Thursday, January 1, 2026

KAWNGKHAR KIKTU CHHAN A HUN

_Pathian Tan Eng Anga Pawimawh Nge I Nih_

By Rick Warren
— January 1, 2025
“Ngai teh, kawngkhâr bula dingin ka kik hi, tu pawh ka aw hriaa kawng mi hawnsaktu hnênah chuan ka lût ang a, zanriah ka ei ang a, ani pawhin ka hnênah a ei bawk ang.” [Thupuan 3:20]

Eng ang thil pawh lo ti tawh la, Isuan a la duh che!

Zakaia kha a pawn lam lan dan avang khan ngaih ngamin a awm thei lova, a khua a har a, a inkiltawh ṭhin. Amah diriamtute khan an tithinrimin an tisual lehzual sauh a. Mahse a sualna chuan amah leh amah inthiam lohna siamsakin a tizak ngawih ngawih thung. 

A kawng kal lai ding a, Zakaia en a, a hming meuha a koh hnu chuan Isua chuan mite ṭhawng em em mai thil chu a ti zui ta a: Jericho khaw pumpuia misual ber ina thleng tur chuan amah leh amah a insawm ta a ni. 

Isua chuan Zakaia thinlunga zahna leh inthiamna lohna awm tur leh a ina thleng turin a sawm ngam ngai dawn lo tih chu a hmu tlang sa vek. 

Chuti chung chuan Bible chuan, “Chumi hmun Isuan a va thlen chuan a dâk a, a hnênah, “Zakai, lo chhuk thuai rawh, vawiin hian i inah ka thleng dâwn a ni,” a ti a” tiin a sawi  [Luke 19:5].

A chhan chu nang leh kei hi mihring kan ni a, keimahni ngei pawhin kan zahpui thilte kan lo ti tawh ṭhin. 

Mahse Isua chuan nangmah thiam loh chantir che ai chuan thlak danglam chu a duh zawk. Khawvel thiam loh chantir tur ni lovin chhandam turin a lo kal a ni [Johana 3: 17]. 

Eng ang thil pawh lo ti tawh la, tu nen pawh a ni thei, engtianga rei nge i tih tawh tih chuan vawiin hian i ke chheh chuan khawi lam nge a hawi tih chu a pawimawh ber. 

Zakaia ina a luh khan Isua chuan, “Eng ang thil pawh ti tawh la, Zakai, ka la duh che. I inah khan lo kalin zanriah ei ka duh a ni. Nangmah nena inkawm ka duh a. Nangmah nena inlaichinna neih ka duh a ni,” a tihna a ni. 

Pathian chuan chu chiah chu i hnena sawi a duh. Eng ang thil pawh lo dai tawh la, i chhandamna bul ṭanna tur chu i chapona kha dah kiangin Pathian ṭanpuina chu lo pawm ang che. 

Dik tak chuan thil eng emawzat i lo tisual tawh thei. Mahse nangmah Siamtu hmaah chuan i hlutna zaa pakhat pawh i la hloh chuang lo. 

Isua chuan nangmah nena inlaichinna neih a la duh fan a. I inah lo thlengin nangmah nena zanriah kil a duh e. I in kawngkhar kiangah khan dingin a kik mek. Hetiang hian a sawi, “Ngai teh, kawngkhâr bula dingin ka kik hi, tu pawh ka aw hriaa kawng mi hawnsaktu hnênah chuan ka lût ang a, zanriah ka ei ang a, ani pawhin ka hnênah a ei bawk ang,” tiin [Thupuan 3:20].

Ngaihtuah zui atan. 

• Eng ang dawt nge nangmah leh nangmah i inhrilh avanga insitna emaw inhmuh hniam chang i lo nei tawh ṭhin? 

• Isuaa i nihna chiang takin hre mah la Pathian duh dan i neih phak lohna lai hriat chian chu eng vangin nge a pawimawh?  

• Tlawm taka Pathian pan tih chu eng nge a awmzia? 

Pathian ngaihdamna changa Krista nena nun thar nei tur chuan i inpeih tawh em? 

Eng ang pawhin lo awm tawhin khawi hmunah pawh lo awm tawh la, Pathian chatuan chhungte chuan nghaktu leh thlir rengtu i nei e. Sawmna chu zau taka hawn a ni e. Ring la chang mai rawh. 

I inpeih tawh em? He ṭawngṭaina hmang hian bul ṭan ang che: “Lalpa duh tak, ka thih hun chuan ka nun chungchang ka la sawi dawn tih ka hria. I lakah thil sual ka lo ti tawh tih ka hria a, keima ruahmanna nangma duh dan ni lo ang chuan ka lo khawsa tawh ṭhin. Chu chu thlak danglam ka duh a, a thara bul ṭan leh ka duh a ni. Sual kalsana i lam pana kal chu ka duh e. 

Ka thil sual tih zawng zawng avanga hremna chu kei thi tur hian Isua zara ka pumpelh avangin lawmthu ka hrilh a che. I ngaihdamna chu ka phu lo tih ka hria. I khawngaihna chauh chuan min chhan thei tih ka hria, Lalpa. Hmun famkimah chuan lut turin ka famkim ngai dawn lo tih ka hria. 

“Isu, min hmangaih em avangin ka sualna zawng zawng chu i lo phur ta a, lawmthu ka hrilh a che. Vanram kai tlakin min siam a, min chhandam turin ka ngen a che. Isu, nangmah chu ka ring a che. Min chhandam nghal a, chiang taka min chhandam a, chhandamna famkim min pe a, chatuan atana min chhandam thei a ni tih ka hria. Isua hmingin ka dil a che. Amen.” 

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

[Lettu: Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...