Saturday, April 12, 2025

ISUAN RORELNA LAK ATA A ZALENTIR CHE

_Hmangaihna Thumal Ropui Pasarih_

- Rick Warren
- April 12, 2025
_"Tupawh ka thu hriaa mi tirtu ring chuan, chatuana nunna a nei tawh a, thiam loh a chang lovang"_ (Johana 5:24, GNT)

Heti hian i ngaihtuah ve tawh ngai em? Rorelna ni a lo ni a. Vanram kawngkhar pawna mi tam tak intlar zingah i lo tel ve a. Hmalam panin zawi muangin i tawlh hret hret a.

Hmalam i hnaih zel rualin i thlan fimin a bual che a, "Ka lut ve ang em aw? Ka thleng ve ang em? Thil sual ka tih te leh thil atthlak tak ka tihte kha mitin hmuih theih turin TV lian tak angah hian pholan a ni ang em? Thil sual ka tih zawng zawng pholan a ni ang em?

Chanchin ṭha in hriat tur ka nei. Bible chuan Isua ringtute- a thihna leh thawh lehna ringtute chu thiam loh changin an awm lovang tih min hrilh (Johana 3:18). Chu chu Isuan a tiam che a ni. 

Heti hian a sawi theih bawk, vanram i luh hunah chuan Isuan pawmin a lo lawm ang che. Ringtu i nih avanga Pathian chhungkaw zinga i tel avangin a lo lawm hle ang che. 

Isua thihna leh thawhlehnain thiam loh chantirna lak ata a chhandam che. A chhandam chiang che!

Ka ṭhianpa Buddy-a tet lai chuan Sunday sikula an zirtirtute khan Pathian chu vanramah awmin he leia an thil tihsual zawng zawng a lo chhinchhiah zel a ni tiin an zirtir ṭhin.

An ziritirtu chuan kartin an zirlaite chu he hla hi a saktir ṭhin, "Ka Lalpa chuan engtik lai pawhin a ziak ṭhin, a ziak ṭhin" tih hla hi. 

Ka ṭhian Buddy-a chuan heti hian a ti a, "Min tihlauthawng ṭhin hle. Vanram ka kai ve ngai dawn lo angah ka ngai ṭhin. Nitin ka chungchang a chhinchhiahna a pung zel hian ka hre ṭhin."

Isua Kristaa rinna i nghah rual khan hei hi Pathianin a tihdan che a ni em? Teuh lo mai. Pathian chuan englai pawhin a nawt reh a, a nawt reh zel ṭhin. Englai pawhin a ngaidam, a ngaidam ṭhin. Vanramah ṭhuin a "nawhrehna" a lo hmet ṭhin.

Engtinnge hei hi ka hriat? Bible chuan, _"Pathian chu hmangaihna a ni"_ a ti (1 Johana 4:8) a, tin, hmangaihna chuan _"thil tihsual a hre reng lo"_ a ti bawk (1 Kor. 13:5). 

Isua Krista leh a hmangaihnaah i rinna i nghah chuan i sual te nawhreh a ni ang. Pathian rorelna hi i hlauh loh tur thil a ni tawh. Isua thihna leh thawhlehna avangin thiam loh chantirna lakah i zalen a ni.

Ngaihtuah zui atan.

• Pathian i ngaihtuahin thiam loh chantirna nge ngaihdamna i rilruah awm? Engvangin?
• Engtinnge Krista thihna leh thawhlehna hian Pathian rorelna i hmuh dan a tihdanglam?
• Pathianin i thil sual tih chhinchhiah lo ta se engvangin nge thil ṭha tih zir a ṭul?

*Isua Krista neitute tan chuan thiam loh channa reng a awm tawh lo*

Johana 3:18ah chuan Isua thihna leh thawhlehna ringtute chuan thiam loh channa reng an nei lovang tih kan hmu. Rom 8:1-ah chuan, _"Isua neitute tan thiam loh channa reng a awm tawh lovang"_  a ti.

Chu thutiam, Pathian rorelna hlauhna bansan a Isua hnena inpe tura i inpeih chuan heti hian ṭawngṭai rawh le:
"Isu, nang ka rin phawt che chuan ka sualte ngaihdam a ni ang tiin min tiam a, chuvang chuan min siam chhan ka zir anga, nangin i vanramah min lo pawm ang tih ka ring.

"I hmaah ka sual ka puang a, ka Pathian leh min chhandamtu i ni tih ka pawm e. Ka Lal atan ka thlang a che. Ka thawh chhuah a ngai lova, ka phu a ngai hek lova, khawngaihna avanga thilthlawn pek anih avangin ka lawm e.

"Vawiin hian ka nunna zawng zawng i tan ka hlan e. Ka nun zawng hi mahni tan ni lovin i tana hman ka duh e. Ka nun i tan ka hlan a,  min chhandam a i chhungkuaa min pawm turin ka ngen a che. Isua hmingin, Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...