_Thlirna Thlak Danglam_
By Rick Warren
— December 17, 2025
“Englo lâk aiin pêkin lukhâwng a nei zâwk.” [Tirhkohte 20:35]
Thilphalna chungchangah chuan a zir dan kawng awlsam ber chu midangte aṭanga zir a ni.
Ka nu leh pate aṭangin kei pawhin thilphal ka zir ṭhin. An thil neih ṭhahnam tak an pe chhuak lai hmuin ka ṭhanglian a. Mite an chhawmdawl a, an sum leh an ei in te an pe chhuak ṭhin. An hun, tha leh zungte an sawr chhuak bawk. An thil neih leh thilpekte chu phal takin an chhuahpui a, an hlim hle ṭhin tih pawh ka hre thei a ni.
Bible chuan thilphalna chungchang chiang takin a sawi: chu chu Makedonia kohhran kha a ni. An chungchang tirhkoh Paulan a sawi dan chu hei hi a ni: “Unaute u, Pathianin Makedonia rama Kohhrante khawngaihna a pêk thu hi kan hrilh duh che u a ni. Hrehawm nasa taka fiah an ni chungin an lâwm ta êm êm a, an pachhe hle chung pawhin an thilphal êm êm a ni,” tiin. [2 Korinth 8: 1-2].
Makedonia kohhrante khan anmahni buaina chinfel tur an nei ve tho. Rom Lalram kha Nero-a a lal lai a nih avangin “fiahna nasa tak” an hmachhawn a ngai a. Chu hun chu Kristian an nih vang ringawt pawha an thih theih hun a ni hial. Makedonia kohhrante khan an rinna avangin tihduhdahna an tuar a ni mai lo va, an rethei em emin sum leh pai kha an mamawh em em ve tho a ni.
Mahse “an nun kha a ropui em avangin” an harsatna khan an thilphalna kha a tidanglam tak tak ngai chuang lo. Pek loh theih lohva an ngaih vanga pe an ni ngai lo. Lawm takin an pe chhuak ṭhin.
Bible chuan, “Englo lâk aiin pêkin lukhâwng a nei zâwk,” tiin a sawi. [Tirhkohte 20:35]
Ka naupan deuh lai chuan he Bible chang hi ka rin zawng a ni lem lo. Ka la puitling tawk lo bawk a, ka ngaihdan chuan pek chhuah chu dawn ai chuan nuam lo zawkah ka ngai mai a. Tichuan Krismas chu keima mimal thuhla mai niin ka ngai: “Eng nge ka neih dawn?” tihte ka inzawt hmasa ṭhin.
Ka chhungten thilphal min zirtir an tum avang chuan thilpek hlimna te pawh chu ka tem ve ta hlek hlek a. Ka puitlin ve deuh deuh ang zelin a peka pek chhuahah chuan hlimna a tam zawk a ni tihte chu ka lo hmu thiam ve ta bawk.
Tute emaw tihluihna emaw phutna avanga pe-ah i inngai a nih chuan a hrehawm hle ang. Hei hi han ti ve chhin teh: Lawm chungin pe chhuak la, Pathian chuan i mamawh a pe zel dawn che tih hria ang che. Dik tak chuan, thilpek hlu ber chu a lo pe daih tawh zawk che a ni: chhandamna thil thlawnpek Isua Krista chu a pe tawh che.
Ngaihtuah zui atan.
• Tuin nge thilphal zirtir che? Chu chuan midang tana thil phal ve turin eng tiang chiahin nge a kaihhruai che?
• Mite thil eng emaw i pek chhuah dawn chuan nei tam tawk lo leh pek chakna pawh nei mang lo chunga i awm lai chuan Pathian thutiam nangmah fuihtu che chu engnge ni?
• Engnge tun karah hian lawm taka i pek chhuah tur chu?
[ *Lettu:* Peka]
No comments:
Post a Comment