Wednesday, December 10, 2025

KUMIN KRISMAS-AH HIAN KHAWIAH NGE THINLUNG THLAMUANNA I ZAWN ANG

_Thlirna Thlak Danglam_

By Rick Warren
— December 10, 2025
“Thlarau Thianghlim thiltihtheihna azârah beiseinaa in khah theihna tûrin, beiseina hnâr Pathian chuan in rin avângin lâwmna leh thlamuanna tinrêngin vûr che u rawh se.” [Rom 15:13] 

I nuna Pathian a awm loh changin khawiah nge thlamuanna i zawn ṭhin? Pathian nena inzawmna tluantling i neih loh chang chuan khawiah nge thlamuanna i hmuh theih ang? 

Isua Krista chuan thil ropui tak pek tur che a nei. Hetiang hian a sawi, “Nangni thawk rim leh phurrit phur zawng zawngte u, ka hnênah lo kal ula, keiman ka chawlhtîr ang che u,” tiin.

He Bible chang ka duh chhan chu mi tam berten an ngaihdan letling chiah hi Pathian thusawi chu a ni tlat zel. Mi tam berte chuan Pathian chuan, “Ka hnenah lo kal la, dan leh tih tur ka lo hrilh ang che. Ka hnenah lo kal la, tichuan inkaihhruaina dan ka lo zamsak ang che. Ka hnenah lo kal la, tih loh tur ka lo hrilh ang che. Ka hnenah lo kal la, sakhuana ka lo pe ang che. Ka hnenah lo kal la, serh leh sang ka lo pe ang che” ti dawnin an hre ṭhin. 

Mahse Pathian chuan chutiang reng reng chu a sawi si lo. “Ka hnenah lo kal la, chawlhna ka lo pe ang che,” a ti mai zawk a ni. 

I hah a, i chau fo a nih chuan nangma chakna rinchhana nun i lo tum tawh ṭhin tihna a ni thei ang. Pathian chuan chutianga nung tur chuan a ti ngai lo che. 

Living Bible Paraphrase chuan hetiang hian min hrilh, “Chau leh hah te hnenah chuan chakna a pe a, mi chak lo hnenah chuan chakna a pe bawk a,” tiin [Isaia 40: 29]. 

Kolossa 1: 11 chuan heng hi a mite a tiam, “A thiltihtheihna ropui tak aṭanga chhuak chakna chuan kawng tinrênga chhelna leh dawhtheihna nei tûrin a tichak ang che u,” tiin.

Tun Krismas lo awm tuarh hian i hnual hlek emaw, enghelh i nei emaw, i buai emaw, lungkham eng emaw i nei a nih chuan Pathian hnenah lo haw rawh. Amah chu siamtu che a ni a, i nun pumpui entu che chu a ni, i nihna zawng zawng chu a hre vek che a, chuti chung chuan a la hmangaih chein a la ngaidam che a ni. 

A thlamuanna leh chakna huangah chuan lo haw turin a sawm che. Chutianga i lo haw chuan rilrua thlamuanna tak tak chu i nei nawn leh ang. 

Ngaihtuah zui atan. 

Engtiangin nge nangma chakna ringa nun i lo tum tawh ṭhin? 

I lungkham, buaina leh sualna nena Pathian hnena i lo kal changin Pathian chuan engtianga a tih che nge i rin? 

“Ka hnenah lo kal ula, keiman ka chawlhtir ang che u” tih Pathianin a sawi chu engtiangin nge i ngaih? 

[ *Lettu:* Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...