Thursday, November 6, 2025

PATHIAN HRE RENG TURIN I RILRU THUNUN RAWH

_Isua Tih Danin_

By Rick Warren
— November 06, 2025
“Krista hnênah khenbehin ka awm ta; nimahsela, ka nung a ni; keimah erawh chu ka ni tawh lo, Krista chu keimahah a nung zâwk a ni; tin, tûnah tisaa ka nung hi rinnaa nung ka ni - Pathian Fapa, mi hmangaiha ka aia inpetu rinnaah chuan.” [Galatia 2:20]

Bible chuan chiang takin kan ṭawngṭai dan tur min kawhhmuh. Engtik lai pawhin ṭawngṭai rawh u a ti hial a ni [I Thessolonika 5: 17] 

Chu chu mi tam ber tan chuan a theih loh hial mai thei. Ni khata hun bi neia ṭawngṭai pawh chu mi ṭhenkhat tan chuan a harsa mai thei, chaw dawn emaw mut dawn emaw fianrial hun eng emaw neih chu an harsat hial thei. 

Eng lai pawha ṭawngṭai chu engtin nge a tih theih ang? Kawng awm thei pakhat chu Nilenga “ṭawngṭaina hmanga thaw lak” [breath prayers] chu a ni, kum za tam ringtute chuan an lo ti tawh ṭhin. Thu tawite emaw thumal awlsam te emaw thawk i lak paha i sawi mai theih tur chu thlang ang che: “Ka kiangah i awm.” “I khawngaihna ka chang.” “Nangmah ka rinchhan che.” “Ka hre chiang duh che.” “I ta ka ni.” “Nangmah ring turin min pui rawh.”

Bible thumal tawi tete te chu i hmang thei ang: “Nun hi Krista a ni.” “Engtikah mah min kalsan lo vang.” “Ka Pathian i ni.”

I thinlunga nghet taka a beh thlengin ṭawngṭai mawlh mawlh ang che. Pathian chawimawi tura phurna chu neih tum la, i duh zawng tu tura amah hruai kawi chu tum kher suh. “Ṭawngṭaina hmanga thaw lak” chuan Pathian awmpuina thuk zawk leh a lainatnate chu a hriattir thei ang che. 

Pathian hnaih nun chu thil zir theih a ni a; nungchang i chul nel theih a ni. Rimawi tum thiamin rimawi mumal taka nitin a khawih hnuah awlsam taka a lo thiam angin i nitin hun hmanah chuan Pathian nihna chu i ngaihtuah thei ang. Pathian hre reng turin i rilru chu i thunun thei ang. 

I hun hman mekah chuan Pathian awmpuina hre thiam tur leh vawng tlat turin i inthunun thei ang. Mita hmuh mai theih thil hmangin i inhriattir thei ang. Thuziak tawi te “Pathian chu ka kiangah ka tan a awm a ni” tih thute chu i tar mai thei ang. 

Ama awmpuina hlimna [feelings] chu i thil paltlang hrang hrangah chan reng i duh a nih chuan thil hriat sual i nei tihna a ni. Pathian fak kan duh chhan chu nuam kan tih theihna tur ni lovin thil ṭha ti tur zawkin a ni. I nunin a tinzawng ngar ngar tur chu hlimna/phurna [feelings] ni lovin Pathian awmpuina hriat reng zawk chu a ni. 

Chu chu ṭawngṭaina kaltlanga Pathian chibai bukna chu a ni. Chu chu eng lai pawha kan ṭawngṭai dan a ni. 

Ngaihtuah zui atan. 

• Vawiin hian ṭawngṭaina hmanga thaw lak dan chu han zir teh. I rilru put hmang leh mite nena in inlaichinnaah chuan eng nge danglamna i hmuh? 

• Mita i thil hmuh theih zingah chuan Pathian awmpuina engin nge hriattir thei che? 

• Instrument emaw infiamna eng emaw i thiam theih dan tur han ngaihtuah la. Chutiang chiah chuan Pathian chibai bukna thinlung nei tur chuan eng anga mahni inthununna leh inpekna nge ngai ang? 

[Lettu: Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...