Sunday, November 23, 2025

LAWMNA NUNIN RINNA A ṬHAN LENTIR

_Thlirna thlak danglam_

- Rick Warren 
- November 23, 2025
_"Amahah chuan zung kaiin inphun nghet ula. An zirtir che u rinna chuan intichakin, lawmthu sawina nun lo nei ula."_ (Kolossa 2:7, GW)

Rinna ṭhan lenna kawng anih avangin lawmna nun neih hi Pathian duhzawng a ni. 

Engtinnge lawmna chuan i rinna a ṭhan lentir? Hun khirh tak a lo thlenin chu chu a thleng ṭhin - thilin awmzia a nei lo ni anga a lan lai te, i hriatthiam loh hun te, i ṭawngṭaina chhana a awm loh hun te leh i duh dan anga engmah a kal loh huntein. Chung hun harsa karah pawh, "Lalpa, engkim i thunun tih ka hria. Min hmangaih tih ka hria a, hemi aṭanga hian thil ṭha tak i chhuahtir thei tih ka hria. Ka harsatnate aia i len daih zawk avangin lawmthu ka hrilh a che" ti a ṭawngṭaiin a thleng ṭhin.

Tute pawhin thil ṭha avangin Pathian hnenah lawmthu an sawi thei. Mahse hun ṭha loah pawh Pathian hnena lawmthu i sawi thei chuan zung i kai nghet sauh anga, rinna kawngah i ṭhang lian zel ang.

Habakuka khan hun harsa tak a pal tlang a. Heti hian a ti, _"Theipui thing pâr vul dawn lovin, grêp hrui rah dawn hek suh seng, Olive thing pawh rah lovin, povin eitûr chhuah dawn lo seng, huang ata ran rual tibovin, ran inah ran awm lo mah seng. Ka lawm zel ang, LALPA-ah chuan, ka chhandamna Pathianah chuan ka lâwm cheu dawn."_ (Habakuka 3:27-18)

Thil ṭha lo tam tak lo thleng karah pawh Habakuka chuan lawmna nun a nei tlat. Engin nge a lawmna thlen? Pathianah lawmna a zawng a ni: "Ka chhandamna Pathianah chuan ka lawm cheu dawn" tiin.

I nunkawngah sual chhuah tur tam tak i nei a ni thei, Lalpa chu i Chhandamtu anih avangin lawmna i nei thei. I kiangah a awm zel ang. Malin i awm lo. A kalsan lo che. Chu chu lawmthu sawina tham a ni!

I nun kha a khirh em em laiin Pathian hnenah lawmthu i sawi thei em? Chu chu i rinna thukna tehna a ni.

Kolossa 2:7-ah chuan heti hian kan hmu, _"Amahah chuan zung kaiin inphun nghet ula. An zirtir che u rinna chuan intichakin, lawmthu sawina nun lo nei ula."_ (GW)

Pathian duhzawng chu lawmna danglam tak hi a ni - engkima lawmthu sawi hi. Pathian chungah a nihna avang chauh pawhin lawmthu i sawi thei. Hun harsa tak karah pawh i hnena awm a tiam a, chuvang chuan harsatna karah pawh i rinna a ṭhang lian zel tih i hre thei ang.

Ngaihtuah zui atan.

Hun khirh tak i hmachhawnin engtinnge i lo dawnsawn tlangpui? Pathianin engtinnge i hmachhawn a duh ni a i rin?

Pathian chawimawi tih hi engnge a awmzia?

Hun khirh tak karah engtinnge Pathianin i rinna a tichak zel ni a i hriat? 

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...