Monday, April 6, 2026

THAWHLEHNA HIAN ENGKIM A TIDANGLAM

_Khawngaihna Thilmak_

-  Rick Warren 
-  April 6, 2026
“An sualte ngaihdam nan A mite hnenah chhandamna thu hriattir turin. Chu mi avang chuan chung lam atangin ni chhuakin min tlawh ang.” Luka 1:78

He Thawhlehnaniah hian mi tam tak ni chhuah hmain an tho ang a, Easter sunrise service ah an tel leh ang. He ni chiah hi ni chhuah hlima hunpui kan hman ṭhin a ni.

Engvangin nge?

A chhan chu, zingkarah khawvar dawnah khan alawm zirtirten Isua Krista chu thihna hnehin a tho leh tih an hriat ni - chu chuan engkim a tidnnglam ta a ni.

Bible chuan, “Chawlhni tlai takah, ni sarih ni hmasa ber tura khua a var dawnin Mari Magdalini leh Mari dang chu thlan en turin an kal a. Tin, ngai teh, lir nasa takin a lo nghing a; Lalpa vantirhkoh van ata a lo chhuk a, lung chu a rawn lum sawn a, a chungah a thu ta a. A hmel awmzia chu kawlphe ang a ni a, a silhfen chu vur angin a var a; amah an hlauh avangin vengtute chu an khur a, mitthi ang maiin an lo awm ta a. Tin, vantirhkoh chuan hmeichhiate chu a bia a, an hnenah, "Nangni chuan hlau suh u. Isua, an khenbeha kha, in zawng tih ka hria e. 
Hetah a awm tawh lo ve; a sawi ang ngeiin a thawhleh tawh kha. A mutna hmun hi rawn en teh mah u.” (Matthaia 28:1-6).

Engvangin nge Thawhlehna chu a pawimawh?

Isua Kristan thudik a sawi tih a tichiang a ni. Isuan a nihna kha huai takin a sawi a. Pathian Fapa a nih thu leh vanram kalna kawng awmchhun anih thu a sawi a ni. Isuan, “Keimah hi kawng leh thutak leh nunna ka ni; keimaha kal lo chu tumah Pa hnenah an thleng ngai lo.” (Johana 14:6).

Mi ṭhenkhat Pathian nia inchhal an ve bawk a. Nimahsela Isua danglamna chu amah chauh hian Pathian anih zia a nemnghet a ni. Isuan hetiang hian sawi a, “Ka nemnghet dawn. Khawvel sualna avangin ka thi dawn a, ni thum niah ka tho leh ang." Chu chu atakin a thleng tlat si a ni.

Isua thawhlehna chu khawvela hun pawimawh ber a ni. Hun hi A.D. leh B.C. ah ṭhen anih phah ta a. Hun leh kum i ziah apiang hian Isua hun aṭang khan teh zel a ni tawh a. I pianni, thla leh kum i ziah pawhin Isua thawhlehna aṭang khan chhut zel angai tawh a ni.

Chung chu khawvar ṭantirh ni chhuah hlimah khan a thleng a ni. Luka 1:78 ah chuan, “An sualte ngaihdam nan A mite hnenah chhandamna thu hriattir turin. Chu mi avang chuan chung lam atangin ni chhuakin min rawn tlawh ang.”

Zahngaihna tih thu hi lo chhinchhiah la. Hun engemaw ti chhung chu Pathian zahngaihna tih hi kan zir ang. Engtikah nge Pathian zahngaihna ka mamawh? Zahngaihna chu ka pawm chuan engnge lo thleng ang? 

Ngaihtuah zui atan

* Easter sunrise service ah i tel ṭhin em? Nichhuah hlima thawhlehna lawm chu engnge a danglamna?

* Isuan, “kawng leh thutak leh nunna,” anih thu a sawi a. Easter ah hian eng ber hi nge pawimawh nia i hriat?

* Isua thawhlehna chu hun pawimawh ber ani tih chianna engnge i hmuh?

*Pathianin a chhungkuaah tel turin a duh che.*
Engang pawhin lo awm tawhin khawi hmunah pawh lo awm tawh la, Pathian chatuan chhungte chuan nghaktu leh thlir rengtu i nei e. Sawmna chu zau taka hawn a ni e. Ring la chang mai rawh. 

I inpeih tawh em? He ṭawngṭaina hmang hian bul ṭan ang che: “Lalpa duh tak, ka thih hun chuan ka nun chungchang ka la sawi dawn tih ka hria. I lakah thil sual ka lo ti tawh tih ka hria a, keima ruahmanna nangma duh dan ni lo ang chuan ka lo khawsa tawh ṭhin. Chu chu thlak danglam ka duh a, a thara bul ṭan leh ka duh a ni. Sual kalsana i lam pana kal chu ka duh e. 

Ka thil sual tih zawng zawng avanga hremna chu kei thi tur hian Isua zara ka pumpelh avangin lawmthu ka hrilh a che. I ngaihdamna chu ka phu lo tih ka hria. I khawngaihna chauh chuan min chhan thei tih ka hria, Lalpa. Hmun famkimah chuan lut turin ka famkim ngai dawn lo tih ka hria. 

“Isu, min hmangaih em avangin ka sualna zawng zawng chu i lo phur ta a, lawmthu ka hrilh a che. Vanram kai tlakin min siam a, min chhandam turin ka ngen a che. Isu, nangmah chu ka ring a che. Min chhandam nghal a, chiang taka min chhandam a, chhandamna famkim min pe a, chatuan atana min chhandam thei a ni tih ka hria. Isua hmingin ka dil a che. Amen.” 

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

*[Lettu: Sangpuia]*

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...