Saturday, December 27, 2025

I RIN RUAL KHAN PATHIAN CHHUNGKAW ZINGAH I TEL VE

_Hlauhna Awm Lo Krismas Chênin_

- Rick Warren 
- December 27, 2025
_"Isua Krista kaltlangin Pathianin a chhungkuaa tel turin ruahmanna a lo siam lawk tawh a. Hei hi a duhzawng tak a ni a, a tihlim em em bawk a ni."_ (Ephesi 1:5, NLT)

Krismas hun laia thilpek tam tak min pek tel rualin   chi/chhung khatnihna thilpek kan dawng a. Pathianin a thu kan awiha amah kan an leh zual theihna tura min pui turin thlarau lama chhungkua min pe a ni.

Hringnun hi mahni maia hmachhawn tura duan i ni lo. Pathian hre tur leh ṭanpui tur che chhungkua nei tura duan i ni. Mahni maia kan awm aiin midangte nena kan awmho hian kan ṭhang lianin kan nunah danglamna a thleng nasa zawk ṭhin. Hei vang hian alawm mahnia ei leh in insum tum leh mahni inṭanpui tumna ruahmanna hi a hlawhtlin loh fo!

Pathianin chhungkua a duh avangin lei leh van leh a chheh vel zawng zawng hi a siam a ni. Ephesi 1:5-ah chuan heti hian kan hmu, _"Isua Krista kaltlangin Pathianin a chhungkuaa tel turin ruahmanna a lo siam lawk tawh a. Hei hi a duhzawng tak a ni a, a tihlim em em bawk a ni."_ (NLT)

Pathian chhungkuaah i tel nghal tawp lo. Lak luh i nih a ngai. Engtinnge Pathianin a lak luh che? Isuaah rinna nghat tura duhthlanna i siam rual chiah khan a la lut che. Mahse amah ring ringawt turin a duh lo che. A chhungkuaa i tel a duh a ni.

Chhandamna chang tur chuan Isua i rin a tul. Mahse vanrama luh theihna i neih rual chiah khan Pathianin a chhungkuaa i tel a duh. Engvangin? A chhan chu hringnun hi a harsa em em mai a, puitu tur i mamawh dawn a ni. Thutlukna ṭha siam tur leh danglamna thlen tur chuan thlawptu tur che chhung khat i neih a ngai.

Bible chuan inpuitawn turin Pathianin chhungkua a siam a ti. Chu chhungkua chu, _"Pathian chhungte chu Pathian nung Kohhranho, thutak ban leh innghahna chu an ni."_ (1 Tim. 3:15)

California-ah chuan lir a nghin ṭhin avangin kan in tan innghahna nghet tak neih a ṭul tih kan hrechiang hle. Innghahna nghet leh ṭha nei lo in chu lir a nghinin awlsam taka sawi chim a ni ṭhin. 

I nun pawhin chelh tlattu a mamawh. Thlarau lama chelh tlattu che chhungkua hmanga innghahna ṭha tak i neih loh chuan harsatna a lo thlen huna sawi chim mai theih dinhmunah i indah tihna a ni.

Mi zawng zawng hi Pathian siam kan ni a. Pathianin mi zawng zawng a hmangaih a. Mahse mi zawng zawng hi Pathian fa kan ni kher lo.

Pathian chhungte zinga tel theihna awm chhun chu kan duhthlanna hmanga kan thlan hi a ni. Isua zui tura duhthlanna i siam fel khan i nuna Pathian thiltum a puitlin theih nana puitu tur che chhungkua i thlang fel tihna a ni.

Ngaihtuah zui atan.

Kohhrante chhawmdawlna i mamawh hunin thianzaho pawl te zawk zinga tel hi engnge a pawimawhna ni a i hriat?

Pathianin a hnung zui hi kan duhthlannaa a dah kan tih hian a mizia engnge a tarlan?

Harsatna i tawh laiin engtinnge in kohhranin an thlawp che ni a i hriat?

*Khawiah nge chatuan hun i hman dawn?*

Bible chuan Pathian Fapa, Isua Krista i rin chauhin vanramah i lut theih tih min hrilh. Vanram hi thawh chhuah theih a ni lo: _"Rinna avanga khawngaihnaa chhandam in ni; nangmahni thawh chhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e."_ (Ephesi 2:8-9)

Isua hnena inpe tura i inpeih chuan heti hian ṭawngṭai rawh le:
"Lalpa, i Fapa Isua Krista ka rin phawt chuan ka sualte ngaihdam a ni ang tiin min tiam a, chuvang chuan min siam chhan ka zir anga, nangin i vanramah min lo pawm ang tih ka ring.

"I hmaah ka sual ka puang a, i ngaihdam ka rawn dil e. Ka sual lak bo anih theih nan ka ai Isua a thi a, nangin i kai tho leh a ni tih ka ring e. Vawiin aṭang hian Isua hi min chhandamtuah ka pawm a,  ka Lal atan ka thlang e. Min hruai la, i duhzawnga nung turin min pui ang che. Isua hmingin, Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.
[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...