Isuan i nun a tihharh leh dan
By Rick Warren
April 21, 2025
_"Thoma hnenah chuan, "I kutzungin han khawih la, ka kutte en rawh, i kut han ban la, ka nakah zen rawh, ring lovin awm suh la, ring rawh," a ti a. Thoma'n a hnenah, "Ka Lalpa leh ka Pathian i ni," a ti a_ (Johana 20:27-28).
Nuna harsatna a lo awma, theihtawp chhuaha i beihna chuan a chang chuan rinhlelhna a neihtir ṭhin ang che. Pathian Pathian ṭhatna te, a thiltihtheihna te, a hmangaihna hial te pawh i rinhlelh rum rum chang a awm ṭhin ang. Chutiang hun a lo thlen chuan Isuan ring turin a pui thei che a ni. A thiha a thawhleh hnu khan Thoma hnenah pawh hetiang hian a ti a ni.
Bible chuan, "Thoma.....chu an hnenah a awm ve lo va. Zirtir dangte chuan a hnenah, "Lalpa chu kan hmu ta," an ti a. Nimahsela, Thoma chuan, "A kuta thir khenna serte ka hmuha, thir khenna serahte chuan ka kut zungṭang ka khawih luha, a naka ka zen loh chuan ka ring lo vang," a ti a.
"Ni riat hnuah a zirtirte chu in chhungah an awm leha. Thoma pawh an hnenah a awm ve a. Isua a lo kala, kawngte chu khar a ni si a, an zingah a lo ding ta a, an hnenah, "In chungah thlamuanna awm rawh se," a ti a. Thoma hnenah chuan, "I kutzungin han khawih la, ka kutte en rawh, i kut han ban la, ka nakah zen rawh, ring lovin awm suh la, ring rawh," a ti a. Thoman a hnenah, "Ka Lalpa leh ka Pathian i ni," a ti a, a chhang a (Joh 20:24-28).
Helai chanchin hi ka duh thei hle. A hmasa berah chuan a rinhlelhna thua a rilru dik tak a tilang hi a ni. Miin an hrilh apiang a pawm nghal ngawt lo va, a tider hek lo. Amahin fiah hmasak zel a duh a ni.
Mi tam tak chuan rinhlelhna chungchang thu-ah ngaihdan dik lo tak neiin, chu an ngaihdan chu a dik tawk lo hle a ni. Mahse thudik tak chu, rinhlelhna hi thil sual a ni lo. Rinhlelhna hi finfiah tura fuihtu che a nih chuan thil ṭha tak a ni zawk. I rinhlelh chuan finfiah hmasa zel ang che.
Thoma chanchina ka thil duh deuh pahnihna chu, rinhlelhna a nei chung pawhin ringtu dangte nen an la khawsa ho reng a ni. Pathian chungchanga rinhlelhna a ni emaw, Bible emaw, Isua chungchangah a ni emaw pawh ni se, ringtu dangte zingah awm tlat zel ang che - chu chu i awmna tur dik tak a ni.
Thoma chungchanga ka thil duh deuh pathumna chu, Isua a han hmuha, a nung ngei a ni tih a hriat khan, chapo takin a awm ngawt lo. Ani chuan, "Ka Lalpa leh Pathian i ni," a ti . Finfiahna a han hmuh chuan Pathianin a pek hmangin duhthlanna a siam ta mai a ni.
Isua chungchanga rinhlelhna i nei a nih chuan he thu hian fuih che ka duh a ni. Pakhatna, Isua nen an inzawm tak avanga nun danglam ta mi tu emaw zawng ang che. Miin an thil tawn chu i hnial ngawt thei lo vang. Pahnihna, i rinhlelhna chu ringhlel rawh. Rinhlelhna hi rinhlelh tur a ni. Rinna chu ring mai tur kan ni.
Isua hnenah lokal la, amah nen inzawm tlat ula, vanramah i kal dawn a ni tih chiang la, amah nena in inzawmna tinghet ang che.
Nikhat chu mi pakhat hi Lal Isua hnenah lo kalin a fapa tidam turin a ngen a, Isuan, "Ringtu tan chuan engkim tih theih a ni asin," a ti a (Marka 9:23). Chu pa chuan, "Ka ring e, ka rinhlelhnaah min pui ang che," (Marka 9:24) a ti a. Isuan a fapa chu a tidam ta a ni.
Ngaihtuah zui atan.
Vawiinah hian Isua sawi ang hian i sawi ve thei a ni tih i hria em? "Ka ring e, ka rinhlelhnaah min pui ang che," tiin. Ani chuan a thei a. Ring turin a nghak reng che a ni.
I rinhlelhna avangin, i chungah Pathian a thinrimin i ring em? Eng vangin nge i rin?
I rinhlelh avanga Pathianin ring tura a puih hun che i nunah a awm em? Engtin nge rinhlelhna karah mi dangte ring tura i fuih theih ang?
[Lettu: *Marova Punte*]
No comments:
Post a Comment