_Hringnuna Damna Rahbi_
- Rick Warren
- March 1, 2025
_"Ama hming avangin felna kawngah te mi hruai ṭhin."_ (Sam 23:3)
Mi tam tak chuan thutlukna dik lo siam an hlau a, chuvang chuan nasa takin an lungngai ṭhin.
Thil lian tham takah thutlukna i siam a ngai a ni mai thei: Ka chelh reng ang nge ka kaltir ang? Ka lut ang nge ka chhuak ang? Nupui/pasal ka nei ang em? Hna thar ka zawng ang em? Ka insawn ang em? tih ang chi te hi.
I rilru i siam fel mai theih loh chuan i nun pumin mumal lo takin i awm ṭhin. Jakoba 1:6-8 ah chuan rilru bulbal i neih loh chuan eng kawngah pawh i nghet lo ṭhin tiin min hrilh. Helaia "nghet lo" tih hi a ṭawngbul Greek ṭawngah chuan 'zu rui anga ding nghet lo' tih sawina a ni.
Mahse Pathianin thutlukna mumal i siam theih lohna tihdamna a awm thu min hrilh. Sam 23:3-ah chuan heti hian kan hmu, _"Ama hming avangin felna kawngah te mi hruai ṭhin."_ Pathian hruaina ang zela i kalin thutlukna siam theih loh avanga i lungngaihna te kha i hmachhawn thiam tawh ang.
"Hei hi ka la tum chhin ngai miah lo!" tiin i ngaihtuah a ni mai thei. Pathian hnenah a hruaina i dil a, mahse mahni maia i awm lai ai mahin i talbuai a ni thei. I la ngaihtuah chhuak zo lo a ni thei. Mak ti takin, "Pathian duhzawng hriat hi engvangin nge a harsat em em le?" i ti a ni thei.
Pathianin a fiam che a ni mai em? Ni lo ve! Pathianin hruai che a duh. Pathian duhzawng hriat i duhna ai mahin a duhzawng i hriat a duhna a tam zawk. A buaina lai tak chu Pathian duhzawng i zawnna kawngah thil dik lo i en ṭhin vang a ni.
Eng emaw i rilru dek riau tur i zawng a ni mai thei. "Chutah chiah chuan a ni Pathian duhzawng ka hriat ni!" i tih theihna turin eng emaw i rilru rawn tiche lawih tur thil i duh a ni mai thei e.
Pathian duhzawng hre turin kalphung mumal tak i beisei a ni thei. Tu emawin tihdan tur kalhmang a hrilh che i duh a ni mai thei.
Pathian duhzawng hre turin kawng mak deuh i beisei zawk pawh a ni thei. Chhinchhiahna mak tak, vana eng emaw inziak ang chi i beisei a ni mai thei.
Heng zawng zawng hian beidawnna/hrilhhaina i nunah thlenin Pathian duhzawng hre fuh thei lovin a siam thei che. Pathian duhzawng chu rilru sukthlek nona emaw, kal dan phung nei emaw, eng emaw i hlauhzawng leh mak i tih tura a duh chi ang emaw a ni lo.
Pathian chuan hrilhhai taka i awm a duh lo a, thutlukna siamna kawnga rilru hah taka i awm a duh hek lo. Thutlukna lian tak i siam leh dawn hunah pawh Pathianin kawng dikah a hruai ang che tih rinnaah hahchawl ang che, i ke pen tinin.
Ngaihtuah zui atan.
Tun hnaiah eng thutlukna lian nge i hmachhawn le? Engtinnge Pathian duhzawng i zawn?
I ke pen kawng tinrengah Pathianin a hruai ang che tih rinna i neihna tur engin nge dal che?
Hun kal tawha thutlukna i siamna kawngah engtinnge Pathianin a duhzawng a kawhhmuh che?
*Isua ringa a hnung zui turin i la inpe lo anih chuan engnge i la nghah khaw tlai ang?*
I sualna khan Pathian lakah a ṭhen hrang che a. Pathian khawngaihna chauhin amah nena inzawmna nun neih leh turin a pui thei che.
Bible chuan heti hian a ti, _"Rinna avanga khawngaihnaa chhandam in ni; nangmahni thawh chhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e."_ (Ephesi 2:8-9)
Siamtu Pathian hnena inhlan tura i inpeih chuan heti hian ṭawngṭai rawh le:
"Isu, ka sualna hian nang nena min ṭhen hrang reng hi ka duh tawh lo. Isua ka rin chuan ka thiltih sualte ngaidamin kan damchhan min kawhhmuh anga, i chhungkuaah min pawmin engtik niah emaw chatuana i hnena chêng turin vanramah min hruai ang tih ka ring tlat a ni.
"Isu, ka sualte i hmaah ka puang a, min Chhandamtu i ni tih ka ring e. Ka sualte ka puan a ka rin che chuan chhandam ka ni ang tiin min tiam a. Ka nunah lo lal turin ka sawm a che. Vawiin hian ka nun i tan ka hlan e.
"Min siam angin mahni duhzawng anga awm lovin ka nun zawnga i rawng bawl ka duh e. Ka nun i tan ka hlan a, min chhandam a i chhungkuaa min pawn turin ka ngen a che. Isua hmingin, Amen "
Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.
[Lettu: Mapuia Fanai]
No comments:
Post a Comment