Thursday, September 4, 2025

SAWISELTU I BEIH A NGAI LO

_Nun Atana Hmanraw Bawm_

By Rick Warren
— September 04, 2025
“Lamkal ka tîr a, “Hna pawimawh tak ka thawk a, ka lo kal chhuk thei lo. Nangni be tûrin ka lo chhuak hman lo, ka hna ka tibahlah thei lo,” ka tihtîr a. Vawi li, thu ngai hlîr an rawn sawi a, a ngai hlîrin ka lo chhâng a.” [Nehemia 6:3-4]

Pathianin he khawvelah hian tih tur eng emaw nangmah chauhin i tihhlawhtlin theih tur neiin danglam takin a siam che. 

Mahse sawiseltu eng emaw zat i lo hmachhawn tawh ang. “Nang chu i ni lo. I ngaihdan a dik lo. I tih dan pawh kha a dik lo,” ti tein an sawisel ang che. 

Thuthlung Hluia Nehemiah chanchin kha a entirnan hmangin han ngaihtuah chhin teh. Nehemia kha pastor emaw puithiam emaw pawh a ni lo. Sumdawng a ni. Israel ram kha Babulon chuan hnehin salah mite a hruai a. Israel mite kha kum 70 chuang ram dangah an awm a nih kha - chumi hnu chuan Babulon mite chuan an hawtir leh ta a ni.  

Jerusalem chu tihchhiat niin invenna pawh a nei mumal tawh lova. Mahse Nehemia khan ngaihdan ropui tak neiin hmalak a tum ta a ni. He khawpui hi ka din thar leh ang tiin a ngaihtuah a nih kha. A hual veltu kulhte chu din ṭhain ka humhim ang a ti a ni. 

Nehemia chanchin aṭanga chiang taka kan hmuh chu hmalakna reng rengin dotu a nei deuh zel tih a ni zui. 

Nehemiah tan eptu an lo lang nghal. Israel hmelmate chuan Jerusalem chu hungna neia a awm an duh lo. An khawpui hungna kulh an sa ṭha tur chu do chi kimin an do ta a ni. An nuihzat a, an phiar a, an vau bawk. Chung zawng zawng chuan a tihbuai theih tak lovah chuan inhmuhkhawmna eng eng emawa pawt pengin tihkhawmuan an tum zui leh ta zel a ni. 

Nangmah sawiseltu – nangmah dotute pawhin Lalpan hna i thawh tura a pek che ti sukuk turin an thiamthil chi hrang hrang an thawh ang. An cheksawlh che ang a, mite bulah an rel ang che a, Pathianin ti tura a tih che chu ti lo turin an vau bawk ang che.  

Anmahni chu ngaithla lovin Nehemia ang khan ti ve zawk ang che: “Lamkal ka tîr a, “Hna pawimawh tak ka thawk a, ka lo kal chhuk thei lo. Nangni be tûrin ka lo chhuak hman lo, ka hna ka tibahlah thei lo,” ka tihtîr a. Vawi li, thu ngai hlîr an rawn sawi a, a ngai hlîrin ka lo chhâng a,” tiin [Nehemia 6:3-4]

Nangmah dotute chu i beihlet chiam a ngai lo. Awmzia a awm lo. Pathianin i tana a thiltumte chu a thim zawnga thlirtute chu i buaipui dawn a nih chuan hun i khawhral mai mai ang. 

Nehemia khan a mite sawiselna lakah a hna kha sawimam a tum lo. Nang ngei pawh i insawifel a ngai lo. Sawiseltute sawiselna chu ama liam liamin liam mai teh se. 

Engtik niah emaw chuan Pathian hnathawh i nuna lang chhuak chu hai theih a ni chuang lo vang. Vawi khat bul a ṭan tawh chu a thawk zo ngei dawn a ni tih i ring thei ang. 
Ngaihtuah zui atan. 

• Sawiseltute ngawihsan mai chu eng vangin nge a harsat em em? 

• Nangmah sawiseltu leh dotuten chu engtin nge i lo ngawihsan tawh Pathian i zuina kawngah chuan? 

• Vawiina i thil zir aṭang hian engtin nge sawiseltute chu i hmachhawn ang? 

[ *Lettu:* Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...