Saturday, November 29, 2025

KHAWNGAIHNA VANG VEK A NI E

_Thlirna Thlak Danglam_

- Rick Warren 
- November 29, 2025
_"I rin khan Pathianin khawngaihna avangin a chhandam che. Pathian thilpek a ni a, i thawh a tel ve lo."_ (Ephesi 2:8, NLT)

I chunga khawngaihna a lantir avangin nitin Pathian hnenah lawmthu i sawi thei ang.

Khawngaihna chu engnge ni? Pathianin i phu vang ni lova i mamawh avanga a pek che kha khawngaihna chu a ni.

I nuna engkim kha Pathian khawngaihna thilpek a ni. Tuna boruak i hip mek pawh kha Pathianin i chunga khawngaihna a lantir a ni! I nuna thilpek ṭha leh hlu takte khan hmangaihna avanga a petu che Pathian a ni tih an lantir.

Pathian khawngaihna vang vek a ni e.

Ephesi 2:8-ah chuan heti hian kan hmu, "I rin khan Pathianin khawngaihna avangin a chhandam che. Pathian thilpek a ni a, i thawh a tel ve lo."_ (NLT)

Vanram pawh hi Pathian khawngaih thilpek a ni. Vanram kawng zawh turin i thawk chhuak thei lo a. Vanrama lut tur pawhin i thawk chhuak zo lo. Vanram hi thamna emaw sum leh paia lei theih emaw a ni lo. Pathian khawngaihna thilpek a ni.

I thawh chhuah theih loh avangin i tih theih chu lo dawnsawn mai kha a ni - chu chu he khawvelah hian i sual avangin Isua Krista i tan a thi a, tichuan Pathian nen inremin i lo awm leh thei ta tih i rin khan a lo thleng ang. Nangmaha i tih theih loh avangin Isuan a tihsak che a ni. Khawvelin khawngaihna thilpek a dawn ropui ber a ni.

Sam 103-naah Davidan Pathian khawngaih thilpek tam tak a tarlang. Pathiana rinna kan ngahin a hnena lawmthu kan sawina tur tlem tarlang ila:

• Kan sual zawng zawng min ngaidam. 

• Min tidam.

• Hremhmun a lut tur min chhanchhuak. 

• Hmangaihnain min hual vel. 

• Kan nun thil ṭhain a tikhat. 

• A phu lote chungah pawh khawngaihna leh lainatna a lantir. 

• Thinrim mai mai lo mi a ni. 

• Mi huatna rilru a nei reng lo. 

• Hremna phu viau mahila kan phu tawk angin min hrem ngai lo. 

Pathian laka kan hel hnu hian kan phu tawk hremna hmu dawn ila - Pathian kan mamawh lo a ni ti ila - kan thaw hi a tawp nghal ang. Mahse Pathian khawngaihna avangin kan la thaw hram hram a ni.

Chu khawngaihna avang chuan Pathian hnenah lawmthu sawi rawh! Tum viau mahila sualah kan tluk leh ṭhin avangin chu chu kan mamawh a ni. Engtik lai pawhin a khawngaihna kan mamawh a, khawngaihna chu min pe turin engtik lai pawhin a inring reng a ni.

Pathian khawngaihna chu hmuh theihin a awm reng. Vawiin hian i chheh vel kha han thlir la, i chunga Pathianin khawngaihna a lantirah khan lawmthu sawi rawh - thilpek, lainatna, hmangaihna tinreng te.

Ngaihtuah zui atan.

Engvangin Pathianin i chunga khawngaihna a lantir che thlir leta lawmthu i sawi fo a pawimawh?

I nun englai berah nge Pathian khawngaihna a lansarh? Vawiin hian i nun khawi laiah nge a khawngaihna a thawh?

Pathian khawngaihna avanga lawmna nun i neihin miten i nunah engnge an hmuh ang? 

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...