Wednesday, June 4, 2025

I THIL TUM HLENCHHUAK TURA THIL PATHUM PATHIANIN A PEK CHE

 Tihdanglam Tawh


- Rick Warren

- June 4, 2025



"Mihring rilruin a kawng a ruahman a, a ke pen erawh chu Lalpan a hruai ṭhin," Thufingte 16:9.


Kan nun atan ruahmanna kan siam ṭhin. Mahse Pathian aṭang chauhin danglamna thlen turin chakna leh thiltihtheihna kan nei a ni.


Thufingte 16:9 chuan, "Mihring rilruin a kawng a ruahman a, a ke pen erawh chu Lalpan a hruai ṭhin," a ti.


I thil tum thleng tur leh i nun thlakthleng turin thil pathum i mamawh. Chu chu Pathian chauhin a pe thei che a ni.


Tichak tur chein Pathian Thlarau i mamawh.

Pathian Thlarau chuan nangmaha i tih theih loh kha a thlâk thleng thei. Chu thlâk danglamna chu tumruhna hmanga neih ni lovin, Pathian thiltihtheihna hmanga lo kal a ni. Tihchhinnaah a innghat lova, Pathian rinnaah a innghat zawk a ni.


Zakaria 4:6 chuan, "I chakna ni lovin, i thiltihtheihna ni hek lovin, ka thlarau zawkin le Engkimtithei Lalpa chuan a ti," (NCV).


Kaihruai tur chein Pathian thu i mamawh


Bible hi nun dan inkaihhruaina bu a ni a. I chhiar tama, i zir tama, i vawn tama, chîk zawka i ngaihtuah nasat poh leh i lo hlawhtlingin i tum i hlenchhuak thei dawn a ni.


Josua chu Ramtiam la tura tih a nih lai khan-thil tum a damchhunga a hlenchhuah tur-Pathianin a pek chu: "He dan bu hian i kâ chu chhuahsan hlek suh se, chumi thuziak zawng zawng chu i zawm tlat theih nan chhûn leh zân i ngaihtuah zawk tur a ni, tichuan i kawngte chu i lo titluang zel ang a, i lo hmuingil zel dawn nia," (Josua 1:8) a ti.


Thlâwp tur chein Pathian mite i mamawh.

Nangmah mai chuan i thil tum i hlenchhuak zo lovang. I duhthusam tihlawhtling turin thawhpui/pawl i mamawh!


Mipui chuan an pui thei lovang che, mahse thawhpui chuan an pui thei ang che. I damloh te, hun khirh i tawh châng te, chawlh i mamawhte an hria. I thil tum te, i hlawhtlinna te leh i hlawhchhamna te i hrilh theia, i bulah chuan an hlimin, kal zel turin an fuih dawn che a ni. I thil tum a hlawhtlina, thinlung taka i umzui zel theihna turin chutiang thlawpna chu i mamawh a ni.


 Thuhriltu 4:12 chuan," Amah maia awm kha chu miin hneh thei mah sela, pahnih chuan an lo dodal zo dawn a ni, hrui thum hrual chu a chat lawk lawk ngai lo ve," a ti.


Ruahmanna i siamin, thil tum i nei a ni thei-mahse Pathian chauhin i mamawh chakna leh i kalna turah thlâwpna a pe ang che.


Ngaihtuah zui atan.


Engtikah nge i nuna Pathian Thlarau thawhpui harsa i tih ber hun?


Pathian Thu chu inzirtirna leh finna atan engtin nge i nun atan i hman?


I thil tum i hlenchhuahna turah i bul vela mite atangin thlawpna i dawng ṭha em?


[ Lettu: Marova Punte ]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...