_Thlirna Thlak Danglam_
- Rick Warren
- December 07, 2025
_"Tin, Pathian hmangaihtu, amaha ruat anga a kohvate tan chuan, an ṭhatna turin engkimin a thawhsak hlawm ṭhin tih kan hria."_ (Rom 8:28)
Hmachhawn ṭhuai ang u. Nang leh kei hian vawi tam thil atthlak tak kan ti fo. Thil kan tisual fo ṭhin.
Mahse i thiltih kha Pathianin a hman theih loh khawp thil a ni ngai lo. Thil i tisual ṭhin, mahse Pathian chuan a tisual ve ngai lo.
Rom 8:28-ah chuan heti hian kan hmu, _"Tin, Pathian hmangaihtu, amaha ruat anga a kohvate tan chuan, an ṭhatna turin engkimin a thawhsak hlawm ṭhin tih kan hria."_
Atthlak taka thil i tihsualin Pathianin thil ṭha atan a hmang thei tih a tiam che.
Fiah taka sawi ka duh. Hei hi mi zawng zawng hnena thutiam a ni lo. He lai chang hian Pathian laka helte emaw a ruahman anga nung lote tan emaw engkim an ṭhatna turin a thleng ang a ti lo.
A thutiam hi Pathian hmaa lokal a, "I tana nun ka duh e. Thil ka tidik reng lo. Mahse thil ṭha tih ka duh e. Rin che ka duh a, i hnung zui ka duh a ni" titute tan a ni. Chutiang chuan ti la, Pathianin a ṭhatna turin a hmang ngei ang.
Chu chu lawmna tur chhan a ni.
Pathian kuta i nun i dah khan i beidawng tawh ngai dawn lo tihna a ni lo. Thutlukna ṭha lo i la siam tho ang. I la buai nuai tho ang. Mahse Pathianin a ruahmanna milin a siamrem zel thung ang.
I nunah khan ruahmanna pahnihna a awm lo. I pian hma pawh khan Pathianin i tihsual turte a hre vek. Chung i tihsualte chu a remruatnaa leng turin a siamrem dawn tih pawh a hria.
I hahdam thei tihna a ni. Phili ruai lovin i awm thei tawh. I chawl hahdam thei. Pathianin a pekah che khan i theihna sang ber hlan rawh. A ruahmannaah engkim a siamrem ang.
Ngaihtuah zui atan.
Engtinnge Pathianin i tihsualte thil ṭhaah a siam? Chutiang chu midangte nunah i hmu ve em?
Pathianin engpawh thil ṭha atan a hmang thei tih i hriatin chu chuan engtinnge i hun kal tawha i tihsualte lak ata a fihlimtir che?
I nunah Pathianin a ṭhatna turin hna a thawk tih i hriatin rinna kawngah engtinnge ke i pen ang?
*Vawiin hian chhandamna hlimna chu nei rawh.*
Hei hi hre reng rawh, Bible chuan Isua ringtute tan chuan zahna leh inthiam lohna a awm tawh loh thu min hrilh.
Chu thutiam chu pawma ngaihdam hlimna chang tura i inpeih chuan heti hian ṭawngṭai rawh:
"Isu, ka rin phawt che chuan ka thil sual tih zawng zawngte ngaihdam niin thiam loh chang ka ni tawh lovangka tiin min tiam a. Engtik niah emaw mi bûk lovin i vanram in nuamah min hruai ang tih ka hria.
"Ka sual ka puang a, i ngaihdamna ka dil e. Pathian, min Chhandamtu i ni tih ka ring. Ka nuna Lal ata ka thlang che a. I ngaihdamna chang tura ka beih, phu leh thawh chhuah a ngaih loh avangin ka lawm e. I khawngaih thilpek a ni e.
"Vawiin hian ka nun zawng i lam ka rawn hawi e. Zahnaa nun aiin i chhandam hlimnaa nun ka duh a. Ka nunzawng hi mahni tan ni lovin i tana nun ka duh e. Ka nun i tan ka hlan a, min chhandam a, i chhungkuaa min pawm turin ka dil a che. Isua hmingin, Amen."
Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.
[Lettu: Mapuia Fanai]
No comments:
Post a Comment