Wednesday, July 16, 2025

NATNA HRILH ṬHEN HI A ZAHVE PAIH ANG A NI

_Thilmak I Beisei Laiin_

- Rick Warren
- July 16, 2025
"Lawmte chu lawmpui ula, ṭapte chu ṭahpui rawh u," Rom 12:15.

I nuna nangmah hnaih em emtu che khan nupa ṭang ṭhen a tawk maithei a, i pui theih dan tur kawng ṭha ber chu ṭawngṭaipui a ni. Kawng dang leh chu an natna mi dangte hnena hrilh ṭhen ve hi a ni.

Joba chuan a neih engkim deuhthaw a hloh khan, a ṭhiante chu amah tuarpui turin an lo kal a. Bible chuan, "Joba ṭhian pathumte chuan heng thil ṭha lo a chunga lo thleng zawng zawng hi an hriat chuan, mahni hmun ṭheuh aṭangin an lo kal a, amah tuarpui tur leh thlamuan tura a hnena lo kal hun an ruat tlang a." (Joba 2:11) a ti.

Natna leh lawmna chungchangah hian thudik ngaihnawm tak a awm. I lawmna mi dangin an ṭawmpui che khan a let hnih i hmu ang. I nuna thil ṭha, lo thleng min hrilh chuan, i lawmna chu a zual ngei ang.

Mahse hei hi natna nena a inletling hlauh thung. I natna mi dangte hnena i hrilh khan a letin a pung lo va, a zahve lai a kiam zawk a ni. Tichuan a nâ chu nangmah ringawtin i phur vek lo va. Mi dangin i phurrit chu an phurhpui che a ni.

Bible chuan Rom 12:15-ah chuan, "Lawmte chu lawmpui ula, ṭapte chu ṭahpui rawh u," a ti a. Thufingte 17:17-ah chuan, "Ṭhian chuan eng lai pawhin a hmangaih reng a, mangan ni atan unauva piang a ni," a ti.

Miin khawngaih an mamawh lo. Khawngaihna chuan, "I nat avangin a pawi ka va ti em," a ti a. Khawngaihna chu hla takah a ding a ni. Khawngaihna aiin thinlung taka an dinhmuna dinpui vena hi an mamawh zawk. Hei hi khawngaihna nen chuan a danglam daih a ni. Mi dinhmuna va dinpui vena chuan, "I natnaah hian ka na ve," a ti a ni. 

Mi tu emaw nupa ṭang ṭhen tawk hnena natna hrilh hi anmahni va elsenna a ni lo. A awmzia chu an bula va awma, thil dang sawi lova an natna va ṭawmpui hi a ni. A langa ṭha tak anga lan derna kha an mamawh lo va. A natna chungchanga i tih tum leh i sawi kha an mamawh hran lo. I thurawn pawh an mamawh hek lo. "A ṭha leh mai ang," lo ti ve ngawt suh. Lainatna tak tak chuan, "I nâ tih ka hria a, i bulah ka awm a, i natnaah hian ka na ve a ni," a ti.

I ṭhian na tuarlai bulah darkar engzat emaw engmah sawi lovin i ṭhu tawh em? Miin an kianga awm turin an mamawh che a ni. Thufingte 17:17 chuan, "Ṭhian chuan eng lai pawhin a hmangaih reng a, mangan ni atan unauva piang a ni," a ti. I hmangaih ten nupa inṭhen an tawh laiin ṭhian nghet tak ni ang che. An hnenah inlantir la, an natna ṭawmpui ve rawh. Chu chu ṭhian ten an tih Bible-in a sawi chu a ni.

Ngaihtuah zui atan.

I natnaah i ṭhian lo kala engmah sawi lova hnemtu che an awm tawh em? Engtin nge i awm?

Engvangin nge tu emaw na tak hnena engmah sawi lova awm hi a har ni a i hriat?

I hun kal tawha i natnaah Pathian awmpuina che i tawk tawh em? Chutiang chuan mi dangteah engtin nge i awm ve ang?

[ *Lettu: Marova Punte* ]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...