Isua Tih Danin
- Rick Warren
- November 5, 2025
"Chutichuan, nangniho hi Krista taksa chu in ni a, a pengte in ni ṭheuh bawk a," (I Korinth 12:27)
Pathianin a chhungkua, kohhran hi inmamawh tawn tur leh he khawvela a thil tum hlenchhuak tura a din a ni a. Kan zavai hian tih tur bik neiin min siam a, chu hna chu thawk ho turin min duh a ni.
Kohhran chhungkua nena inzawm a pawimawh em emna chhan chu koh i nihna tipuitlinga ringtu dangte rawngbawlsak turin a ni. Bible chuan,"Chutichuan, nangniho hi Krista taksa chu in ni a, a pengte in ni ṭheuh bawk a," (I Korinth 12:27) a ti.
I rawngbawlna kha Krista taksa tan a ṭul em em a ni. Mi tin hian tih tur chanvo kan nei vek a, chu kan chanvo chu a pawimawh vek a ni. Pathian tan rawngbawlna te lua a awm lova. Awmzia a nei vek a ni.
Kohhrana rawngbawlnaah hian engmah pawimawh tham lo a awm lo. Ṭhenkhat a hmuh theih a, a ṭhen a hmuh theih lohva, puanzar phenah hna an thawk a, mahse an hlu vek mai - thil tê leh hmuh theih loh rawngbawlna hian danglamna lian tak a thlen fo. Kan inah hian êng pawimawh ber hi eng chhit khai bawr lian tak (chandelier) chaw eina pindana mi hi ni lovin, zâna êng chhit chi tetakte - zâna han thawha ke chhuih palh miah lova min vengtu hi a ni.
Lenzawng leh pawimawhna hian inzawmna engmah a nei lo. Rawngbawlna tinreng hian awmzia a nei vek, a chhan chu kan inring tawn kual vek a ni.
I taksa pêng pakhatin hna a thawh loh chuan i damlo ang a. A dang zawng chuan an tuar ang. I thin khan amah chauha awm tumin:"Ka hah lutuk! I taksa tan hna ka thawk peih tawh lo! Mahni inchawma kum khat chawlh lak ve ka duh. Ka tana ṭha ber tur thawh ve ka duh tawh! Pêng dangin thawk ve tawh rawh se."
Eng nge lo thleng ta ang le? I taksa chu a thi mai dawn a ni.
Vawiinah hian tualchhung kohhran sâng tam tak chu ringtu ni si a, an thawh duh loh avangin an thi mek a ni. Thlirtuah ṭangin an ṭhu tawpa, Krista taksain a tuar ta a ni.
Pathian chuan rawngbawl turin i ngaihtuah aia nasa zawk daihin a ko che a. Rawngbawlna nun nei turin a siam che a ni: "Thil ṭha ti atan Krista Isuaah chuan siama awmin, ama kutchhuak kan ni si a, chu thil ṭha tih chu kan awmna turin Pathianin a buatsaih lawk a ni," (Ephesi 2:10). Mi dangte rawng i bawlsak hian a nihna takah chuan Pathian rawng i bawl a ni.
Mi dangten kohhrana hna an thawh hian lo lungawi ve ngawt suh. I thawh ve hun a ni tawh.
Ngaihtuah zui atan.
Eng vangin nge kohna i dawn chu ringtu dangte ṭanpuina tel lova hlenchhuah a harsat em em?
Eng kawngin nge a rawngbawl turin Pathianin a duan che? Heng theihna mimal pianken, tawnhriat leh thlarau thilpekte hian eng angin nge rawngbawlnaah ṭangkai zawk tura a puih che?
Eng angin nge Pathian hian tê zawk leh rawngbawlna langsar lo zawkte hmanga i nunah emaw, mi dang nunah emaw danglamna a thlen?
[ Lettu: Marova Punte ]

No comments:
Post a Comment