_Thilmak I Beisei Laiin_
- Rick Warren
- July 12, 2025
_"Tuin nge thiam loh chantir ang? Thia kha Krista Isua chu a ni si a; a ni, tho leh ta zawk a, Pathian ding lama awma min sawisaktu bawka kha a ni."_ (Rom 8:34)
Pathianin thil lo thleng tur engkim hi a hre lawk vek a. Engkim hretu anih avangin. A awmzia chu hun kal tawh, tun hun, leh hun lo la awm tur te hi a hre vek tihna a ni. Vawiin chawhnu lamah hian i nunah engnge lo thleng dawn tih pawh a hre vek tihna a ni. Karleh, thla leh, nakum, leh i hma hunah hrim hrim engnge i nunah lo thleng dawn tih a hre vek a ni.
A awmzia chu i nuna a lo thlen hmain a ṭawngṭaipui thei che tihna a ni.
Ngawi lawk teh. Pathian a ṭawngṭai ang maw? Aw ni e, englai pawhin i tan a ṭawngṭai alawm.
Krawsa khenbeh anih hma zan khan Isua kha a zirtirte nen an awm a. Petera khan intipa takin, _"Lalpa, i rual thih ka huam a nia . . . "_ (Luka 22:33, NCV) a ti a. Isuan Petera kha a hmangaih, mahse Petera kha thil ti ut ut mi a ni tih a hria. A tukah Petera khan vawi thum a phat dawn tih pawh a hre lawk. Luka 22:32-ah Isuan heti hian a ti, _"Nimahsela i rin a bo loh nan ka ṭawngṭaisak che a ni; i hawikir leh hunah nangin i unaute tinghet ang che."_ Isua - Pathian ni bawk chuan harsatna a paltlang turah Petera tan a ṭawngṭai tawh anih chu.
Chutiang chiah chuan kumin chhunga i thil paltlang turah Isuan a ṭawngṭaipui tawh che asin. Tunah tak chuan Isua hi vanah a awm a, a fate tan a ṭawngṭai a ni. I tan a dil a, i aiawhin a ṭawngṭai a ni.
Rom 8:34-ah chuan heti hian kan hmu, _"Tuin nge thiam loh chantir ang? Thia kha Krista Isua chu a ni si a; a ni, tho leh ta zawk a, Pathian ding lama awma min sawisaktu bawka kha a ni."_ Harsatna thlipui i kaltlang theih nan Isuan a ṭawngṭaisak che a ni.
Miin min ṭawngṭaisak hian ka lawm ṭhin! Mahniah ka inhre thei tlat ṭhin. Miin min ṭawngṭaisak miah loh hian a danglamna ka sawi thei. Miin min ṭawngṭaisak hi thil lawmawm tak pakhat a ni - mahse Pathian Fapa meuhin a ṭawngṭaisak che chu eng ang takin nge i lo dawnsawn le?
Bible chuan vawiin, karleh, emaw nakum emaw pawh nise eng thil pawh lo paltlang dawn la Isuan a ṭawngṭaisak che a ni a ti. I lamah a ṭang a. I Chhandamtuah i rin chuan i tan a ṭawngṭai ṭhin a ni.
Ngaihtuah zui atan.
Isua i tan a ṭawngṭai a ni. Chu thu chuan engtinnge Isua i hriat dan a nghawng?
I tan Isua a ṭawngṭai tih i hriat hian i thinlungah eng danglamna nge thleng?
Tunah khan eng harsatna nge i tawh mek? I tan Isua a ṭawngṭai tawh a ni tih hre turin Pa hnenah puihna dil rawh.
[Lettu: Mapuia Fanai]
No comments:
Post a Comment