Saturday, November 22, 2025

LAWMTHU SAWIIN PATHIAN CHAWIMAWI RAWH

_Thlirna thlak danglam_

- Rick Warren 
- November 22, 2025
_"Lawmthu sawi hi min chawimawitu thilhlan hlu tak a ni."_ (Sam 50:23, NLT)

Tu emaw hnenah lawmthu i sawi apiangin amah kha i chawimawi tihna a ni.

Entir nan, ka nupui hnenah, "Duhtak, lawmthu sawina zanriah ropui tak i siam avangin ka lawm e" ka tih chuan ka nupui ka chawimawi tihna a ni. Ka pizawn hnenah, "Ka nupui atan Kay-i i lo neih avangin ka lawm e" ka tih chuan ka pizawn chu ka chawimawi tihna a ni. Tu emaw hnenah, "Kawngka min hawnsak avangin ka lawm e" emaw "I rawn inkhawm theih avangin ka lawm e" emaw ka tih chuan chu mi chu ka chawimawi tihna a ni.

Mite chunga kan lawmna kan lantir hi midangte kan chawimawina a ni.

Bible pawhin Pathian chunga in lawmna in lantir hi in chawimawina a ni a ti. Hei hi Pathianin Sam 50-naah heti hian a sawi, _"Lawmthu sawi hi min chawimawitu thilhlan hlu tak a ni."_ (Sam 50:23, NLT)

Engvangin nge lawmthu sawi hi thilhlan a nih? A chhan chu kan rilru leh ngaihtuahna a la a; lawmna tur kan zawnnaah hian kan hun leh tha kan seng a ni.

Ka nupuiin ka tana thil ṭha tak a ngaihtuah chhuahin, "Ka lawm e" ka tih kha a duh ngei ang. Mahse chu chauh chu ka sawi chuan, "Min hmangaih tak tak em le, nge ni thil ka tihsak avang chauh hian min hmangaih?" tiin mak a ti viau ang.

Lawmthu sawina kawngah hian a hma aia sanga ke ka pen chhoh a ṭul - a awmzia chu ka nupui hnenah a thiltih avang chauha lawmthu sawi lovin ka tan tunge a nih avang pawhin lawmthu ka sawi ang. Chu chu lawmthu sawina ril zawk leh puitling zawk chu a ni.

I fate hnena pawisa i pek chauh kha i hnena lawmthu an sawi hun ni ta se, "Min hmangaih em le, nge pawisa chauh kha an duh zawk?" tiin i ngaihtuah ngei ang.

Pathian hnenah kha zirlai kha i zir theih avang te, ei tur a pek che avang te leh i tana a thiltih avangte chauha lawmthu i sawi chuan, "Pathian hi ka hmangaih tak zet em le, nge a thilpek ka dawn te chauh hi ka duh?" tiin inzawt rawh.

Pathianin thil a tihsak che avang ringawt ni lovin a nihna avang zawka lawmthu sawi zir rawh.

Pathian hnenah a nihna avanga lawmthu i sawi chuan i ṭawngṭai dan pawh hetiang hian a danglam ang, "Lalpa, i finna hi ka finna aia a san em avangin lawmthu ka hrilh a che. Keimah aiin ka lawmna tur i hriat avangin lawmthu ka hrilh a che. Ka danglam fo laiin i danglam ve ngai lo va, min hmangaih leh khawngaihnaah lawmthu ka sawi a, dik taka roreltu i ni. Thil ka hriatthiam loh lai pawha ka tana ṭha ber tur i hriat zel avangin ka lawm e." 

Hetianga lawmna hi, "Lalpa ei tur min pek avangin ka lawm e," tih aṭangin "Lalpa i nihna avangin ka lawm e" tihah a zuang dawrh a ni. Hetiang lawmna hian Pathian a chawimawi a thlarau nunah zung ka kaih nghet bawk a ni.

Ngaihtuah zui atan.

Zir chianna tam tak aṭanga a lan danin lawmna hi mihringte rilru hrisel ber a ni. Engvangin nge anih i rin?

Engtinnge lawmna danglam hian Isua a hnaihtir che?

Tunkar chhung hian nitin, Pathian hnena lawmthu sawina tur kawng 10 ngaihtuahin bul ṭan teh. Kartawpah chu chuan engtinnge i nungchang leh hun hman danah nghawng a neih a en let la. 

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...