_Thlirna Thlak Danglam_
By Rick Warren
December 19, 2025
“Chutichuan, a fa duh takte angin, Pathian awm dân latute ni rawh u. Tin, Kristan a hmangaih che ua, rimtui atân Pathian hnêna thilhlanah leh inthawinaa kan aia a inpêk ang bawk khân, hmangaihnaah awm rawh u.” [Ephesi 5:1-2]
Engkima mi thilphal chi i nih chuan i nun pumpui chu kawng engkimah a inthlak danglam zel ang. Rosum duhna [materialism] kha a tla hret hret ang a, i thinlung erawh a hahdam deuh deuh ang.
Mahse chu aia pawimawh zawk chu a lo thleng ang: Isua i lo ang deuh deuh ang.
Isua ang tih chu engnge a awmzia? A nihna pawimawh tak pakhat chu a thilphalna em em kha a ni a. I thil neih zawng zawng – boruak leh tui, i thluak leh lungphu, i thiamna [talents] leh hun tha neih te, mite nena in inlaichinna leh bungrua te – Pathian thilphalna aṭanga i dawn vek an ni. Dik tak chuan, Pathian thilphalna tel lo chuan engmah i nei lo vang.
Isua chu thilphalna kawnga mite entawn tlak em em a ni. Bible chuan, “Kan Lalpa Isua Krista khawngaihna ngahzia chu in hria e; a retheihna avânga in lo hausak theih nân, hausa hle mah se, nangmahni avâng ngeiin a lo retheih tâk kha,” tiin a sawi. [II Korinth 8: 9]
Isua Krista chu Pathian a ni a. Vanram ropuina zawng zawng a nei a, mahse chu chu kalsanin khawvelah a lo kal a chhungkaw tlawm tak rawn belin ran chennaah a rawn piang a ni. Chu chu mihringin a hniam theih dan ber a ni. Chu chu eng vangin nge a tih? Ama tana ti a ni lo.
I tana ti a ni.
Miin midang tana a thilphal theihna sang ber a ni: “Pathianin khawvel a hmangaih em em a, Chutichuan a Fapa mal neih chhun a pe a” tih a ni bawk [Johana 3: 16]
Eng vangin nge Pathian chuan thilphalna nun nei turin a duh che? A chhan chu amah ang ni turin a duh che, a awmzia chu thilphal ve turin a duh che!
Bible chuan, “Chutichuan, a fa duh takte angin, Pathian awm dân latute ni rawh u. Tin, Kristan a hmangaih che ua, rimtui atân Pathian hnêna thilhlanah leh inthawinaa kan aia a inpêk ang bawk khân, hmangaihnaah awm rawh u,” tiin a sawi [Ephesi 5:1-2]
Pathian chuan khawvelah hian nangma tan ringawta nung turin a dah lo che. Midang tana nung a, midang ṭhatna en turin a dah che a. A nihna tarlang turin a dah che.
Vawiin chuan Isua thilphalna chu engtin nge i lantir theih ang? I hun, i sum, i theihna, hmangaihna hmanga i thilphal apiang khan amah anna kawngah i lo thang lian deuh deuh tihna a ni e.
Ngaihtuah zui atan.
Engtik laiin nge i thilphal avangin rosum duhna [materialism] chu i neih tlem zel?
Isua anga mi thilphal nih i duh chuan engtin nge i hun, thil neih leh thiamna te chu i hman chhuah ve ang?
Ṭawngṭai la, tun karah hian Pathian chu midang tana malsawmna ni turin dil la chutianga kawng kawh hmuh tur che chuan dil bawk ang che.
[ *Lettu:* Peka]
No comments:
Post a Comment