Thursday, April 24, 2025

ISUA NUN AṬANGA ZIR

Kut Ruaka Kal

By Rick Warren
April 24, 2025
“Ka nghawngkawl bat ula, ka hnenah zir rawh u; thuhnuairawlh leh rilrua inngaitlâwm tak ka nih hi; tichuan, in thlarau tan chawlhna in hmu ang. Ka nghawngkawl chu a nuam a, ka phur pawh a zang a ni.” [Matthaia 11: 29]

Isua tluka nun dik leh inbuk tawka nung ṭhin kha mihringte zingah an awm ngai lo. Rilru hahnain a tichau ve tak tak ngai lo va. Phurrit eng emawin a uai rit lutuk ngai hek lo. A nun kha hringnun awmze nei leh tum mumal nei a nih tlat avangin kan tana entawn tlak mi chungchuang a tling phak. 

Matthaia 11: 29 ah chuan Isuan, “Ka nghawngkawl bat ula, ka hnenah zir rawh u; thuhnuairawlh leh rilrua inngaitlâwm tak ka nih hi; tichuan, in thlarau tan chawlhna in hmu ang. Ka nghawngkawl chu a nuam a, ka phur pawh a zang a ni,” tiin a sawi [Matthaia 11: 29] A thusawi awmzia chu, “Min zir rawh u, ka tihdan hi han en teh u” tihna ang deuh a ni. 

Rilru buaina leh phurrit ama hnena pek theih dan chu a hnena kal leh kan phurrit a kuta hlan chu a ni a. Tichuan, a hnena aṭanga zir turin min duh bawk – chu chu rilru hah chinfelna rahbi pathumna a ni. 

Isua chuan, “Ka hnen aṭangin zir rawh u. Tuarchhelna leh chakna, mahni inrintawkna leh tumruhna leh hun vawn dik ka lo zirtir ang che u a ti miah lo. “Keimah aṭangin zir rawh u” a ti zawk a, “Keimah aṭangin zir rawh u, thuhnuairawlh leh rilrua inngaitlâwm tak ka nih hi” a ti zawk a ni. Amah chu en a, a tih dan anga ti turin min duh a ni. 

Isua hnen aṭanga zir tih leh, a thuhnuairawlhna leh inngaihtlawmna zui nun chu zan khat thil thua neih nghal mai chi erawh a ni ngai lo. Hun eng emaw chen duh thil a ni a. Rilru hah hmachhawn dan chu i zir a ngai. 

I nuna buaina thlentu lian tak pahnih chu thinrimna leh chapona te an ni. Chu chu inngaihtlawmna leh thuhnuairawlhna letling chiah an ni bawk.  

I thinrimna chuan i rilrua thil awmte chu thlifim hmasa lova che buan buan turin a ti mai zel che a. Nghah hlek emaw ngaihtuah nawn emaw chu i harsat thin. I zuang lut thawr a, ngaihtuahna fim tel lovin i ham bawrh bawrh ta ṭhin a ni. 

I chapona chuan thil zawng zawngah thutlukna siam tur nia inngaihna a neihtir che a. Chapona avang chuan thil engkimah i tana ṭha ber hria ang leh mi zawng zawng tan chuan i ruahmanna chu ṭha ber tur anga ngaihna a neihtir che. 

Thil engkim tih vek, neih vek, nih vek, dai [experience] vek, i tum a nih chuan thinrimna leh chapona chuan thuk tak a hruai che tihna a ni. Mi ropui bik [superman emaw superwoman] emaw i inti mek tihna a ni bawk. Thinrimna leh chapona tihdamna damdawi chu thuhnuairawlhna leh inngaihtlawmna a ni – chu chu Isuan nun dan ṭha min kawhhmuh chu a ni bawk. 

Isua anga inngaihtlawmna leh thuhnuairawlhna nun chu engtin nge i neih theih ang? Rinna kawngah chuan ṭhan len zel tum rawh. Rinna kawngah chuan i tlan en zel angin i rilru hahna leh buaina te pawh chu a kiam ve zel ang. 

Rinna kawngah engtin nge i ṭhanlen theih ang? Rinna kawnga ṭhan len dan pawimawh tak pakhat chu Bible chhiar tam a ni. I nunah Pathian thu i seng luh tam ang zelin rinna kawngah chuan i ṭhang lian deuh deuh ang. Bible chuan hetiang hian a sawi, “Chutichuan, rinna leh hriatna avangin a lo awm thin a, tin hriatna chu Krista thu avangin a lo awm,” [Rom 10: 17] tiin. 

Thu chu i hriat a, i chhiar a, Pathian Thu ngei chu nitina i hriat nawn mawlh mawlh a ngai a ni. Chutianga i tih ngat chuan, i rilru buaina chu a tla hniam hret hret ang a, i nun pumpui chuan Isua Krista a lo ang tial tial ang. 

Ngaihtuah zui atan. 

Thuhnuairawlh tak leh inngaitlâwm taka nun chu harsa tih chang i nei em? Chutiang kawngah chuan engtin nge i ṭhanlen theih ang?   

Chapona leh khakna i nunah chuan awmin i hria em? Chutiang miziaa chu i nun aṭangin engtin nge i tihtlem theih ang? 

I rilru leh thinlungah chuan Pathian thu chu engtin nge nghet zawkin i lakluh zel theih ang? 

[Lettu: Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...