_Harsatna Paltlang Tura Pathian Dil_
- Rick Warren
- Septeber 27, 2025
_"Chutichuan, thil engkim miin in chunga an tiha in duh tur ang apiang chu, mi chungah pawh ti ve rawh u; chu chu Dan thu leh Zawlneite thu a ni reng si a."_ (Matthaia 7:12)
Mi tam tak chuan *Dan rangkachak* an hria; mahse, ṭawngṭaina nen a inzawm tih an hre kher lo mai thei: _"Chutichuan, thil engkim miin in chunga an tiha in duh tur ang apiang chu, mi chungah pawh ti ve rawh u; chu chu Dan thu leh Zawlneite thu a ni reng si a."_ (Matthaia 7:12)
Ṭawngṭaina nena inzawm nei awmin a lang lo a ni mai thei; mahse, an inzawm tlat a ni. Mi tu emaw in ṭawngṭaisak tura a ngen chein, engtiangin nge ka ṭawngṭai ang? Engtinnge bul ka ṭan ang? tiin i ngaihtuah ngai em?
Hetiang hian i ti thei: miin an ṭawngṭaisak dan tur che a i duh ang tak khan i ṭawngṭaisak ve thei. Ralmuanna, himna leh hlawhtlinnate neih i duh em? Lutuk e. Anih chuan chuti ang tak chuan midangte tan ralmuanna, himna leh hlawhtlinnate chu dilsak rawh. Sum leh paia Pathian malsawmna i duh em? Aw. Anih chuan midangte tan sum leh pai malsawmna dilsak rawh. Taksa hrisel tak neih i duh em? I duh lutuk ang. Midangte hrisel nan dilsak rawh. I hun hlawk zawk a hman i duh em? Kan duh vek ang chu! Midangten fing taka an hun an hman thiam theih nan dilsak rawh.
Pathian chu hmangaih em emtu che a ni. Hmangaih taka a enkawl che ang chiah khan midangte pawh en turin a duh che. Pathianin i chunga ti tura i duh ang apiang kha midangte tan pawh dilsak ve rawh.
Hetiang ṭawngṭaina hian Isua anna kawngah a pui che a chhan chu, mahni hmasialna a tel loh avangin.
Joba 42:10-ah chuan, _"Tin, Joba chuan a ṭhiante pathum tana a ṭawngṭai chuan LALPAN Joba chan chu a tiṭha leh ta a; LALPA chuan Joba chu ahmaa a neih let hnih a pe leh ta a"_ tih kan hmu.
Joba kha khawvela mi hausa berte zinga mi a ni. Nikhat chu a engkim a chan vek. A fate thah an ni a. A sumdawnna a tlu chhia a. A thlai te an kang ral a. Natna rapthlak tak mai a tuar a. Nun hrehawm tak a hmang a ni.
Joba lehkhabu khan, _"Joba chu ama tan a ṭawngṭaiin Pathianin a chhang"_ a ti lo. A ṭhiante tana a ṭawngṭaisak khan Pathianin mal a sawm zawk a ni.
Pathian chuan mahni hmasial lo turin a duh che. Midangten an harsatna an paltlang theih na tura i ṭawngṭaisak chuan nangpawhin i hrasatnate i paltlang theih nan Pathianin a pui ang che.
Ngaihtuah zui atan
Vawiin hian mahni tana i ṭawngṭai ang khan tu tan nge i ṭawngṭai theih le?
I nuna Pathian a chetna hmanraw ṭha ber chu ṭawngṭaina hi niin i hria em? I rin chuan engtinnge i ṭawngṭai dan a nghawng?
Mite hnena i ṭawngṭaipui tur thu i hrilh khan eng ang ang chiahin nge i hriat reng? Engtinnge mumal zawka i zawm theih nan i tih ang,?
[Lettu: Mapuia Fanai]
No comments:
Post a Comment