Wednesday, May 6, 2026

ENGTIN NGE HLIMNA HI INNGAIHTLAWMNAIN A ZUI ṬHIN?

_Hlim Reng Theihna Dan_

- Rick Warren
- May 6, 2026
"_Ani zawngin Pathian anga awma, Pathian tluka awm chu thil thlakhlelh hleih theihah a ruat lo va, mihringte anga lo piangin, bawih angah a insiam a, amah leh amah a intitlawm ta zawk a, tin, mihring anga lo awmin a inngaitlawm a, thi khawp hiala thu zawmin a lo awm ta a, krawsa thihna ngei chu," (Philippi 2:6-8)._

Hlimna chu remna aṭanga lo chhuak a ni a, remna chu inngaihtlawmna aṭanga lo piang a ni. Inngaihtlawm i duh chuan he zawhna hi mahni inzawh ṭhin tur a ni: 'Isua ni se engtin nge a tih ang?' tih hi.

He harsatnaah hian Isua ni se eng tin nge a tih ang? Na tuar mek tan Isuan eng nge a tihsak ang? Office-ah Isua awm se eng tin nge a tih ang? Golf khelhna hmunah awm se engtin nge a tih ang? In nupa karah awm se engtin nge a tih ang?

He thu hi han inzâwt la, chhânna tlâwm tak, remna leh hlimna siamtu thil i hmu zel ang, harsatna, tlawmna, khâkna leh thinrimna siamtu ni lovin.

Isua anga awm chu eng tihna nge? Philippi 2 hian entirna pathum min pe:

*I phû ni a i hriat kha phût tlat kher suh*.
"Ani zawngin Pathian awnga awma, Pathian tluka awm chu thil thlakhlelh hleih theihah a ruat lo va," (Philippi 2:6).

I chanvo dik tak pawh thlah i huam hi tunlai khawvel kalphung nen a inkalhzia i hria em? Ni e, i chanvo a ni alawm. Mahse i mamawh i hmuh theihna kawng ṭha zawk a awm. I rinna thlah kher lovin i nêm thei a, phût kher lovin i hre thiam thei a ni.

*Rawng i bawl theihna tur kawng zawng rawh.*
"Mihringte anga lo piangin, bawih angah a insiam a, amah leh amah a intitlawm ta zawk a," (Philippi 2:7).

Isua an i duh chuan, rawngbawl i zir a ngai. Rawngbawl hi chîn ṭhana neih tur a ni a. Thil lian thamah a inṭan lo, thil te reuhtê aṭangin a inṭan zawk a ni. Pathianin i inngaihtlawmna hi ni tin thil tê tham teah a fiah ṭhina, chumi chu thil lianah a lo lang chhuak leh ṭhin a ni. Nungchang dik tak chu buaina lian tak a lo thlenin a lang chhuak a, mahse ni tin thil tê tham, tih dan ngaiah te hian a insiam zawk a ni,  dawr bungrua a dahna hmuna dah lêt leh ang chi-ah te hian.

*Thil dik chu na dawn pawh ni se ti tho rawh.*
"Mihring anga lo awmin, a inngaitlawm a thi khawp hiala thu zawmin a lo awm ta a, krawsa thihna ngei chu," Philippi 2:8.

Hei hi Isua anga awm chu a ni. Isua khan a nat lai khan eng nge a tih? Hriatthiamna a ngah, a phû tawkah a chan tur ang a phût kher lo. Rawngbawl theihna tur kawng a zawng reng a. Eng dinhmunah pawh rawngbawltu a ni reng.

Isua hi inngaihtlawmna kawnga entawn ber tur a ni a, Pathianin khawvela chawimawina sâng ber a pe a ni. Nang pawh Isua entawna, i inngaihtlawm chuan Pathianin a chawimawi ve ang che.

Ngaihtuah zui atan.

Inlaichinnaah i ngilnei thei em, i duh loh zawng pawm vek kher lo chungin emaw, mi dang i hrethiam thei em? i phu tawk i chan tur ni a i hriat phût let kher si lovin?

Nangmah emaw, i mi hriat mi dang nunah emaw inngaihtlawmna avanga Pathianin a chawimawi i hmu tawh em?

Vawiinah hian mi tumahin an ngen hma chein tu emaw tan eng nge i tihsak theih ang?

[ *Lettu: Marova Punte* ]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...