_Harsatna Paltlang Tura Pathian Dil_
- Rick Warren
- September 26, 2025
"Chutichuan, nangni mi sual mahin in fate thil tha pek nachang in hriat chuan, in Pa vana mi chuan a diltute chu thil tha a pe zawk em em dawn lo vem ni?" Matthaia 7:11.
Pawisa nawi rawlha ei leh in tur tichhuak thei khawl hian thil ṭha ber ber a nei vek lo tih i hria em? Hetiang khâwl aṭanga donut i lakchhuah hian Krispy Kreme emaw Dunkin emaw a tluk lo tih i hria em? Hetiang khâwl aṭanga sandwich i la chhuak a nih chuan chaw dawra kal pawh i duh zawk maithei a ni.
Pathian chuan i tana ṭha ber tur chiah a pe ang che. A ṭha ber dawttu emaw a thlakna tur thil ṭha lo tak emaw ni lovin.
"Chutichuan, nangni mi sual mahin in fate thil tha pek nachang in hriat chuan, in Pa vana mi chuan a diltute chu thil tha a pe zawk em em dawn lo vem ni?" Matthaia 7:11.
Pathian chu duh duh lâk chhuahna khâwl ang hi a ni lova. Milian ina an chhiahhlawh emaw, ramhuai lianpui amah kotute rawngbawlsak ṭhin genie emaw, chhiahhlawh emaw ang hi a ni lo. Tichuan, eng vangin nge i mamawh chu a hnenah i dil ang? A chhan chu i Pa a ni a, nangmah i inhmangaih ai pawhin ani chuan a hmangaih zawk daih che a ni.
I ṭawngṭaina chhân a duh a, i ṭawngṭaina chhâng turin a nghâk reng che a ni.
Ṭawngṭai hian zâm viau tur a ni lova. Chiang lo nuaia sawi tur pawh a ni lo. Mahni inring tawk tak chungin, "Lalpa, hei hi ka mamawh," ti tawp zel ṭhin rawh. Chu ṭawngṭaina chu a ṭha tâwk em em a ni.
Dil nachang i hria emaw hre lo emaw ani chuan i tâna ṭha ber tur chiah a pe ang che. Hei hian i ṭawngṭainaah inrintawkna a pe dawn che a ni.
I dil loh avanga i mamawh i neih mai loh pawh a awm ang. Chumi chungchang chu Pathian hnenah sawi rawh. Ani chuan i tana ṭha ber tur a pe dawn che tih ring ang che.
Ngaihtuah zui atan.
I tana ṭha ber tur Pathianin a pe dawn che tih i ring tak tak a nih chuan eng thil nge inringtawk tak chunga i han dil ang?
Engtikah khan nge Pathianin i dil ni miah lo a pek che, mahse i mamawh ni a i hriat ai daiha ṭha si kha?
Mi tu emaw i hriat zawng tak ṭawngṭai nun nei reng ṭhin kha han ngaihtuah teh. Engtin nge Pathian nena an inlaichinna chu i han sawi fiah ang?
[ *Lettu: Marova Punte* ]
No comments:
Post a Comment