_Thlirna Thlak Danglam_
By Rick Warren
— December 11, 2025
“Nimahsela, Isua Krista tlanna zârah Pathian chuan a khawngaihna avâng chauhvin chûng mite chu a thlâwnin thiam a chantîr ta, Pathianin ani chu a thisen rin avânga sual thupha chawina ni tûrin a ruat a, mi thiam a chantîr dân tilang tûra ti a ni.” [Rom 3:24-25]
Thilpek i lo dawn tawh zinga a hlu ber chu dawra lei a ni lo. Sum pai hmanga lei theih an ni hek lo. Lehkha mawia tuam pawh an ni lo.
A Petu thil neih zawng zawng a ni bawk.
Bible chuan Pathian khawvelah a Fapa a tir a, chu chu thilpek ropui ber a ni tiin a sawi. Nangmah siamṭha turin khawvelah a rawn tir a ni. Bible chuan, “Nimahsela, Isua Krista tlanna zârah Pathian chuan a khawngaihna avâng chauhvin chûng mite chu a thlâwnin thiam a chantîr ta, Pathianin ani chu a thisen rin avânga sual thupha chawina ni tûrin a ruat a, mi thiam a chantîr dân tilang tûra ti a ni,” tiin a sawi [Rom 3:24-25]
Tichuan Isua chu eng vangin nge a thih? A bulpuiah i kir leh teh ang.
*Tumah famkim an awm lo.* Tute mah mi fel famkima inngai hi ka la hmu ngai lo. Keimah leh keimah pawh hi ka in teh tling lova, Pathian tehna phei chu ka va han phak lo dawn chiang em. Ka tisual vek tawh a ni. Bible chuan, “Mi zawng zawngin thil sual an ti vek a, Pathian ropuina chu an chang thei ta lo va ni,” tiin a sawi [Rom 3: 23].
*Pathian chu a dik a ni.* Pathian chuan inthliarna awm lova rorel a duh. Tuten emaw dan an bawhchhia a nih chuan hremna eng emaw a awm tur a ni. Tichuan mihring dan i bawhchhia a nih chuan mihring hremna eng emaw i tuar a ngai. Pathian dan i bawhchhiat chuan, Pathian hremna i tuar a ngai thung ang. Bible chuan, “sual man chu thihna a ni,” tiin a sawi [Rom 6: 23]
*Isua chuan i sual man bat a tlaksak che.* Bible chuan, “Ama zârah Pathian ṭhatna kan lo chan ve theih nân, sual rêng rêng hre lo chu, keimahni avângin Pathianin sualah a siam a ni,” tiin a sawi [II Korinth 5: 21]. Isua chuan ka sual, i sual leh khawvel sual zawng zawng chu a phur vek a ni. Chu chu Chanchin ṭha a ni a, gospel a ni bawk. Isua chuan i sual man bat i pek tlak theih ngai reng reng loh tur chu a peksak che a ni.
*Pathian thil thlawnpek chu i pawm thei ang.* Pathian chuan Isua chu kan sualna phur turin a chhandamna thil thlawnpek min pe. Thilthlawnpek kan dawn tur min pe a ni. Bible chuan, “Mi ṭhenkhat erawh chuan an lo lâwm a, amah an ring a, an hnênah Pathian fate nih theihna a pe a,” tiin a sawi [Johana 1: 12]
Hei hi ka zawt nawn ang che: Pathian chhandamna thilthlawnpek chu i lo pawm thei ang em? Isua nena inzawmna awmzia hriat thiam chu thuhran a ni a. A thilpek a tak taka dawn chu thil dang daih a ni.
Vawiin hian thutlukna pawimawh i siam ngei ka beisei.
Ngaihtuah zui atan.
• Chhandamna pawn lamah engnge thilpek i dawn tawh zingah ropui ber? Chu thilpek chu engah nge a ropui em em?
• I bat tlak theih ngai loh tur Isuan a peksak che tih chu engnge a awmzia?
• Pathian chhandamna thil thlawnpek pawm tih chu eng nge a awmzia? Eng vangin nge? [Chu thilthlawnpek chu i la dawng lo a nih chuan eng vangin nge i dawn mai loh vang?]
Thilpek zawnga ropui ber chu i la dawng ve lo a nih chuan chu hun remchang chu nei ve ngei ngei la ka duh a ni. A chhandamna thutiam chu i ring a nih chuan he ṭawngṭaina hmang hian ṭawngṭai ang che:
“Lalpa duh tak, ka thih hun chuan ka nun chungchang ka la sawi dawn tih ka hria. I lakah thil sual ka lo ti tawh tih ka hria a, keima ruahmanna nangma duh dan ni lo ang chuan ka lo khawsa tawh ṭhin. Chu chu thlak danglam ka duh a, a thara bul ṭan leh ka duh a ni. Sual kalsana i lam pana kal chu ka duh e.
Ka thil sual tih zawng zawng avanga hremna chu kei thi tur hian Isua zara ka pumpelh avangin lawmthu ka hrilh a che. I ngaihdamna chu ka phu lo tih ka hria. I khawngaihna chauh chuan min chhan thei tih ka hria, Lalpa. Hmun famkimah chuan lut turin ka famkim ngai dawn lo tih ka hria.
“Isu, min hmangaih em avangin ka sualna zawng zawng chu i lo phur ta a, lawmthu ka hrilh a che. Vanram kai tlakin min siam a, min chhandam turin ka ngen a che. Isu, nangmah chu ka ring a che. Min chhandam nghal a, chiang taka min chhandam a, chhandamna famkim min pe a, chatuan atana min chhandam thei a ni tih ka hria. Isua hmingin ka dil a che. Amen.”
Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e.
[ *Lettu:* Peka]
No comments:
Post a Comment