_Tumruhna Danglam_
- Rick Warren
- August 02, 2025
_"Tin, Juda mipuite chuan, 'Thawktute tha a chau zo tawh a, bawlhhlawh lah a nasa si a; kulh chu kan siam thei dawn ta lo a nih hi,' an ti a."_ (Nehemia 4:10, GW)
Hnualna hi tihdam theih a ni. Ka hnuala ka beidawn viau chuan Nehemia lehkhabu hi ka keu vat ṭhin. He Israel-te hruaitu ropui tak hian beidawnna/hnualna chhan pali a awm niin a hria.
*A hmasa berah chuan i chau ngawih ngawih ṭhin.* Nehemia 4:10-a hnathawktute an chau ngawih ngawih ang khan i chau ve a ni: _"Tin, Juda mipuite chuan, 'Thawktute tha a chau zo tawh a, bawlhhlawh lah a nasa si a; kulh chu kan siam thei dawn ta lo a nih hi,' an ti a."_
Mihring chu kan chau ṭhin. Bati hi a hmawr tawn tawnah i hal thei lo. I lo chauh viau lai khan i nunah engmah i tihdanglam a ngai kher lo thei. Hahchawlh mai kha i mamawh chu a lo ni reng thei! A chang chuan kan chet rau theih ber chu rei lo te chhin zawk hi a ni thei tlat.
*A pahnihnaah chuan, i beidawng ṭhin.* Nehemia khan hmuntinah bawlhhlawh a awm a, a tam em avangin kulh din thar lehna an dal a ni a ti hial. I nunah "bawlhhlawh" i nei ve em? Thil thar eng emaw i tih ṭan apiangin bawlhhlawh (i tumram thlen theih lohna tura daltu che) a inthuah tup tup ṭhin tih hi i hrethiam ṭhin em?
Hunbi neia i tihfai loh chuan i hmasawnna tur a dal ang che. I pumpelh thei lo, chuvang chuan i tum i hlalh lohna turin i hriat chian a, paih bo vat i zir a ngai a ni.
*Pathumnaah chuan hlawhchham niin i inhria.* Nehemia mi leh sate khan an ruahman lawk ang huna an hna an zawh hman loh avangin an inrintawkna a bo a. "He kulh hi kan din thar leh thei a ni kan lo ti kha kan a hle mai" tiin an ngaihtuah niin a lang.
Mahse a hun tiam lawk saa ka tum ram ka thlen zawh lohin engtinnge ka tih inhria. Tum ram thar ka siam leh mai. Ka beidawng ngai lo. Mi zawng zawng an hlawhchham a; mi zawng zawngin thil àtthlak tak an ti bawk.
I hlawhtlin lohna kha a pawimawh ber a ni lo, i hlawhchhamna i chhan let dan kha a ni pawimawh.
Mahni i inkhawngaih em? Midangte i mawhpuh em? Thil tih theih loh a ni tiin i vui em? Pathian thiltum zirchiang lehin ke i pen leh em?
*A tawp berah chuan, hlauhthawnna i nei.* Hlauhna hian beidawnnaah min hruai lut thin. Nehemia bung 4-naah chuan hlauhnain a hnehte chu a thim zawnga thil thlir mi kawp ṭhin te hi an ni tih a sawi. I rilrua ngaihtuahna ṭha lote thunun dan kawng khat chu thil ṭha lo lama hun hman tlem hi a ni.
I hlauhna avangin i beidawng a, "Ka ti thei ngang tawh lo. He mawhphurhna hi ka tan a sang em a ni" i ti hial a ni thei. Sawisel i hlauh vang a ni thei a. Hlawhtlin phu lovin i inhria a ni thei bawk. Mahse i thunun loh chuan hlauhnain a tichhia ang che. Beidawnna dodal turin duhthlanna i nei, "Lalpa, he harsatna leh dinhmun, nangmah min entir lo ṭhintu hi thlir reng lo turin ka mit la sawn ang che" tiin i sawi thei.
I beidawnna kha inphuartir reng suh. Pathian hnenah a chhan zawng chhuak tura pui turin dil la, hmachhawn la, inrintawkna nen hmalam pan rawh.
Ngaihtuah zui atan.
"Bawlhhlawh" (i tum ram hmalam pan thei lo a hnualna pe ṭhintu che) khan Pathianin ti tura a tih che tipuitlin thei lo turin i hun leh tha a tihek ṭhin. I nunah eng bawlhhlawh nge i kawl?
Engtinnge tihnual ṭhintu che rilru dik lo i tihbo theih ang?
Beidawnna avangin i tum i thleng lo tawh em? Pathianin ti tura a tih che i tihpuitlin theih nan engtinnge hmalam pan tura ke i pen leh ang?
[Lettu: Mapuia Fanai]
No comments:
Post a Comment