_Hlauhna awm lo Krismas Chènin_
By Rick Warren
— December 26, 2025
“Chu mi avang chuan tu pawh Kristaa a awm chuan thilsiam thar a lo ni a; thil hlui te chu a ral ta a; ngai teh u, a lo thar ta.” [2 Korinth 5: 17]
He thu hi i lo hre tawh mai thei: “Krismas-in thlarau a paipawn ve tlat chu thilpek a ni” tih chu. Mahse Krismas thlarau dik tak chu pek chhuah a ni lo. Pathian thilpek lo dawn zawk chu a ni.
Isua kaltlanga chhandamna chu i lo chan ve chiah chuan Pathian chuan thil dang tam tak i tan a buatsaih nghal a ni. Tun ṭum Krismas huna thilpek dang pek che a duh che chu nihna thar a ni.
Khawvel huapa sualna thar lian ber chu nihna [identity] inruksak thuhla hi a ni. Mahse dik tak chuan kan nihna [identity] hi ruksak chu kan ni vek thung. Chu kan nihna min ruksaktute chu a chang chuan kan nu leh pate niin, Pathianin kan nihna tura a duan ang ni lo zawk min nihtir an tum a. A chang chuan kan hnam tihdan niin, a chang chuan kan kum rualpui/ṭhiante niin Pathianin min siam dan ang ni lova mi awmtir an tum a ni.
Mi tam ber chuan an nihna [identity] an neihna hnar chu an hna aṭang te, mite nena an inlaichinna aṭang te, leh an thil neih aṭangtein a ni. Mahse i nihna chu i thil hloh leh mai theih thilah chuan nghat ngai suh ang che, i hna emaw i in emaw midang emawah chuan innghat suh.
Miten engtik lai maha an laksak ve theih ngai loh che chu Pathianin a hmangaihna che chu a ni. Chuvangin, nihna nghet, tlo, tluantling leh ṭha neih i duh chuan Pathianah chuan innghat la, tiam chin awm lova nangmah hmangaih ṭhintu cheah chuan innghat tlat ang che.
Bible chuan “Chu mi avang chuan tu pawh Kristaa a awm chuan thilsiam thar a lo ni a; thil hlui te chu a ral ta a; ngai teh u, a lo thar ta,” tiin a sawi [2 Korinth 5: 17]
Pathianin a hmangaihna che i pawm chiah chuan chu chuan nihna thar a pe ang che. I sual tawh lo tihna a ni kher lo vang. Mahse i sualna te, i hun kal tawh leh i hlawhchhamna te kha nangmah en nan hman a ni tawh lo tihna a ni. Isua nena hmuh kawp i ni ta thung a. Pathian fa i lo ni ta a ni!
Nihna thar nun chhuahpui dan chu miten an hmuh ang che ni lova nangmah i inhmuh kha a ni. Pathianin a hmuh dan ang chea nangmah leh nangmah kha i inhmuh a ngai bawk. Chu chu dik taka i kalpui theihna tur chuan hlah lova Bible i chhiar a, i ṭawngṭai a ngai ang.
“Ka thua in awm reng chuan ka zirtirte in ni tak tak ang. Tin, thutak in hria ang a, thutak chuan bawih a ban ang che u” [Johana 8: 31- 32]
Kristaah chuan engtiang taka theihna nei nge i nih a, eng tiang taka pawm nge i nih a, engtiang taka hman theih nge i nih a, engtiang taka malsawm nge i nih a, engtiang taka hmangaih nge i nih tih inhriatna chuan zalenna a keng tel. Chu chu thilpek i dawn zinga thilpek ropui ber a ni.
Ngaihtuah zui atan.
• Eng ang thil pawh lo ti tawh mah ila Pathian chuan tiam chin nei lovin a la hmangaih zel chein i hria em? Pathian pawmna chu engtiang taka pawimawh nge a nih?
• Midangten an pawmna che chu engtiang taka pawimawh nge a nih?
• Pathianin a hmuh dan che chu engtin nge i lo ngaih ve?
[Lettu: Peka]
No comments:
Post a Comment