_Nun Atana Hmanrawn Bawm_
- Rick Warren
- September 07, 2025
_"Thil hmuh theihte hi en lovin, thil hmuh theih lohte chu kan en zawk si a; thil hmuh theihte rei lo te atan a ni a, thil hmuh theih lohte erawh chu chatuan atan a ni si a."_ (2 Kor. 4:18)
Mi tam zawk chuan harsatna lian tham an tawh hma chu an hlutna an chhut lo emaw an thil hmuh dan an inzawt ngai lo.
Hliam na tak i tawrh hunah chauh i nun innghahna bulpui kha i zirchiang zawk fo ṭhin. I ngaihṭhat nan, hmuh i nawm nan, hausakna leh thuneihna i khawl khawm theih nan i nun i hmang ṭhin tih i hrechhuak a ni thei. Mahse harsa lian i tawh hun meuh chuan chung aia nun innghahna pawimawh zawk chu i mamawh tih i hre ṭhin.
Engvangin nge i ngaihhlut thil zir chiang tura hun khirh thlen hun i nghah kher ang? Vawiin hian engnge i ngaihhlut ang tichiang nghal zawk rawh. He zawhna khirh tak inzawt hian bul ṭan rawh: engin nge chatuan daih tur?
Khawvel chuan tun hun hi a ngaihlu. Naktuk chu engah mah ngai suh tih hi a thu ken a ni. Nakum hi a pawimawh lo. Vawiin aṭanga kum sangkhat lo thleng tur phei chu a pawimawh lo hle. Chatuan leh vanram te hi engmah lo mai a ni. Chuvang chuan vawiin atan nung la, i tan nung rawh tiin min hrilh. Vawi khat chauh i nung dawn!
Mahse chu'ng chu a dik lo tih kan hria, a chhan chu Bible-in thil dang daih a sawi. _"Khawvel hi a chaknate chawpin a boral mek a ni, Pathian duhzawng titu erawh chu kumkhuain a awm reng ang."_ (1 Johana 2:17).
Thlemna i tawhin engnge lo thleng ngaihtuah la. Thlemna hi thil ṭha leh ṭha lo indona emaw, engnge ṭha bera engnge ṭha ber lo tih indona emaw a ni mai lo.
Thlemna chu tun leh nakin inbeihna a ni. Tunah hian Pathian duhzawng tiin nakinah a rah ka la seng ang nge, tunah ka duhzawng ka ti anga nakinah a rah ka la seng ang?
Bible chuan hetiang ti tur hian min zirtir, _"Thil hmuh theihte hi en lovin, thil hmuh theih lohte chu kan en zawk si a; thil hmuh theihte rei lo te atan a ni a, thil hmuh theih lohte erawh chu chatuan atan a ni si a."_ (2 Kor. 4:18)
Hun khirh tak i hmachhawn emaw hmachhawn lo emaw engah nge i nun a innghah tih zir chiang rawh. I bansan dawn nge i nun i tiboral dawn? Khawiah i rinna i nghah tih zawhna khirh tak kha inzawt la, chutah chuan eng hlawkna chiah nge i hmuh zir rawh.
Tichuan Pathian thutaka i nun din turin thutlukna siam la. Chu chuan chatuan a daih ang a, i tluchhe ngai lovang.
Ngaihtuah zui atan.
Hun khirh tak i tawh lai kha han ngaihtuah teh. Chu hun harsaah chuan eng zirlai nge i zir chhuah le?
Vawiin hian engah nge i nun a innghah? Pathian Thu-a i nun i nghah theih nan engnge i siam rem ngai le?
Hmuh theih loh thil te i en theih lohna turin engin nge i rilru la peng?
[Lettu: Mapuia Fanai]
No comments:
Post a Comment