_Thlirna Thlak Danglam_
- Rick Warren
- November 30, 2025
_"Kan tawrhnaah pawh kan lawm a ni, a chhan chu tawrhna chhan chhelna a siam a, chhelna chuan nunphung a siam a, nunphung chuan beiseina a siam a ni."_ (Rom 5:3-4, ESV)
Thil tihdanglam hi a awlai lo fo. Mahse i nuna Pathianin danglamna a thlenah khan i lawm fo thei ang.
Engvangin? A chhan chu i thil paltlang kha engpawh nise Pathianin i tana ṭha zawk atan a hman theih vang a ni.
Rom 5:3-4 ah chuan heti hian kan hmu, _"Kan tawrhnaah pawh kan lawm a ni, a chhan chu tawrhna chhan chhelna a siam a, chhelna chuan nunphung a siam a, nunphung chuan beiseina a siam a ni."_ (ESV)
I nunah danglamna harsa tak a thlenin i lawm em? A chang chauhin a ni ang tiraw. Mahse Pathianin i nungchang siam a duh avangin hlimna i chan a duh - chu nungchang chu vanrama i chhawm tur awm chhun a ni.
I eizawnna emaw i pawisa emaw kha i chhawm dawn lo. I hmingṭhatna emaw i nuam tihzawng te emaw i chhawm dawn lo. I thawmhnaw, TV, leh i lirthei i chhawm dawn hek lo. I dam chhung zawngin neih belh reng reng tumin i inchhek arbawm hluai thei. Mahse vanram kai tur chu nangmah chauh kha i ni - he khawvela i awm laia i din a kha.
I nungchang siam kha a pawimawh em avangin Pathianin a siam nan engpawh a hmang thei, natna te pawh, amah i an theih nan - hmangaihna, hlimna, remna, dawhtheihna, ngilneihna, ṭhatna, rinawmna, zawldawhna leh mahni inthunun theihnaa khat a ni ang hian. Hengte hi chhel taka i nun chhunga i nuna nei tura Pathianin a duh che chu a ni.
I thil tawn te leh midangte nangmah ep zawnga an lo chet lai pawhin, _"I chhungah Pathianin hna a thawk a, a duhzawng anga i awm theih nan duhna leh thiltihtheihna a pe che a ni"_ (Philippi 2:13, NLT). _"Keimahniah Thlarau Thianghlimin hna a thawh avangin amah kan lo ang telh telh ṭhin"_ (2 Kor. 3:18, TLB) tih a ni bawk.
I nih tur ang i la ni lo. Mahse a khawngaihna avanga Pathianin amah ang tura a tihdanglam zel che avangin lawmthu i sawi thei ang.
Pathian khawngaihna avangin a hma ang kha i ni tawh lo. Pathian khawngaihna avangin vawiina i nihna kha amah vang a ni. Pathian khawngaihna avang vêkin i nih tur i la ni famkim lo a, nangmahah a thawk mek a ni.
Ngaihtuah zui atan.
Nawmna aia nungchang ṭhan lenna duh zawk turin engnge ngai ang?
Philippi 2:13-ah chuan nangmaha Thlarau Thianghlim awm khan thil ṭha leh Pathian duhzawng ti turin thiltihtheihna a pe che tih min hrilh. Chu chuan engtinnge a fuih che?
Tuna i thil paltlang mekah khan Isua i an leh zual theihna turin i nunah Pathianin eng hna nge thawk se i tih?
[Lettu: Mapuia Fanai]
No comments:
Post a Comment