_Thilmak I Beisei Laiin_
- Rick Warren
- July 9, 2025
"An lawng karah chuan an mangangin a hmu a, (thliin a ni lo lamah a nem si a) khawfing chah dawn lai velin dil chungah kea kalin an lam a rawn pan a," Marka 6:48.
I nunah khan thlipuiin a nuai hrep lai che i tawng tawh em?
Marka bung 6-ah Isuan a zirtirte chu ṭawngṭai tura a kal dawn avangin Bethsaida a kal turin a tir a. Lawnga kal nan a thui lo hle a, mahse zirtirte chu thlipuiin a nuai ta hrep mai a. Dil lai taka mangang taka an awm a hmuh chuan anmahni chu a rawn pan ta a ni.
Vawiinah hian zirtirte angin i nun chu a awm ve em?
Tun dinhmunah khan i hnaah emaw, in nupa karah emaw, sum leh paiah emaw pawh ni se tuna i awmnaah khan awm tumna i nei lo a ni maithei. I thunun theih loh thilin a nuai vel che pawh a ni mahna. Tunah khan i awmna tur hmun dik taka awm tura i inngaih laiin, chumi hmuna awm tur chuan i beidawng der pawh a ni maithei. I himna tura i tawlhkir a ngai a ni.
Hun rei tak liam tawhah khan duhthusam ropui tak, mahse i hlamchhiah tak a awm a ni maithei. Hmasawn lehchuan i tum tawh lo pawh a ni mahna. Mak ti takin, "Ka damchhuak zo ang em?" i ti pawh a ni thei e.
Tuna i dinhmun beidawnthlak takah khan Isua ni se engtin nge a tih ang? Marka 6:48 chuan, "An lawng karah chuan an mangangin a hmu a, (thliin a ni lo lamah a nem si a) khawfing chah dawn lai velin dil chungah kea kalin an lam a rawn pan a," a ti. Zirtirte a hnen lam pan turin a ti lo tih lo chhinchhiah ila. An ti thei lo tih a hria a ni. Chuvangin an hnen lam a pan ta zawk a. Hei hi nangmahah pawh a dik chiah a ni. I dinhmun beidawnthlak takah khan Isua a lo kal a ni.
Isua tuipui kama dinga tih tur sawia a au vak lo hi ka duh hle mai. Dinhmun manganthlak taka i awm laiin thurawn i mamawh lova. Thilmak i mamawh zawk a ni! Tu emaw lo lang tur i mamawh a, chu chu Isua a ni. Zirtirte mangang taka an awm laiin Isua a lo che ta a ni.
Hei hi chanchin ṭha chu a ni: Pathian chuan vaukamah dingin tih tur a hrilh lovang che; chu ai chuan lo pen chhuakin i manganna- i natna, i hlauhna, i thlaphanna leh i hnualnaah khan tawh che a duh a ni. I tan a lo kal e. Chutiang Pathian chu a ni!
Tunah khan kalsan niin i inhria a ni maithei, mahse i ni lo. "Fahrahin ka kalsan lo vang che u, in hnenah ka lo kal leh ang," (Johana 14:18). He thu hi a rintlak em em a ni.
Ngaihtuah zui atan.
Zirtirte mangang taka an awm laia Isua lo kal hian chanchin ṭha i ngaihdan engtin nge a thlak emaw a tihngheh?
I nuna i beidawn hun lai kha han ngaihtuah la. Engtin nge i hnenah Pathian a lo kal?
I nunah khan dinhmun beidawnthlak taka ding Pathian mamawh an awm em? Chumi tan chuan engtin nge i ṭawngṭai anga, engtin nge i puih theih ang?
[ *Lettu: Marova Punte* ]
No comments:
Post a Comment