Friday, July 4, 2025

ENG VANGIN NGE I THIL EN CHU A PAWIMAWH

Thilmak I Beisei Laiin

By Rick Warren
— July 4, 2025
“Chhang kan nei hauh lo mai le,” tiin an inbia a. Isuan a lo hriatin, “Engati nge chhang in neih loh thu ngawt in buaipui tâk? In la man lovin in la hrethiam lo ta cheu a ni maw? In va ngawng ve maw le!” [Mark 8:16-17]

Thil dik lo i thlir a nih chuan i nuna Pathian hnathawh chu i hmuh hmaih fo ang. 

I mit fukna chu tun hun leh tun dinhmun chauh a nih chuan Pathian ruahmanna lian tak chu i hmaih ṭhin ang. I nawmna mai i ngaihtuah a nih chuan i nungchangin hma a sawn lo vang a. I hlim lawmna ringawt i chhut a nih chuan thianghlimna i en kan ang. Tun hun chauha hlimna i buaipui a nih chuan chatuan atan i inpeih thei ngai lo vang. 

Tun dinhmun ngawr ngawr i thlir a nih chuan Pathianin i chhehvela kawng hrang hranga hna a thawh chu i hmu thei lo vang. Chu chu Marka ziakah zirtirte nuna a awm thu kan hmu thei. Bible chuan, “Anni chu a kalsan a, lawngah chuan a chuang leh a, râl lehlam panin a kal ta a. A zirtîrte chuan chhang an lo ken theihnghilh a, lawngah chuan chhang tlang khat chauh lo chu a dang rêng an nei lo. Ani chuan, “Farisai-te dawidim leh Heroda dawidim lakah chuan invêng ula, fîmkhur rawh u,” tiin anni chu a han zilh a,” tiin a sawi. [Marka 8: 13-15]
 
Mahse zirtirte chuan chu chu an hrethiam lo thung: “Chhang kan nei hauh lo mai le,” tiin an inbia a. Isuan a lo hriatin, “Engati nge chhang in neih loh thu ngawt in buaipui tâk? In la man lovin in la hrethiam lo ta cheu a ni maw? In va ngawng ve maw le!”  tiin kan hmu [Mark 8:16-17]

Dawidim tehkhin thua hmangin Isua chuan a zirtirte chu chapona chungchang a zirtir a. Chhangah chuan dawidim in telh chuan dawidim chuan chhang chu a titho ṭhin a. Dawidim tlemte mai chuan hna nasa takin a thawk thei tih a sawi. 

Mihringtea chapona nen chuan a inang viau mai. Chapona tlemte chuan mihring a titho hluaiin nun a tiphul thur thei a, buaina tam tak a siam thei bawk. Mahse zirtirte chuan a awmze ril zawk an hre ngai lo – chhunchaw chungchang a sawi emaw te an ti mai mai zawk!

Isuan puitlinna chungchang a sawi lai chuan a zirtirte chuan an chaw ei leh tur an lo ngaihtuah a ni. An ngaihtuahna a tawi hle mai. 

Zimtea thil eng emaw i thlir a nih chuan Pathian hnathawh zau zawk chu i hmu fiah thei ngai lo vang. Vawiin hian Pathian chu chatuan thlir dil la, thui zawk leh zau zawk thlir thiam thei turin amah aṭanga chhuak beiseina chu dil bawk ang che. 

Ngaihtuah zui atan. 

Hmalam hun thui tak thlirna chuan in chhungkua engtin nge a hruai ang? I eizawnna? I Thlarau nunte chu? 

Thui zawk i thlir theihna turin a tak taka chet chhuah dan vawiin hian engtin nge i duan chhuah ang? 

Khawi lai hmunah nge Pathian chu hna thawka i hmuh? 

[Lettu: Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...