pawimawh tak chu hmangaihna a ni.
Paula chuan a chang dawt leh chiahah chuan, “Nangmahni zawng zawng lamah chutiang rilru put chu keia tan chuan a awm reng a ni, ka thinlungah ka vawn che u avangin; ka kawlbunnaahte, Chanchin ṭha thiamna thu ka sawinaah leh ka tihnghehnaah te pawh, in zain khawngaihna chu ṭawmpuitute in ni si a,” tiin a sawi [Philipi 1: 7]
“Ka thinlungah”: Kan thinlungah midangte hmun pawimawh chantir chu hlim theihna kawng pawimawh a ni. Midangte i hmangaih a, hmalam pan tura i ṭanpui a nih chuan inlaichinna hrisel leh hlimawm i lo nei thei ang.
Ngaihtuah zui tan.
I ṭhianten i hlawhtlinna an lo lawmpui che chuan engtin nge a khawih let che?
Pathian hmangaihna i hriat rengna chuan midang hmangaihna kawngah engtin nge a ṭanpui che?
Mihring dawhtheihna tlachham tak nia i inhriat chuan engtin nge thlarau rahte chu i nunah i ṭhanlentir theih ang?
Pathian chhandamna thutiamah chuan i innghat thei ang
Eng ang pawhin lo awm tawhin khawi hmunah pawh lo awm tawh la, Pathian chatuan chhungte chuan nghaktu leh thlir rengtu i nei e. Sawmna chu zau taka hawn a ni e. Ring la chang mai rawh.
I inpeih tawh em? He ṭawngṭaina hmang hian bul ṭan ang che: “Lalpa duh tak, ka thih hun chuan ka nun chungchang ka la sawi dawn tih ka hria. I lakah thil sual ka lo ti tawh tih ka hria a, keima ruahmanna nangma duh dan ni lo ang chuan ka lo khawsa tawh ṭhin. Chu chu thlak danglam ka duh a, a thara bul ṭan leh ka duh a ni. Sual kalsana i lam pana kal chu ka duh e.
Ka thil sual tih zawng zawng avanga hremna chu kei thi tur hian Isua zara ka pumpelh avangin lawmthu ka hrilh a che. I ngaihdamna chu ka phu lo tih ka hria. I khawngaihna chauh chuan min chhan thei tih ka hria, Lalpa. Hmun famkimah chuan lut turin ka famkim ngai dawn lo tih ka hria.
“Isu, min hmangaih em avangin ka sualna zawng zawng chu i lo phur ta a, lawmthu ka hrilh a che. Vanram kai tlakin min siam a, min chhandam turin ka ngen a che. Isu, nangmah chu ka ring a che. Min chhandam nghal a, chiang taka min chhandam a, chhandamna famkim min pe a, chatuan atana min chhandam thei a ni tih ka hria. Isua hmingin ka dil a che. Amen.”
Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e.
[Lettu: Peka]
No comments:
Post a Comment